Bijbel e kenki sma libi

San ben kan meki taki wan yonkuman komoto na ini wan grupu ogri-ati yonguwan na ini Meksikow, di ben kari densrefi den Pikin Satan? San meki taki a yonkuman disi kenki kon tron wan sma di e wroko tranga èn di no e bedrigi sma? Fu san ede wan gudu bisnis uma na ini Yapan, no ben e si en leki wan prenspari sani moro fu meki furu moni? Fa a e feni en taki a tyari kenki kon na ini en libi? San ben meki taki wan Rosiaman, di ben e seri gon sondro fu abi papira gi dati, tapu nanga a bisnis fu en di ben e drai heri bun? Luku san den sma disi e fruteri.

 

NEN: ADRIAN PEREZ

YARI: 30

KONDRE: MEKSIKOW

A BEN DE WAN MEMRE FU WAN GRUPU OGRI-ATI YONGUWAN

A LIBI FU MI FOSI: Di mi ben abi 13 yari, mi famiri froisi go na a foto Ecatepec de Morelos, di de na ini wan prenspari distrikt fu Meksikow. Na a ten dati, yu ben abi furu yonguwan na ini a kontren drape di ben e du ogri, di ben e pori sma sani, èn di ben e gebroiki drugs. Heri esi mi ben tron wan sopiman, mi ben e pori sma sani, èn mi ben e du hurudu.

Bakaten, wi froisi go baka na San Vicente, a foto pe mi gebore. Ma wan bigi problema di ben de drape, na taki furu sma ben e gebroiki drugs. Nofo tron yu ben kan si dede yonguwan na sei pasi. Mi ben tron wan memre fu wan grupu ogri-ati yonguwan di ben kari densrefi Pikin Satan. Wi ben e fufuru èn wi ben e gebroiki drugs. Moro furu, wi ben e snoifi terpentine, wan sani di sma e gebroiki fu meki ferfi kon watrawatra, èn wi ben e snoifi lijm tu. Nofo tron mi no ben man memre fa mi doro na oso, èn son leisi mi ben e didon flaw na strati. Sonwan fu den mati fu mi ben go na strafu-oso fu di den ben fufuru èn ben kiri sma.

Aladi mi ben e du den sortu ogri sani disi, toku mi ben e bribi na ini Gado. Mi ben e teki prati na wan kerki fesa so taki mi konsensi no  trobi mi so furu moro. Na a fesa dati, sma e waka na strati nanga kroisi èn den e du tra sani na ini a wiki di den Lomsu e kari a Santa Wiki. Baka a fesa dati, wi alamala, sosrefi a man di ben plèi leki en na Krestes, ben go meki prisiri èn wi ben dringi sopi te fu drungu.

A FASI FA BIJBEL KENKI MI LIBI: Mi ben de wan tini ete di mi bigin studeri Bijbel nanga Yehovah Kotoigi. Mi kon si taki mi no ben sabi san mi wani na ini a libi èn taki efu mi ben o go doro fu libi na a fasi disi, dan sani no ben o waka bun nanga mi. A sani di naki mi ati, na a sani di skrifi na ini Galasiasma 6:8 di e taki: „A sma di e du san a sondu skin wani, sa koti takru bakapisi di e tyari dede kon, ma a sma di e du san a yeye wani, sa kisi têgo libi fu a yeye.” A tekst disi meki mi frustan taki efu mi wani taki sani waka bun nanga mi, dan mi ben musu du sani di o meki mi abi wan bun tamara.

Di mi ben e studeri Bijbel, dan mi bigin frustan taki Yehovah na wan Gado di de na libi èn a e broko en ede trutru nanga mi. Yehovah de klariklari tu fu gi mi pardon fu den sondu di mi ben du fosi. Misrefi ondrofeni taki a e arki èn a e gi piki tapu begi.

