Abi bribi neleki den

A du tranga muiti fu no frede èn fu no tweifri moro

PETRUS e du tranga muiti fu pari a boto èn a e pruberi fu si na ini a dungru. San a ben e si na a owstusei? Na a leti fu a son di ben e opo kon? En baka nanga en skowru ben e bron en, fu di a ben pari a boto omeni yuru langa. A winti ben e wai en wiwiri èn a meki taki a Se fu Galilea seki srefisrefi. Bigi skwala ben e naki na a fesisei fu a fisiboto, èn a ben nati en petepete. Toku a tan pari a boto go doro.

Petrus nanga den mati fu en ben libi Yesus na baka en wawan, na wan presi na syoro. A dei dati den si fa Yesus gi dusundusun sma di ben abi angri, nyanyan. A du dati nanga wan tu brede nanga fisi nomo. Fu dati ede, den sma ben wani meki Yesus tron kownu, ma a no ben wani abi notinoti fu du nanga politiek afersi. Yesus ben abi a fasti bosroiti tu fu yepi den bakaman fu en fu no feti baka den sani dati. Fu wai pasi gi den ipi-ipi sma, a taigi den disipel fu en fu go na ini a boto èn fu pari go na a syoro na abrasei. Baka dati, a go en wawan na wan bergi fu begi.—Markus 6:35-45; Yohanes 6:14, 15.

Pikinmoro a ben de furu mun èn a mun ben tanapu hei na loktu, di den disipel go na ini a boto. Now a mun ben e saka safrisafri go na a west-sei. Ma den ben pari wan tu kilometer nomo. Den ben musu du tranga muiti fu tyari a boto èn a babari fu a winti nanga den skwala ben meki en muilek fu taki nanga makandra. Kande Petrus ben e prakseri sani na a ten dati.

A no de fu taki dati a ben abi furu sani fu prakseri! Moro leki tu yari kaba, a de wan bakaman fu Yesus fu Nasaret. A leri furu sani, ma a ben abi fu leri furu ete. A ben musu du tranga muiti ete so taki sani soleki a tweifri di a ben e tweifri èn a frede di a ben e frede, no tapu en fu leri moro. Toku a ben de klariklari fu du dati. Fu dati ede a de wan heri moi eksempre gi wi fu waka na baka. Meki wi go luku fa wi kan du dati.

„Wi feni a Mesias”!

Noiti Petrus ben o frigiti a dei di a miti Yesus fu Nasaret. En brada Andreas ben de a fosiwan di tyari a bigi nyunsu disi gi en: „Wi feni a Mesias.” Sensi a momenti disi Petrus libi bigin kenki. Noiti moro a ben o de a srefi.—Yohanes 1:41.

Petrus ben e libi na Kaperna-um, wan foto na a syoro fu wan meer di sma ben e kari a Se fu Galilea. Petrus nanga Andreas ben e wroko makandra nanga Yakobus nanga Yohanes, den manpikin fu Sebedeyus, na ini wan fisi bisnis. Petrus no ben e libi nanga en wefi wawan na ini wan oso, ma sosrefi nanga a mama fu en wefi èn nanga en brada Andreas. A no de fu taki dati fu sorgu gi so wan osofamiri nanga wan fisiwroko, wani taki dati den ben musu wroko tranga, èn den ben musu sabi fa fu lusu problema. Wi kan frustan omeni neti langa den man disi ben musu wroko tranga, fu trowe den nèt na mindri tu boto èn fu hari den puru nanga ala den krakti fu si sortu fisi den kisi. Wi kan frustan tu taki na deiten den ben e wroko tranga fu poti den fisi aparti fu seri, fu nai den nèt èn krin den.

Bijbel e fruteri wi taki Andreas ben de wan disipel fu Yohanes a Dopuman. Wi kan de seiker taki Petrus ben e arki nanga ala en prakseri te en brada ben e fruteri en fu a boskopu fu Yohanes. Wan dei Yohanes sori Andreas, Yesus fu Nasaret, èn a taigi en: „Luku, a Pikin Skapu fu Gado!” Wantewante Andreas tron wan bakaman fu Yesus, èn a fruteri Petrus a bigi nyunsu disi fayafaya: A Mesias doro! (Yohanes 1:35-40) Baka di sma opo densrefi teige Gado na ini Eden, sowan 4000 yari na fesi, Yehovah Gado ben pramisi taki wan spesrutu sma ben o kon di ben o tyari trutru howpu kon gi libisma (Genesis 3:15). Andreas miti a Frulusuman disi, iya, a miti a Mesias! Petrus go esi-esi fu miti Yesus tu.

