1. Sortu bosroiti yonguwan musu teki? Fu san ede den no abi fu frede? (Luku a prenki na a bigin fu na artikel.)

LEKI yonguwan yu sabi taki fosi yu teki pasi go na wan presi, a de wan koni sani fu luku fosi pe yu wani go. Na so a de nanga a libi fu yu tu. Yu musu luku na fesi san yu wani du nanga yu libi. Èn a moro bun ten fu bosroiti dati na te yu yongu. A no de fu taki dati a sani disi no makriki. Wan yongu sisa di nen Heather e taki: „A e frede mi pikinso. Den bosroiti di mi e teki now, o abi krakti na tapu mi heri libi.” Ma un yonguwan no abi fu frede. Yehovah e taigi a pipel fu en: „No luku leki yu e frede, bika mi na yu Gado. Mi o meki yu kon tranga. Mi o yepi yu trutru.”​—Yes. 41:10.

2. Fa yu du sabi taki Yehovah wani taki yu teki bosroiti di o meki taki yu abi wan koloku libi?

² Yehovah e gi yu a deki-ati fu teki koni bosroiti gi a ten di e kon (Preik. 12:1; Mat. 6:20). A wani taki yu de koloku. Ala den moi sani di yu man si, sosrefi den sani di yu e yere èn e tesi, e sori dati. Prakseri tu fa a e sorgu wi èn fa a e leri wi san na a moro  bun fasi fu libi. Luku san Yehovah e taigi den wan di no wani teki den rai fu en. A e taki: „Na den sani di mi no lobi, na dati unu du. . . . Mi futuboi o prisiri, ma unu o kisi syen. Mi futuboi o bari fu prisiri fu di den abi wan bun ati” (Yes. 65:12-14). Yehovah e kisi glori te en pipel e teki koni bosroiti.​—Odo 27:11.

3. San Yehovah wani taki yu du?

³ San Yehovah wani taki yu du? A meki libisma fu de koloku. Ma efu den wani de koloku trutru, dan den musu sabi en èn den musu dini en nanga den heri ati (Ps. 128:1; Mat. 5:3). Den meti no meki na a fasi dati. A wan-enkri sani di den e du na nyan, dringi èn meki pikin. Ma wi no de leki den meti. Gado wani taki yu du moro nanga yu libi èn taki yu de koloku. Yu Mekiman na „a Gado fu lobi” èn „a koloku Gado” di meki libisma „leki fa ensrefi de” (2 Kor. 13:11; 1 Tim. 1:11; Gen. 1:27). Yu o de koloku efu yu du muiti fu de leki a lobi-ati Gado fu wi. Bijbel e taki: „Wan sma sa de moro koloku te a e gi sani, leki te a e kisi sani” (Tori 20:35). Oiti yu ondrofeni san skrifi na ini a tekst dati? Disi de so gi ala libisma. Dati meki Yehovah wani taki yu seti yu libi na so wan fasi taki yu man sori lobi gi en èn gi trawan.​—Leisi Mateyus 22:36-39.

4, 5. San yepi Yesus fu de koloku?

⁴ Yesus Krestes na wan bun eksempre gi unu yonguwan. A no de fu taki dati leki pikin boi, a ben prei èn a ben e meki prisiri. Gado Wortu e taki dati „wan ten de fu lafu . . . èn wan ten de fu dansi” (Preik. 3:4). Ma Yesus ben e studeri Gado Wortu tu fu kon moro krosibei na Yehovah. Di a ben abi 12 yari den leriman na ini a tempel ben e fruwondru taki „a ben abi someni koni èn taki a ben man piki den na so wan bun fasi” di den ben e taki fu Gado Wortu.​—Luk. 2:42, 46, 47.

⁵ Di Yesus kon bigi a ben de koloku. San yepi en fu de koloku? A ben sabi taki Gado ben wani taki a „fruteri den pôti sma bun nyunsu” èn taki a preiki „taki den breniwan o si baka” (Luk. 4:18). Fu di Yesus ben e du san Gado ben e aksi fu en, meki a ben de koloku. Psalm 40:8 e sori fa a ben e firi: „Gado, mi prisiri fu du yu wani.” Yesus ben lobi gi sma leri fu en hemel Tata. (Leisi Lukas 10:21.) Wan leisi, baka di Yesus ben sori wan uma san na a tru anbegi, dan a taigi den disipel fu en: „Mi nyanyan na fu du a wani fu a sma di seni mi kon èn fu klari a wroko fu en” (Yoh. 4:31-34). Yesus ben de koloku fu di a ben e sori lobi gi Gado èn gi tra sma. Yu kan de koloku tu te yu e du dati.