A no ben makriki fu tyari kenki kon na a fasi fa mi ben e libi. A ben muilek fu komoto na ini a grupu ogri-ati yonguwan. Son kontren ben de fu tra ogri-ati grupu èn mi no ben man go na ini den kontren dati, aladi mi no ben de wan memre moro fu a grupu yonguwan. Son leisi, mi ben musu kibri gi den owru mati fu mi, fu di den ben o pruberi fu feni mi èn dwengi mi fu du baka san mi ben gwenti fu du.

Tra fasi leki dati, di mi bigin go na den konmakandra na a Kownukondre zaal makandra nanga den Kotoigi, dan mi kon si taki den sma drape abi switifasi nanga lobi. A ben naki mi ati fu si taki a bribi fu den sma disi tranga èn taki den e du den sani di den e leri trawan. Dati ben de heri tra fasi leki san mi ben gwenti.

DEN WINI DI MI KISI: Now mi dopu tin yari kaba leki wan fu den Kotoigi fu Yehovah. Mi e du tranga muiti fu du den sani di mi leri fu Bijbel. Leki bakapisi fu dati, mi famiri abi moro lespeki gi mi now. Den sabi mi now leki wan sma di e wroko tranga èn mi ben man gi den moni srefi fu yepi den. Mi mama bigin studeri Bijbel, èn now en na wan Kotoigi fu Yehovah. Mi papa e tyari kenki kon na ini en libi tu. Furu fu mi famiriman no de Yehovah Kotoigi, ma di den si fa mi kenki mi libi, dan den si krin taki Bijbel kan yepi wan sma fu abi wan moro bun libi.

 

NEN: YAYOI NAGATANI

YARI: 50

KONDRE: YAPAN

A BEN DE WAN BISNIS UMA DI BEN E MEKI FURU MONI

A LIBI FU MI FOSI: Mi gro kon bigi na ini wan pikin foto di de na boiti, èn den sma drape abi switifasi. Mi papa ben abi wan bigi wenkri drape pe tin sma ben e wroko. Na oso fu wi ben de sei a wenkri, èn aladi mi papa nanga mama ben abi furu fu du, toku noiti mi ben firi leki mi ben de mi wawan.

Mi na a moro owruwan fu den dri  umapikin na ini na osofamiri fu wi, èn sensi di mi ben yongu mi ben leri fu drai a bisnis fu wi. Mi ben yongu ete di mi trow. Mi masra libi a wroko fu en di a ben abi na bangi èn a ben kon yepi wi nanga a bisnis fu wi. Wi ben kisi dri pikin syatu baka makandra. Te mi mama ben e du en osowroko, dan a ben e luku den pikin, èn mi ben e wroko fu mamanten te go miti neti na ini a wenkri. Aladi dati ben de so, toku wi ben abi ten ete fu de makandra leki osofamiri.

Dan a kon pasa taki na ekonomia na ini a bisnis kontren go na baka, èn a bisnis fu wi no ben drai so bun moro. Leki bakapisi fu dati, wi bosroiti fu opo wan wenkri pe wi ben e seri sani di sma abi fanowdu fu meki oso. A wenkri disi ben de na sei wan bigi pasi. Tapu a dei fosi wi bigin nanga a bow fu a wenkri, mi papa, di ben de basi fu a bisnis fu wi, kisi wan berurtu. Baka dati, mi papa no ben man taki bun moro, èn fu dati ede mi ben kisi a frantwortu fu drai a nyun wenkri. Mi masra ben tan wroko na a owru wenkri fu wi èn wi ben kon abi furu fu du.

A nyun wenkri fu wi ben drai heri bun. Mi ben breiti nanga ala den sani di mi ben du, èn son leisi mi no ben sribi srefi soso fu man wroko. Aladi mi ben lobi den pikin fu mi, toku a wan-enkri sani di mi ben e denki, na a wroko fu mi. Mi no ben abi ten fu taki nanga mi masra srefi, èn te wi ben taki dan wi ben krutukrutu furu nanga makandra. Fu man frigiti den broko-ede dati, mi bigin go pikinmoro ibri neti na presi pe mi ben e dringi sopi nanga mi mati èn nanga sma di ben du bisnis nanga mi. Den wan-enkri sani di mi ben e du, ben de wroko, dringi sopi, èn sribi. Mi ben e meki furu moni, ma a ben pasa moro nanga moro taki mi no ben firi koloku èn mi no ben man frustan fu san ede dati ben de so.