 Teleki a dei dati, sma ben sabi Petrus leki Simon noso Simeon. Ma Yesus luku en èn a taki: „’Yu na Simon, a manpikin fu Yohanes; yu o nen Seifas’, (na ini Grikitongo a nen na Petrus)” (Yohanes 1:42). „Seifas” na wan wortu di wani taki „ston” noso „bigi ston”. Soleki fa a sori, dan den wortu fu Yesus ben de wan profeititori. A ben si na fesi taki Petrus ben o tron leki wan bigi ston, iya, a ben o tanapu kánkan sondro fu degedege, èn ben o abi furu krakti tapu den bakaman fu Krestes. Ma Petrus ben e si ensrefi so? A gersi leki dati no de so. Srefi sma di e leisi den Evangelietori na ini a ten disi, no e si Petrus leki wan bigi ston. Son sma taki dati a ben e degedege, èn a no ben de seiker fu ensrefi.

Petrus ben abi swakifasi, èn Yesus ben e si dati. Ma neleki en Papa, Yehovah, ala ten Yesus ben e luku den bun fasi fu sma. Yesus ben si taki Petrus ben abi bun fasi èn a ben e suku fu yepi en sori den fasi dati moro bun. Na ini a ten disi, Yehovah nanga en Manpikin e luku den bun fasi fu wi tu. Kande wi e feni en muilek fu bribi taki den e si bun fasi na ini wi tu. Ma wi musu abi a frutrow taki trutru den e si bun fasi na ini wi èn neleki Petrus wi musu sori taki wi de klariklari fu teki leri èn fu tyari kenki kon.—1 Yohanes 3:19, 20.

„No frede moro”

A kan taki Petrus ben go nanga Yesus na wan tu fu den presi pe a ben e go preiki. Sobun, a kan de so taki a si a fosi wondru di Yesus du, di a meki watra tron win na wan trowfesa na ini Kana. Ma a sani di de moro prenspari na taki a yere fa Yesus ben e taki fu a tumusi moi boskopu fu a Kownukondre fu Gado, di e gi sma howpu. Toku, a ben gowe libi en èn a drai go baka na en fisi bisnis. Ma wan tu mun baka dati, Petrus miti Yesus baka, èn a leisi disi Yesus gi en a kari fu tan waka na en baka.

A neti di pasa, a wroko ben hebi gi Petrus fu di a wroko no ben gi noti. Ibri tron baka den fisiman ben trowe den nèt sondro taki den hari fisi. A no de fu taki dati Petrus du ala san a sabi èn a pruberi na ala sortu fasi fu kisi fisi. A ben trowe en nèt na difrenti presi na ini a meer pe fisi ben e beti. Sondro tweifri, neleki fa a de nanga furu fisiman, dan ten na ten Petrus ben winsi taki a ben man si na ini a trubu watra pe den fisi de, noso fa a ben kan meki den go na ini a nèt. A no de fu taki dati den prakseri dati ben kan meki en moro muilek gi en. Petrus no ben e go fisi fu bro en ede pikinso, ma a ben musu kisi fisi fu man sorgu gi sma. Te fu kaba, a doro syoro sondro fu kisi wán fisi. Toku den nèt ben musu krin. Sobun, di Yesus kon na en a ben e krin den nèt.

Wan ipi sma ben de lontu Yesus, èn den ben e poti ala den prakseri na san Yesus ben e taki. Fu di den sma ben de lontu en, meki Yesus go na ini a boto fu Petrus èn a aksi en fu pari a boto gowe pikinso fu a syoro. Komoto fu a boto, Yesus gi den sma leri èn den ben man yere en sten krin. Petrus ben arki nanga ala en prakseri, neleki den sma na syoro. Noiti a ben kon weri fu arki a moro prenspari sani fu san Yesus ben e preiki, èn dati na a Kownukondre fu Gado. A ben o de wan bigi grani fu yepi a Krestes panya a boskopu disi fu howpu na ini a heri kondre! Ma a ben o man du dati? Fa den ben o sorgu gi densrefi? Kande Petrus ben e prakseri a neti di pasa, di a no ben kisi notinoti.—Lukas 5:1-3.

