Mi kan memre ete fa mi ben de koloku leki pikin meisje. Mi ben e libi nanga mi papa nanga mama na ini wan pikin oso na wan boitipresi na a zuidsei fu Fransikondre. Mi papa ben meki wan skomru gi mi èn mi ben lobi lon prei na ini a dyari. Na ini 1966, Yehovah Kotoigi kon na wi oso èn den ben abi langa takimakandra nanga mi papa. Seibi mun baka dati, a bosroiti fu tron wan Kotoigi. Syatu baka dati, mi mama teki na eksempre fu en èn mi gro kon bigi na ini wan osofamiri pe lobi ben de.

Den problema fu mi bigin syatu baka di wi drai go baka na Spanyorokondre, pe mi papa nanga mama gebore. Mi bigin firi wan pen na ini mi anu nanga mi aifutu. A ben de neleki wan sani ben e sutu mi. Baka di den tyari mi go na difrenti datra tu yari langa, dan wi feni wan bun datra di ben e dresi sma di abi reuma. A datra dati taigi mi nanga wan seryusu sten: „Mi no man du noti moro gi yu.” Mi mama bigin krei. Ne a datra taigi mi papa nanga mama taki mi abi artritis di e meki taki den skrufu fu mi skin e hati mi. Mi no ben e frustan ala sani, fu di mi ben abi tin yari nomo, ma mi ben sabi taki wan sani no ben bun.

A datra taigi wi taki mi ben musu go na wan pikin-nengre ati-oso fu feni yepi. Di mi doro drape, dan mi bigin frede di mi si fa a presi ben gersi wan strafu-oso. Den ben abi wan lo wèt: Den non koti mi wiwiri èn den weri wan fositen uniform gi mi. Mi ben wani krei èn mi aksi misrefi: ’Fa mi o man tan dya?’

Fu di mi papa nanga mama ben leri mi fu dini Yehovah, meki mi weigri fu teki prati na den Lomsu gwenti na ini na ati-oso. Den non no ben man frustan fu san ede mi no ben wani du dati. Mi begi Yehovah fu no libi mi, èn heri esi mi firi fa a ben e kibri mi. A ben de neleki te wan papa e brasa en pikin hori na wan lobi-ati fasi.

Mi papa nanga mama ben mag kon luku mi syatu ibri satra. Den tyari Bijbel buku gi mi fu leisi, so taki a bribi fu mi no ben e kon swaki. Nofo tron den pikin no ben mag abi den eigi buku, ma den non gi mi primisi fu hori den buku fu mi, sosrefi mi Bijbel,  di mi ben e leisi ibri dei. Mi fruteri den tra meisje tu fu a howpu di mi abi fu libi fu têgo na ini a Paradijs na grontapu, pe nowan sma o siki moro (Openbaring 21:3, 4). Son leisi mi ben e firi sari èn mi ben e firi leki mi de mi wawan, ma toku mi ben breiti taki a bribi nanga a frutrow di mi ben abi na ini Yehovah ben e kon moro tranga.

Baka siksi mun, den datra seni mi go na oso. Mi ben e siki ete, ma mi ben breiti taki mi ben de baka nanga mi papa nanga mama. Den skrufu fu mi skin ben e hati mi moro tu. Na a ten di mi ben de wan tini, mi ben swaki srefisrefi. Toku mi teki dopu di mi ben abi 14 yari, èn mi ben abi a fasti bosroiti fu du ala san mi man fu dini mi hemel Tata. Ma son leisi mi ben e firi leki a no ben e yepi mi. „Fu san ede na mi musu siki? Dresi mi, grantangi”, na so mi ben e begi. „Yu no e si fa mi e pina?”

Di mi ben e kon moro bigi, dan a ben hebi srefisrefi gi mi. Mi ben musu frustan taki mi no ben o kon betre moro. Toku son leisi, mi ben e teki misrefi gersi nanga den mati fu mi. Den ben de so gosontu èn den ben e nyan bun fu a libi. Mi ben e firi leki mi no warti noti, èn mi bigin syensyen. Ma mi famiri nanga den mati fu mi ben e yepi mi. Mi e memre wan bun mati fu mi ete. A nen Alicia èn a ben owru 20 yari moro mi. A yepi mi fu no sidon prakseri a siki fu mi, ma fu poti prakseri na tra sma, na presi fu tan luku mi eigi problema.

Di mi ben abi 18 yari, dan a siki meki mi kon swaki srefisrefi, èn mi ben e weri te mi ben e go na den konmakandra. Toku mi gebroiki ala a ten di mi ben abi na oso fu studeri Bijbel finifini. A buku Yob nanga Psalm yepi mi fu frustan taki a no ala ten Yehovah e kibri wi gi siki nanga ongoloku, ma taki a e gi wi a deki-ati di wi abi fanowdu. Fu di mi ben e begi doronomo, meki mi kisi „a krakti di bigi pasa marki” èn sosrefi „a freide fu Gado di bigi moro iniwan sani di libisma man frustan”.—2 Korentesma 4:7; Filipisma 4:6, 7.