A FASI FA BIJBEL KENKI MI LIBI: Di mi bigin studeri Bijbel nanga Yehovah Kotoigi, dan dri bijbeltekst ben abi furu krakti tapu mi. Mi ben krei di mi frustan san Mateyus 5:3 wani taki. A tekst disi e taki: „Koloku fu den sma di sabi taki den de na nowtu na yeye fasi, bika den sa kisi a kownukondre fu hemel.” A tekst disi e sori fu san ede mi no ben de koloku aladi mi ben meki furu moni èn aladi den mati fu mi ben abi lespeki gi mi. Mi ben kon frustan taki mi musu sabi san na mi nowtu na yeye fasi. Disi ben wani taki dati soso te mi sabi san de fanowdu fu tron wan moro bun mati fu Gado èn te mi e du den sani dati, dan mi o man de koloku trutru.

Na a ten dati, na ekonomia na ini Yapan ben go na baka srefisrefi, èn mi ben si na den sma di ben wroko nanga mi, taki den wortu di skrifi na ini 1 Timoteyus 6:9, tru. A tekst disi e taki: „Den sma di wani kon gudu nomonomo e kisi tesi èn den e go na ini wan trapu; den e kisi wan lo dondon èn takru lostu di e tyari den go pori krinkrin.” Mi ben feni taki den wortu fu Yesus di skrifi na ini Mateyus 6:24, ben de gi mi. A tekst disi e taki: „Unu no kan dini Gado èn dini Gudu na a srefi ten.” Fu dati ede, mi bosroiti fu kenki wan tu sani na ini mi libi.

Mi kon si taki mi no ben abi ten gi mi papa, mi mama, mi masra, nanga mi pikin. Mi ben kon si tu taki mi ben kon abi wan tu fasi di no ben bun srefisrefi. Mi ben kon kisi bigifasi. Mi no ben abi pasensi nanga sma èn mi ben e atibron esi-esi. Na a bigin, mi ben denki taki mi no ben o man tyari kenki kon na ini mi libi so taki mi kan tron wan Kresten. Ma mi ben lobi mi pikin trutru, èn mi kon si taki te mi ben e fiti den rai fu Bijbel te a abi fu du nanga mi famiri, dan mi pikin ben lobi dati. Mi ben abi moro ten gi den èn mi ben tyari den go na den Kresten konmakandra.

DEN WINI DI MI KISI: Mi sabi san prenspari na ini a libi èn mi man dini Gado, fu di mi e libi na wan fasi di e plisi en. Den sani dati gi mi furu prisiri èn den meki taki mi de koloku. Now a wroko fu mi no prenspari moro leki mi osofamiri, èn disi meki taki mi kisi lespeki baka gi misrefi.

Di mi mama kon si taki mi kon tron wan moro bun sma fu di mi fiti Bijbel gronprakseri na ini mi libi, meki a bigin studeri Bijbel èn a tron wan Kresten. Mi breiti taki mi papa nanga mi masra no gens wi fu tron Kresten. Mi kon tron moro bun mati nanga mi pikin èn now mi abi wan trutru koloku osofamiri libi.

 

NEN: MIKHAIL ZUYEV

YARI: 51

KONDRE: ROSIAKONDRE

A BEN DE WAN SMA DI BEN SERI GON SONDRO FU ABI PAPIRA GI DATI

 A LIBI FU MI FOSI: A foto Krasnogorsk, pe mi e libi, na wan presi pe furu bon de. A watra fu Moskowliba e lon go na a zuidsei. Pikinmoro busi wawan lai lontu den boitipresi na a westsei nanga a noordsei.