Di Yesus kaba taki, a taigi Petrus: „Go pe a watra dipi, dan un musu saka den fisinèt fu unu go na ini a watra so taki unu kan kisi fisi.” Petrus ben e tweifri srefisrefi. A ben taki: „Leriman, heri neti wi wroko tranga èn wi no ben kisi noti, ma fu di yu e aksi dati, meki mi o saka den fisinèt go na ini a watra.” A no de fu taki dati Petrus no ben wani saka den nèt baka na ini a watra, spesrutu now di den fisi no e beti moro! Toku a du san Yesus taki èn a kan taki a taigi den fisiman na ini a tra boto fu du dati tu.—Lukas 5:4, 5.

Di Petrus e hari a nèt kon na ini, a firi fa a nèt hebi srefisrefi. A no ben man bribi di a firi taki a nèt ben kon moro hebi fu hari. A hari moro tranga èn fosi yu denki a ben si bun furu fisi di ben wunyuwunyu  na ini a nèt! Esi-esi a kari den man na ini a tra boto fu kon yepi en. Di den kon fu yepi, dan den si taki wán boto nomo no man tyari ala den fisi. Den lai ala den tu boto èn toku furu fisi ben tan abra ete. Den boto ben e suku fu sungu fu di den ben hebi tumusi. Petrus ben fruwondru srefisrefi. A ben si den wondru kaba di Yesus du, ma a leisi disi a wondru ben abi fu du nanga en! Yesus ben man meki srefi taki den fisi go na ini den nèt! Petrus bigin frede. A saka kindi na fesi Yesus èn a taki: „Mi Masra, komoto na mi fesi, bika mi na wan sondu sma.” Fa Petrus ben kan warti nofo fu de makandra nanga a Sma di gebroiki a makti fu Gado na a fasi dati?—Lukas 5:6-9.

Na wan switi fasi Yesus taki: „No frede moro. Now yu o bigin kisi sma libilibi” (Lukas 5:10, 11). Disi no ben de a ten fu tweifri noso frede. Petrus no ben abi reide fu tweifri na aladei sani soleki fu kisi fisi. A no ben abi reide fu frede tu taki a ben o meki fowtu èn taki a no bun nofo fu wroko makandra nanga Yesus. Yesus ben abi wan bigi wroko fu du, wan diniwroko di ben o abi krakti tapu libisma na ini a ten di e kon. A ben e dini wan Gado di ’de klariklari fu gi pardon’ (Yesaya 55:7). Yehovah ben o sorgu gi den sani di den abi fanowdu na ini den libi èn na ini na anbegi fu den.—Mateyus 6:33.

Neleki Yakobus nanga Yohanes, na so Petrus no draidrai fu du san Yesus taki. Bijbel e taki: „Den tyari den boto fu den go baka na syoro, dan den libi ala sani èn den go waka na en baka” (Lukas 5:11). Petrus ben poti bribi na ini Yesus èn sosrefi a Sma di seni en kon. Dati ben de a moro bun bosroiti di Petrus ben kan teki. Na ini a ten disi, Kresten de tu di e du tranga muiti fu no tweifri èn fu no frede moro, so taki den kan du diniwroko gi Gado. Na so fasi den Kresten disi e sori bribi neleki Petrus. A de wan bun sani ala ten fu poti wi frutrow tapu Yehovah.—Psalm 22:4, 5.

„Fu san ede yu bigin tweifri?”

Sowan tu yari baka di Petrus miti Yesus, dan a sani pasa di skrifi na a bigin fu na artikel disi. Soleki fa wi si, dan Petrus ben e pari en boto na a neti di a winti ben e wai bun tranga na tapu a Se fu Galilea. A no de fu taki dati wi no sabi sortu sani di ben pasa na fesi, Petrus ben e prakseri na a momenti dati. A ben kan prakseri fu someni difrenti sani! Kande a ben prakseri a ten di Yesus dresi a mama fu en wefi. Yesus ben hori a Bergitaki tu. Den sani di Yesus ben leri, èn den bigi wondru di a ben du, ben sori ibri tron baka taki en ben de a Sma di Yehovah frukisi, iya, en ben de a Mesias. A no de fu taki dati o moro den mun ben e pasa, o moro Petrus ben man wroko na den swakifasi fu en, soleki fu no frede èn fu no tweifri so furu moro. Yesus ben teki Petrus srefi fu de wan fu den 12 apostel fu en! Toku syatu baka dati, Petrus ben kon si taki a no ben kaba ete fu wroko na den swakifasi fu en, fu no frede èn fu no tweifri moro.

