’Yehovah de santa, santa, santa’
Kon krosibei na Gado
’Yehovah de santa, santa, santa’
EFU yu ben musu gebroiki wán wortu nomo fu taki fa Yehovah Gado de, dan sortu wortu yu ben o gebroiki? Na ini a di fu aiti yari fosi Krestes, a profeiti Yesaya kisi wan fisyun pe a yere fa engel ben e gi glori na Yehovah. Den engel gebroiki wan wortu di e sori san na wan prenspari fasi fu En, èn dati na santafasi. A sani di Yesaya ben si èn yere musu meki wi kisi bigi lespeki gi Yehovah èn a musu meki wi kon moro krosibei na en. Te wi e poti prakseri na den wortu fu Yesaya 6:1-3, dan pruberi fu si yusrefi drape.
San Yesaya e si? A e taki: „Mi si Yehovah sidon na tapu wan hei kownusturu na wan hei presi” (vers 1). Fu taki en leti, Yesaya no e si a Moro Hei Masra nanga en eigi ai. Libisma ai no man si yeye. Bijbel e taki krin: „Noiti wan sma si Gado” (Yohanes 1:18). A sani di Yesaya e si na wan fisyun. * Ma a e si a fisyun so krin taki a no man bribi, èn a gersi leki na Yehovah srefi a si.
Baka dati, Yesaya kisi a grani fu si wan sani di kande nowan enkri tra sma si na ini wan fisyun. A e skrifi: „Den seraf-engel ben de tapusei fu en [Yehovah]. Ibriwan fu den ben abi siksi frei. Nanga tu frei den ben e tapu den fesi èn nanga tu frei den ben e tapu den futu. Nanga den tu tra frei den ben e frei lontu” (vers 2). Seraf-engel na engel di abi wan tumusi hei posisi. Yesaya na a wan-enkri Bijbel skrifiman di e taki fu den. Den seraf-engel e tanapu èn den de srekasreka fu go du iniwan sani di Gado wani den fu du. Den e tapu den fesi nanga den futu, fu sori lespeki gi Yehovah fu di den e si en leki wan bigi grani fu de krosibei fu en.
Boiti taki Yesaya no man bribi den sani di a e si, a no man bribi tu san a e yere. Leki wan singi grupu na hemel, den seraf-engel e opo den sten fu singi. Yesaya e skrifi: „A wan ben e taigi a trawan nanga wan tranga sten: ’Yehovah di e tiri den legre de santa, santa, santa’” (vers 3). A Hebrew wortu di vertaal nanga „santa” e sori taki wan sani krin èn taki a soifri. A wortu wani taki tu dati wan sma, noso wan sani „fri dorodoro èn taki a no abi noti fu du nanga sondu”. A kan taki den seraf-engel ben e tan singi baka makandra èn taki den singi a wortu „santa” dri leisi, fu sori taki Yehovah santa moro leki iniwan sma (Openbaring 4:8). Fu dati ede, wan fu den prenspari fasi fu en na santafasi. Yehovah soifri èn a krin dorodoro, èn a no abi nowan enkri fowtu.
Fu di wi sabi taki Yehovah santa, meki wi musu kon moro krosibei na en. Fu san ede? Tra fasi leki libisma tiriman di kan kisi krukafasi èn di kan bigin pina trawan, Yehovah no abi nowan enkri sondu. Sobun, a santafasi fu en e gi wi a dyaranti taki ala ten a o de a moro bun Tata, a moro reti-ati Tiriman, èn a moro bun Krutuman di no e teki sma sei. Wi kan abi ala frutrow taki Gado di santa dorodoro, no o meki wi firi sari noiti.
A bun fu leisi a pisi disi fu Bijbel na ini december
[Futuwortu]
^ paragraaf 2 A buku Inzicht in de Schrift e taki: „Te wan sma di no ben e sribi ben kisi wan fisyun fu Gado, dan dati ben e sori taki a sma si den sani dati di a ben de nanga en krin frustan. Bakaten a ben kan memre den sani di a ben si èn a ben kan taki fu den, noso a ben kan skrifi den nanga en eigi wortu.”—Yehovah Kotoigi tyari en kon na doro.
[Prenspari pisi na tapu bladzijde 26]
Fu di wi sabi taki Yehovah santa, meki wi musu kon moro krosibei na en