6. Fu san ede a bun fu taki nanga trawan fu den bosroiti di yu wani teki gi a ten di e kon?

⁶ Furu Kresten bigin pionier di den ben yongu èn a sani disi ben e meki den firi koloku. Fu san ede yu no e taki nanga wan tu fu den? Bijbel e taki: „Te sma no e taki krin nanga makandra, ala sani e bruya, ma te furu raiman de, sani e waka bun” (Odo 15:22). Den lepi Kresten dati kan fruteri yu taki a furuten diniwroko e gi yu okasi fu leri sani di o tyari wini kon gi yu, yu heri libi langa. Baka di Yesus kisi leri fu en Tata na hemel, a tan leri moro sani di a ben e du a diniwroko fu en na grontapu. A ben e prisiri te a bun nyunsu di a ben e preiki ben e doro na ati fu sma èn te a ben e tan gi yesi na Gado na ini muilek situwâsi. (Leisi Yesaya 50:4; Hebr. 5:8; 12:2.) Meki wi go luku fu san ede a furuten diniwroko kan meki yu firi koloku.

7. Fu san ede furu yongusma lobi fu meki disipel?

⁷ Yesus ben taki: „Go na sma . . . èn meki den tron disipel. . . . Leri den” (Mat.  28:19, 20). Efu yu bosroiti fu tron wan sma di e meki disipel, dan yu o abi wan koloku libi èn yu o gi Gado grani. Neleki fa a de nanga iniwan wroko, wi abi ten fanowdu fu tron wan bun preikiman. Timothy na wan brada di bigin pionier di a ben abi 19 yari. No so langa pasa a taki: „Mi lobi du furuten diniwroko gi Yehovah fu di a wroko disi e gi mi okasi fu sori en taki mi lobi en. Fosi, mi no ben man bigin wan Bijbelstudie, ma bakaten mi froisi go na wan tra kontren, èn na ini wán mun nomo mi bigin studeri Bijbel nanga wan tu sma. Wán Bijbelstudie bigin kon na a Kownukondre zaal. Baka den tu mun di mi ben de na a Bijbelskoro gi brada di no trow, * mi ben musu go dini na ini wan nyun gemeente. Drape mi bigin studeri Bijbel nanga fo sma. Mi lobi gi sma leri fu di mi kan si taki santa yeye e kenki den.”​—1 Tes. 2:19.

8. San son yongusma du fu man preiki gi moro sma?

⁸ Son yongu Kresten leri wan tra tongo. Fu eksempre, Jacob di de fu Amerkankondre e skrifi: „Di mi ben abi seibi yari, furu fu den pikin na ini mi klas ben de fu Vietnam. Mi ben wani fruteri den fu Yehovah. Sobun, baka wan pisi ten mi bosroiti fu leri a tongo fu den. A sani di yepi mi moro furu na taki mi ben e teki den Ingrisitongo Waktitoren gersi nanga den wan na ini Vietnameisitongo. Mi meki mati tu na ini wan Vietnameisitongo gemeente di ben de krosibei. Di mi ben abi 18 yari, mi bigin pionier. Bakaten, mi go na a Bijbelskoro gi brada di no trow. A skoro disi yepi mi so taki mi kan dini now leki pionier na ini wan grupu pe mi de a wan-enkri owruman. Furu Vietnamsma no man bribi taki mi leri a tongo fu den. Den e kari mi kon na ini den oso èn nofo tron mi kan studeri Bijbel nanga den. Sonwan fu den teki dopu srefi.”​—Tori 2:7, 8.