Fosi musudei doro, dan wantronso Petrus tapu fu pari a boto èn a go sidon leti-opo. Moro fara na  ini den skwala, a ben si wan sani e buweigi! A ben de a leti fu a munkenki di ben e skèin na tapu den bigi skwala? Nôno, a no ben kan de dati, fu di a sani no ben e sekiseki furu èn a ben tanapu leti-opo. A ben de wan sma! Iya, a ben de wan man èn a ben e waka na tapu a watra fu a se! Di a man kon moro krosibei, dan a ben gersi leki a ben o waka pasa den. Den disipel ben frede srefisrefi èn den ben denki taki na wan takru sani den si. Dan a man taki: „Abi deki-ati, na mi; no frede.” A ben de Yesus!—Mateyus 14:25-28.

Petrus piki en: „Masra, efu na yu, dan taigi mi fu waka na tapu a watra fu kon na yu.” A fosi sani di a ben wani du ben sori leki a abi deki-ati. Fu di Petrus ben breiti srefisrefi fu na aparti wondru disi, meki a ben wani du wan sani fu sori taki a abi bribi. A ben wani waka na tapu a watra tu. Na wan switi fasi Yesus taigi Petrus fu kon na en. Petrus kren abra a lanki fu a boto èn a go tanapu na tapu a watra fu a se di ben e seki go-kon. Prakseri fa Petrus ben musu firi di a si taki a ben man tanapu na tapu a watra sondro fu sungu. A ben musu fu fruwondru di a ben e waka go miti Yesus. Ma heri esi wan tra sani miti en.—Mateyus 14:29.

Petrus ben musu tan poti prakseri na Yesus. A ben de Yesus di gebroiki a krakti fu Yehovah, fu meki Petrus waka na tapu a watra. Èn Yesus ben du dati fu di Petrus ben poti bribi na ini en. Ma wan sani ben puru Petrus prakseri. Bijbel e taki: „Ma di Petrus si fa a bigi winti e wai, dan a kon frede.” Di Petrus fringi wan ai luku den skwala di ben e naki na a boto, èn di ben e meki skuma nanga watra wai go nanga a winti, dan a bruya. Kande a ben si kaba fa a ben o sungu leti drape. Di a bigin frede, dan a bigin lasi bribi. A man di Yesus ben kari a Bigi ston, fu di a ben o man tanapu kánkan sondro fu degedege, bigin sungu leki wan ston, fu di en bribi ben kon swaki. Petrus ben sabi swen, ma a no ben prakseri a sani dati now. A bari taki: „Masra, yepi mi!” Yesus langa en anu grabu en hori èn a hari en kon. Leti na a momenti dati, di den ben de ete na tapu a watra, Yesus leri Petrus a prenspari sani disi: „Yu no e bribi nofo. Fu san ede yu bigin tweifri?”—Mateyus 14:30, 31.

Luku taki Yesus ben aksi Petrus fu san ede a bigin tweifri. Te wan sma e tweifri, dan dati kan abi takru bakapisi gi en. Efu wi bigin tweifri, dan dati kan pori a bribi fu wi safrisafri. Wi musu tan meki tranga muiti, so taki dati no pasa nanga wi! Fa wi kan du dati? Na te wi e tan poti prakseri na den yoisti sani. Efu wi e tan poti prakseri na den sani di e meki wi frede, den sani di e meki wi lasi-ati, èn den sani di e puru wi prakseri na Yehovah nanga en Manpikin, dan wi sa tweifri moro nanga moro. Ma efu wi e tan poti prakseri na Yehovah nanga en Manpikin, na den sani di den ben du, den sani di den e du now, èn den sani di den o du gi den sma di lobi den, dan wi sa tan abi wan tranga bribi.

Di Petrus waka baka Yesus go na a boto, a si taki a bigi winti bigin saka. A Se fu Galilea kon tiri. Makandra  nanga den tra disipel, Petrus taki: „Yu na trutru a Manpikin fu Gado” (Mateyus 14:33). Di dei broko, Petrus ben musu fu de nanga tangi na ati. A leri fu no tweifri èn fu no frede moro. A no de fu taki dati a ben musu tyari furu kenki kon ete, fosi a ben kan tron a Kresten di de leki wan bigi ston, soleki fa Yesus ben taki na fesi. Ma Petrus ben abi a fasti bosroiti fu tan meki muiti èn fu tan go na fesi. Yu abi a fasti bosroiti fu du dati tu? Yu musu fu agri taki wi kan abi a srefi bribi leki Petrus.

[Prenki na tapu bladzijde 22, 23]

Yesus ben si den bun fasi fu a fisiman disi di ben abi sakafasi

[Prenki na tapu bladzijde 23]

„Mi Masra, mi na wan sondu sma”

[Prenki na tapu bladzijde 24]

„Di Petrus si fa a bigi winti e wai, dan a kon frede”