FU MAN piki na aksi dati, dan wi o luku tu eksempre na ini Bijbel di e sori fa Gado strafu sma. Dati na a Frudu fu a ten fu Noa, èn a pori fu den Kanansma.

SANI DI SMA E TAKI: „Na ogri-ati Gado ben abi di a meki wan frudu kon di kiri ala libisma boiti Noa nanga en osofamiri.”

BIJBEL E TAKI: Gado e taki: „Mi no e prisiri te wan ogri sma e dede, ma mi e prisiri te wan ogri sma e drai en libi èn te a e tan na libi” (Esekièl 33:11). Sobun, di den ogri sma na ini a ten fu Noa kisi pori, dan Gado no ben breiti srefisrefi. Ma fu san ede a kiri den dan?

Bijbel e sori taki a strafu di Gado strafu ogri sma na ini owruten, na „wan eksempre gi den ogri sma fu sori den san o pasa nanga den te fu kaba” (2 Petrus 2:5, 6). Fa so?

A fosi sani, na taki Gado sori krin taki aladi a e hati en fu kiri sma, toku a e si te ogri sma e pina trawan èn a e aksi den frantwortu gi dati. Te fu kaba a o tyari wan kaba kon na ala kruktudu nanga pina.

A di fu tu sani, na taki den sani di Gado du na ini a ten di pasa, e sori taki a e warskow sma na wan lobi-ati fasi, fosi a strafu den. Noa ben de wan preikiman fu retidu, ma furu sma no ben e arki en. Bijbel e taki: „Den no ben poti prakseri na san ben e pasa, teleki a frudu kon èn a wai den alamala puru.”​—Mateyus 24:39.

A de so taki Gado tan warskow sma? Iya. Fu eksempre, a warskow en pipel Israel taki efu den ben o du ogri neleki den pipel na den lontu, dan a ben o meki feanti broko kon na ini a kondre fu den, den ben o pori a mamafoto Yerusalem èn den ben o tyari den go na ini katibo. Toku Israel du ogri, èn den tyari pikin leki ofrandi srefi. Yehovah du wan sani na a tori disi? Iya. Ma fosi a du wan sani, a seni den profeiti fu en ibri tron baka fu go warskow a pipel fu kenki den fasi fu den, fosi a ben lati tumusi. A ben taigi den srefi: „A Moro Hei Masra Yehovah no sa du noti, fosi a tyari den kibritori fu en kon na krin gi den futuboi fu en, den profeiti.”​—Amos 3:7.

SAN A TORI DISI ABI FU DU NANGA YU: A e gi wi howpu te wi e luku a fasi fa Yehovah strafu sma  na ini owruten. Wi kan abi a frutrow taki Gado o strafu den ogri-ati sma di e pina trawan. Bijbel e taki: „Gado o kiri den ogri sma . . . Ma den safri-ati sma o kisi grontapu èn den o prisiri srefisrefi, fu di freide o de pasa marki” (Psalm 37:9-11). Ma fa yu e denki fu wan strafu di o tyari wan kaba kon na pina? A sani disi e sori taki Gado abi ogri-ati noso taki a abi sari-ati?

SANI DI SMA E TAKI: „A pori fu den Kanansma na wan ogri-ati sani di yu kan gersi nanga a kiri di srudati e kiri ipi-ipi sma na ini a ten disi.”

BIJBEL E TAKI: „Ala ten [Gado] e du san reti. A de wan Gado di de fu frutrow. A no e du kruktudu” (Deuteronomium 32:4). Te Gado e strafu sma, dan wi no kan gersi dati nanga orloku fu libisma. Fu san ede? Fu di libisma no sabi san de na ini sma ati, ma Gado sabi dati.

Fu eksempre, di Gado krutu den foto Sodom nanga Gomora taki a o pori den, dan a reti-ati man Abraham ben e broko en ede efu Gado ben abi leti fu du dati. A no ben man frustan taki a reti-ati Gado fu en ben o „kiri den reti-ati sma makandra nanga den ogriwan”. Nanga pasensi Gado gi en a dyaranti taki srefi efu tin reti-ati sma nomo ben de na ini Sodom, a no ben o pori a foto fu den sma dati ede (Genesis 18:20-33). A de krin taki Gado ben ondrosuku na ati fu den sma dati èn a si taki den ben ogri dorodoro.​—1 Kroniki 28:9.

Na a srefi fasi Gado krutu den Kanansma èn a ben abi leti di a meki sma pori den. Den Kanansma ben de wan ogri-ati pipel èn den ben e bron den pikin fu den libilibi na ini faya, leki ofrandi (2 Kownu 16:3). * Den Kanansma ben sabi taki Yehovah ben taigi den Israelsma fu teki a heri kondre abra. Den sma di ben bosroiti fu tan na ini a kondre èn fu feti nanga den Israelsma, no ben opo densrefi teige den Israelsma nomo, ma sosrefi teige Yehovah di ben sori krin taki a ben e horibaka gi en pipel.

Boiti dati, Gado sori sari-ati gi den Kanansma di ben tapu nanga den ogri fu den èn di ben e hori densrefi na den bun wèt fu Yehovah. Fu eksempre, Rakab, a huru-uma fu Kanan, kisi kibri makandra nanga en osofamiri. Boiti dati, di den sma fu a Kanan foto Gibeon begi a pipel fu Gado fu abi sari-ati nanga den, dan den nanga ala den pikin fu den kisi kibri.​—Yosua 6:25; 9:3, 24-26.

SAN A TORI DISI ABI FU DU NANGA YU: Wi kan leri wan prenspari sani fu a strafu di den Kanansma kisi. Dei fu dei wi e kon moro krosibei fu a dei te Gado „o krutu den ogri sma èn pori den” (2 Petrus 3:7). Efu wi lobi Yehovah, wi o kisi wini te a o puru den wan na grontapu di e weigri fu saka densrefi na ondro a bun tiri fu en. Na so a o tyari wan kaba kon na pina.

Yehovah e memre wi na wan lobi-ati fasi taki den bosroiti di papa nanga mama e teki sa abi krakti tapu den pikin fu den. Gado Wortu e taki: „Grantangi, teki a libi, dan unu nanga un bakapikin o tan na libi. Unu o tan na libi efu unu lobi Yehovah un Gado, efu unu arki en sten, èn efu unu e tai hori na en” (Deuteronomium 30:19, 20). Yu denki taki den wortu disi e komoto fu wan ogri-ati Gado noso fu wan Gado di lobi sma èn di wani taki den teki a yoisti bosroiti?