9. San wi e leri te wi e yepi fu meki disipel?

⁹ Te yu e teki prati na a wroko fu meki disipel, dan yu kan leri furu sani. Yu kan leri fa fu wroko bun, fa fu taki nanga sma, fu no frede tumusi èn fu sori lespeki gi trawan (Odo 21:5; 2 Tim. 2:24). Ma a wroko disi e gi furu prisiri fu di yu e leri fa fu sori sma taki den sani di yu e bribi komoto fu Bijbel. Yu e leri tu fu wroko skinskin nanga Yehovah.​—1 Kor. 3:9.

10. Fa yu kan prisiri fu teki prati na a wroko fu meki disipel, awansi a kontren fu yu no makriki?

¹⁰ Awansi furu sma na ini a kontren fu yu no wani arki a bun nyunsu, toku yu kan prisiri te yu e yepi fu meki disipel. A heri gemeente musu wroko makandra fu man meki disipel. Awinsi na wán brada noso wán sisa nomo e feni wan sma di e tron wan disipel te fu kaba, toku a heri gemeente ben yepi fu feni a sma èn den e prisiri tu. Fu eksempre, Brandon ben e pionier neigi yari na ini wan kontren pe furu sma no ben wani arki a boskopu. A e taki: „Mi lobi preiki a bun nyunsu fu di na dati Yehovah e aksi wi fu du. Mi bigin pionier syatu baka di mi klari skoro. Mi lobi fu gi den yongu brada na ini wi gemeente deki-ati èn fu si fa den e go na fesi. Baka di mi go na a Bijbelskoro gi brada di no trow, mi ben musu go pionier na ini wan tra kontren. Noiti mi no feni wan sma di go na fesi teleki a teki dopu, ma tra brada nanga sisa ben feni sma. Mi breiti taki mi ben bosroiti fu go na ini a furuten diniwroko fu kan meki disipel.”​—Preik. 11:6.

11. Na sortu tra fasi yonguwan du santa diniwroko gi Gado?

¹¹ Furu sani de di yu kan du gi Yehovah. Fu eksempre, furu yongusma e yepi nanga  bow-wroko. Hondrohondro nyun Kownukondre zaal de fanowdu. Te yu e yepi fu bow den zaal disi, dan yu e du santa diniwroko di e gi Gado glori èn di kan meki yu firi koloku. Te wi e yepi du a wroko disi, dan wi e prisiri tu fu wroko makandra nanga tra brada nanga sisa. A wroko disi e leri yu fu luku bun so taki yu no kisi mankeri, a e leri yu fu wroko tranga èn fu wroko makandra nanga den wan di e teki fesi.

12. Sortu tra okasi a pionierwroko e gi yu?

¹² Wan brada di nen Kevin e taki: „Sensi mi ben de wan pikin boi, mi ben wani du furuten diniwroko gi Yehovah. Te fu kaba, mi bigin pionier di mi ben abi 19 yari. Fu man sorgu misrefi, mi ben e du wan wroko di ben gi mi na okasi fu du moro gi Yehovah. Mi ben e du bow-wroko nanga wan brada. Na so mi leri fu seti daki èn fu poti fensre nanga doro. Bakaten, mi wroko tu yari nanga wan grupu brada nanga sisa di ben e yepi te rampu ben e pasa. Wi ben e seti Kownukondre zaal nanga oso kon bun baka. Di mi yere taki Kownukondre zaal ben o bow na ini Zuid-Afrika, dan mi gi mi nen èn mi kisi kari fu go. Dyaso na ini Afrika, a e teki wan tu wiki fu bow wan Kownukondre zaal èn baka dati wi e bigin nanga wan trawan. Den brada nanga sisa na ini a bow-grupu fu mi de leki wan famiri. Wi e libi makandra na ini wán oso, wi e studeri Bijbel makandra, èn wi e wroko makandra. Mi lobi en tu fu preiki ibri wiki makandra nanga brada nanga sisa dyaso. Noiti mi ben denki taki den bosroiti di mi teki di mi ben de wan pikin boi ben o meki mi firi so koloku.”