Di mi ben abi 22 yari, dan mi ben musu frustan taki mi ben o abi fu gebroiki wan rolsturu. Mi ben frede taki sma no ben o poti prakseri moro na mi èn taki den ben o si soso wan rolsturu nanga wan siki uma na ini. Ma a rolsturu meki taki mi no ben abi trawan fanowdu moro gi ala sani, èn a sani di mi ben e si leki wan „fluku” kon tron wan blesi. Wan mati fu mi di nen Isabel gi mi deki-ati fu wroko 60 yuru makandra nanga en na ini a preikiwroko. A taigi mi fu pruberi dati wán mun nomo.

Na a bigin, mi ben denki taki a sani dati no ben o man srefisrefi. Ma mi aksi Yehovah fu yepi mi, èn fu di mi famiri nanga mi mati horibaka gi mi, meki mi ben man du en. A mun dati pe mi ben abi furu fu du pasa esi-esi, èn mi kon si taki mi no ben e frede moro èn mi no ben e syen moro tu. Mi ben lobi a wroko so te, taki na ini 1996 mi bosroiti fu tron wan gewoon pionier. Mi ben e wroko 90 yuru ibri mun na ini a preikiwroko. Dati ben de wan fu den moro bun bosroiti di mi ben teki, fu di a tyari mi kon moro krosibei na Gado èn a meki taki mi skin ben kon moro krakti. Fu di mi ben e teki prati na a preikiwroko, meki mi ben man fruteri furu sma fu a bribi fu mi èn mi ben man yepi son sma fu tron Gado mati.

Na ini 2001, mi kisi mankeri èn mi broko ala tu futu. Mi ben abi hebi pen di mi ben e didon na ati-oso. Mi begi Gado fayafaya: „Grantangi Yehovah, no libi mi!” Na a momenti dati, wan uma di ben e didon na ini wan bedi krosibei fu mi, aksi mi: „Yu na wan Yehovah Kotoigi?” Mi ben swaki tumusi fu piki en, sobun mi seki mi ede nomo. „Mi sabi unu! Mi gwenti leisi den tijdschrift fu unu”, na so na uma taki. Den wortu dati ben de wan bigi trowstu gi mi. Aladi a no ben e go bun nanga mi, toku mi ben man fruteri sma fu Yehovah. Dati ben de wan grani trutru!

Di mi ben e firi pikinso moro betre, dan mi bosroiti fu preiki gi moro sma. Mi mama ben e rèi mi lontu na ini na ati-oso aladi den tu futu fu mi ben de na ini gips. Ibri dei, wi ben e go na wan tu siki sma, wi ben e aksi den fa a ben go nanga den, èn wi ben e gi den wan tu Bijbel buku. Mi ben e weri  srefisrefi te mi ben e go na den sma, ma Yehovah gi mi a krakti di mi ben abi fanowdu.

Na ini den yari di pasa, mi kisi moro hebi pen èn mi firi moro sari tu fu di mi papa dede. Toku mi e pruberi fu abi wan bun denki fu sani. Fa so? Te mi man, dan mi e pruberi fu de makandra nanga mati èn nanga famiriman, èn dati e yepi mi fu no tan prakseri den problema fu mi. Te mi de mi wawan, mi e leisi, mi e studeri Bijbel, noso mi e preiki gi trawan nanga yepi fu telefon.

Mi e pruberi tu fu prisiri nanga pikinpikin sani, soleki te a winti e wai na ini mi fesi, noso te mi e smeri den bromki. Den sani disi e meki taki mi de nanga tangi. Mi lobi lafu tu, èn a sani dati na wan bigi yepi. Wan dei, di mi ben de na ini a preikiwroko, dan wan mati fu mi di ben e pusu a rolsturu tan tanapu fu skrifi wan sani. Wantronso mi bigin lolo gowe, teleki mi go naki wan wagi di ben e tanapu moro fara. Wi ala tu skreki, ma di wi si taki mi no kisi mankeri, dan wi bari lafu.

Furu sani de di mi no man du. Mi e si den sani dati leki winsi di musu kon tru ete. Nofo tron mi e tapu mi ai, dan mi e prakseri fa a sa de na ini a nyun grontapu di Gado pramisi (2 Petrus 3:13). Mi e si kaba fa mi de gosontu, èn fa mi e waka lontu e nyan bun fu a libi. Mi e bribi den wortu disi fu Kownu David: „Frutrow tapu Yehovah. Abi deki-ati èn no frede” (Psalm 27:14). Aladi mi skin e kon swaki moro nanga moro, toku Yehovah tranga mi. Mi e tan kisi krakti aladi mi swaki.