Di mi ben yongu, mi ben lobi fu naki kofu èn fu plèi nanga gon. Boiti dati, mi ben lobi fu oefen mi skin. Mi ben e meki gon, kugru, nanga nefi tu sondro fu abi papira gi dati. Baka wan pisi ten mi ben abi mi eigi bisnis. Mi ben seti mi bisnis heri bun èn furu fu den sani di mi ben e meki, mi ben seri gi ogriman.

A FASI FA BIJBEL KENKI MI LIBI: Na ini den yari syatu baka 1990, mi miti Yehovah Kotoigi, ma biginbigin mi no ben frutrow den. Mi ben feni taki den ben e poti tumusi furu aksi.

Wan dei, wán fu den leisi Romesma 14:12 gi mi. A tekst dati e taki: „Ibriwan fu wi o abi fu gi Gado frantwortu.” Mi ben aksi misrefi san mi ben o taigi Gado. A tekst disi meki taki mi ben wani kon sabi san Gado wani taki mi du.

Mi ben du tranga muiti fu fiti a Bijbel rai di skrifi na ini Kolosesma 3:5-10, di e taki: „Fu dati ede, un musu kiri den firi di de na ini den pisi fu un skin na grontapu, èn di abi fu du nanga hurudu, morsu libi, seks lostu, takru lostu, nanga bigi-ai, wan sani di de a srefi leki te wan sma e anbegi kruktugado. Na fu den sani disi ede meki Gado o kisi bigi atibron. . . . Un musu poti ala den sani disi na wan sei trutru, namku atibron, ogridu, nanga kosikosi, èn un no musu taki dotitaki moro. No lei gi makandra. Kenki a fasi fa unu ben de fosi, èn tapu nanga den sani di unu ben e du, èn kon tron nyun sma di e kisi nyun fasi.”

A ben muilek srefisrefi fu tyari den kenki dati kon na ini mi libi. Den sma di ben e du bisnis nanga mi fosi, ben tan kon na mi fu di den ben wani gi mi moni gi den gon nanga tra sani di mi ben e seri. Mi ben feni en muilek fu hori misrefi te sma ben kosi mi. Aladi dati ben de so, toku mi pori ala den diri gon nanga tra sani di mi ben abi. Di mi kon sabi taki Gado nanga Krestes sori lobi gi mi, dan dati meki taki mi lobi den tu. Mi tan studeri Bijbel go doro, mi tan go na den konmakandra na a gemeente na ini a kontren drape, èn mi begi Gado fu yepi mi.

DEN WINI DI MI KISI: Mi ben e meki furu muiti èn Kresten brada nanga sisa yepi mi so taki safrisafri mi kon tron wan moro bun sma. Mi breiti srefisrefi di mi kon frustan taki Yehovah Gado e broko en ede nanga ibriwan fu wi, èn srefi nanga den sma di dede (Tori fu den Apostel 24:15). Mi e warderi en trutru taki den Yehovah Kotoigi na sma di no e hoigri èn den e taki san tru. Mi de nanga tangi tu taki den e broko den ede trutru nanga mi èn mi e feni en moi fu si taki den e tan gi yesi na Gado awansi san e pasa.

Na a bigin, sonwan fu den famiriman nanga mati fu mi ben e gens mi fu di mi abi wan nyun bribi. Ma bakaten, den ben kon de korostu, fu di den ben feni en moro bun taki mi e du sani di abi fu du nanga a bribi fu mi, na presi fu du sani di abi fu du nanga ogridu. Mi breiti taki a moro prenspari sani na ini mi libi a no fu seri gon di sma e gebroiki fu feti nanga makandra, ma na fu yepi trawan fu kon sabi a Gado fu vrede.

[Prenki na tapu bladzijde 27]

Mi ben e teki prati na Lomsu fesa so taki mi konsensi no trobi mi so furu moro

[Prenki na tapu bladzijde 28]

Mi ben e meki furu moni ma mi no ben de koloku srefisrefi