13. Fu san ede furu yonguwan e prisiri fu dini Yehovah na Betel?

¹³ Son yonguwan di ben de pionier fosi, e  dini now na Betel. Te yu e wroko na Betel, dan yu o de koloku fu di ala san yu e du drape, na gi Yehovah. A Betel famiri e yepi fu meki buku nanga tra sani di e gi sma leri fu Gado. Dustin di e wroko na Betel e taki: „Sensi di mi ben abi neigi yari, mi ben wani go na ini a furuten diniwroko. Mi bigin pionier di mi klari skoro. Baka wán nanga afu yari, mi kisi kari fu go na Betel. Drape mi leri fu wroko nanga den bigi masyin di e meki buku èn bakaten mi leri du computer wroko. Na Betel mi abi a grani fu yere wantewante fa a e go nanga a wroko di wi e du fu meki disipel na heri grontapu. Mi lobi dini dyaso fu di a wroko di wi e du e yepi sma fu kon moro krosibei na Yehovah.”

14. Fa yu kan seti sani fu go na ini a furuten diniwroko?

¹⁴ Fa yu kan seti sani fu tron wan furuten preikiman? Wan prenspari sani di o yepi yu fu dini Gado nanga yu heri ati, na te yu e kweki den fasi fu Gado. Sobun, studeri Gado Wortu fayafaya, denki dipi fu en èn luku fa yu kan sori a bribi fu yu na den gemeente konmakandra. Te yu de na skoro ete, dan yu kan bigin leri fu tron wan moro bun preikiman fu a bun nyunsu. Leri fu poti prakseri na sma. Aksi den na wan lespeki fasi fa den e denki fu sani èn arki san den e taki. Boiti dati, yu kan yepi nanga a wroko di de fu du na ini a gemeente. Fu eksempre, yu kan yepi fu krin èn fu ondrow a Kownukondre zaal. Yehovah lobi fu wroko nanga sma di abi sakafasi èn di de klariklari fu wroko. (Leisi Psalm 110:3; Tori 6:1-3.) Na apostel Paulus gi Timoteyus a kari fu du zendeling-wroko makandra nanga en, fu di ’den brada ben e taki soso bun sani fu en’.​—Tori 16:1-5.

15. Fa yu kan sreka yusrefi fu kan feni wan wroko?

¹⁵ Nofo tron den brada nanga sisa di e pionier musu wroko fu man sorgu densrefi (Tori 18:2, 3). Kande yu kan leri du wan sani di o yepi yu fu feni wan wroko gi wan tu dei na ini a wiki. Ma fosi yu teki den bosroiti disi, dan a bun fu taki nanga yu kring-opziener èn nanga den pionier na ini a kring fu yu. Aksi den sortu wroko moro bun gi wan pionier. Èn soleki fa Bijbel e taki, a bun fu poti ala san yu e du „na ini Yehovah anu, dan den sani di yu wani du o waka bun”.​—Odo 16:3; 20:18.

16. Te yu e bigin du furuten diniwroko na ini den yongu yari fu yu, dan fa dati e sreka yu gi tra frantwortu?

¹⁶ Yu kan de seiker taki Yehovah wani taki yu „grabu a trutru libi hori bun steifi”. (Leisi 1 Timoteyus 6:18, 19.) Te yu de na ini a furuten diniwroko, dan yu e leri sabi tra brada nanga sisa di e du a srefi wroko disi èn disi e yepi yu fu tron wan lepi Kresten. Furu fu den preikiman disi kon si taki fu di den bigin du furuten diniwroko di den ben yongu, dan dati yepi den tu fu abi wan bun trowlibi. Furu Kresten di ben e pionier fosi den trow e pionier ete leki trowpaar.​—Rom. 16:3, 4.

17, 18. Fu san ede yu ati musu de na ini a tori te yu e teki bosroiti?

¹⁷ Te yu e bosroiti fu du wan sani, dan yu ati musu de na ini a tori tu. Psalm 20:4 e taki fu Yehovah: „Meki a gi yu ala san yu ati wani èn meki a sorgu taki ala sani di yu abi na prakseri fu du, waka bun.” Sobun, prakseri san yu wani du nanga yu libi. Luku san Yehovah e du na ini a ten disi èn fa yu kan teki prati na a diniwroko fu en. Baka dati, bosroiti fu du sani di o gi en prisiri.

¹⁸ Yu o de koloku trutru te yu e du furuten diniwroko gi Yehovah, fu di a libi dati e gi Gado grani. Iya, „prisiri pasa marki nanga Yehovah, dan a o gi yu san yu ati wani”.​—Ps. 37:4.