YOSEF e waka na ini a gadri fu a strafu-oso èn en heri skin e lon sweti fu di a wroko tranga na ini a faya son. Dorosei a son ben faya so te taki a strafu-oso ben gersi wan onfu. A gersi leki Yosef ben sabi ala uku fu a strafu-oso. A no ben sabi no wan tra presi leki strafu-oso. A tru taki den sma drape ben abi furu lespeki gi en. Ma toku, a ben de wan strafuman.

A ben musu fu de so taki a ben gwenti prakseri a ten di a ben e libi na ini a bergi kontren fu Hebron, pe a ben e sorgu gi den skapu fu en papa. A ben abi sowan 17 yari di en papa, Yakob, ben seni en fu go du wan boskopu omeni kilometer moro fara fu oso. A gersi leki noiti moro a o man de so fri baka. Den brada fu Yosef di ben dyarusu na en tapu ben abi so furu bita-ati gi en taki den ben wani kiri en. Ma te fu kaba den seri en leki srafu. Den tyari en go na Egepte, èn drape a ben e wroko fosi na ini a oso fu Potifar, wan heihei man fu Egepte. Yosef en masra Potifar ben e frutrow en, ma di a wefi fu en lei gi Yosef taki a ben wani didon nanga en, dan Yosef doro na strafu-oso. *—Genesis, kapitel 37, 39.

Yosef abi 28 yari now, èn sowan tin yari kaba a de wan srafu èn a de na strafu-oso. Fu taki en leti, en libi no ben waka soleki fa a ben howpu. Wan dei o kon taki den lusu en? A o si en lobi papa baka noso en lobi pikin brada Benyamin? O langa a ben o abi fu tan na ini na strafu-oso disi?

Oiti yu firi leki Yosef? Son leisi, a libi e waka heri tra fasi leki fa wi ben fruwakti di wi ben yongu. Kande a gersi leki wan muilek situwâsi e go nanga langa, èn a muilek gi wi fu komoto na ini, noso fu horidoro. Meki wi go luku san wi kan leri fu a bribi fu Yosef.

Yosef ben sabi taki a Gado fu en, Yehovah, noiti no ben frigiti en, èn a no de fu taki dati a sani dati yepi en fu horidoro. Aladi a ben de na strafu-oso na ini wan tra kondre, toku Yehovah ben feni fasi fu blesi Yosef. Bijbel e taki: „Yehovah ben de nanga Yosef ala ten. A tan sori en taki a ben e tai hori na en, fu di a lobi en èn a meki taki na edeman fu a strafu-oso kon lobi Yosef” (Genesis 39:21-23). Yosef ben e tan wroko tranga, èn na so a tan gi a Gado fu en okasi fu blesi en. A ben musu fu de wan trowstu gi en fu sabi taki ala ten Yehovah ben de nanga en.

Yehovah ben o meki Yosef tan na ini a strafu-oso dati fu ala ten? Yosef no ben sabi, èn a no de fu taki dati a tan begi Gado fu a tori disi. Soleki fa a e pasa furu tron, Gado piki a begi fu en na wan fasi di a no ben fruwakti. Wan dei, wan dyugudyugu ben de na ini a strafu-oso fu di tu nyun strafuman ben kon. Den ben de heihei man di ben e wroko gi Kownu. Wan fu den ben de na edeman fu den bakriman èn a trawan ben de na edeman fu den sma di ben e kanti win.—Genesis 40:1-3.

Na edeman fu den waktiman fu Kownu ben gi Yosef a frantwortu fu luku den man disi di fosi ben  de heihei man. * Wan neti, den tu man disi kisi wan dren di den no ben man frustan. Di Yosef si den na mamanten, a ben kan si taki wan sani ben e trobi den. Dati meki a aksi den: „Fu san ede un fesi de so sarisari tide?” (Genesis 40:3-7) Kande na fu di Yosef ben sori switifasi gi den man disi, meki den taigi en san ben de a problema. Yosef no ben sabi, ma a takimakandra dati ben o tyari wan kenki kon na ini en libi. Yu denki taki den man ben o taki nanga Yosef efu a no ben sori taki a ben broko en ede nanga den? Kande a sani disi e meki yu aksi yusrefi: ’A bribi di mi abi na ini Gado e meki taki mi e broko mi ede nanga tra sma?’

Den tu man fruteri taki den no ben man frustan san den dren fu den ben wani taki, èn den no ben abi wan sma di ben kan fruteri den dati. Dren ben prenspari srefisrefi gi den Egeptesma èn den ben gwenti suku yepi na den man di ben feni taki den ben man fruklari den. Den tu man no ben sabi taki den dren fu den ben komoto fu Yehovah, a Gado fu Yosef. Ma Yosef ben sabi dati. A trowstu den nanga den wortu disi: „A no Gado e tyari dren kon na krin? Grantangi, fruteri mi san unu dren” (Genesis 40:8). Den wortu fu Yosef prenspari ete gi ala sma di e ondrosuku Bijbel finifini. A ben o bun efu ala sma di e bribi na ini Gado ben o sori sakafasi neleki Yosef! Noiti wi musu frutrow tapu wi eigi denki, ma wi musu frutrow tapu Gado te wi e suku fu kon frustan en wortu.—1 Tesalonikasma 2:13; Yakobus 4:6.

A man di ben e kanti win bigin fruteri fosi. A fruteri Yosef taki a ben dren fu wan droifibon di ben abi dri taki di ben e gi omeni bosu droifi. Di den droifi kon lepi, dan a man kwinsi a watra fu den na ini a kan fu a kownu. Tangi fu Yehovah, meki Yosef ben sabi wantewante san a dren ben wani taki. A taigi a man taki den dri taki na dri dei. Baka dri dei, a kownu ben o gi a man disi en wroko baka. Di Yosef si taki a man disi breiti, dan a aksi en a sani disi: „Mi e begi yu, sori mi taki yu tai hori na mi, fu di yu lobi mi. Fruteri Kownu fu mi.” Yosef taigi a man disi taki den ben fufuru en tyari gowe èn taki den ben poti en na strafu-oso sondro taki a ben du wan ogri.—Genesis 40:9-15.

Fu di a bakriman ben si taki a nyunsu di Yosef ben gi a man di ben kanti win ben de bun nyunsu, meki a aksi Yosef san a dren fu en ben wani taki. A ben dren fu dri baskita nanga brede èn fu fowru di ben e nyanyan den sani na ini a baskita na tapu en ede. Yosef fruteri en tu san a dren fu en ben wani taki. Ma a no ben abi bun nyunsu gi a  bakriman. Yosef taigi en: „Disi na san a dren wani taki: Den dri baskita na dri dei. Ete dri dei, dan Kownu o koti yu ede puru, dan a o anga yu dedeskin na wan postu èn den fowru o nyan a meti na yu skin” (Genesis 40:16-19). Neleki ala den reti-ati futuboi fu Gado, Yosef no ben frede fu fruteri den boskopu fu Gado. A fruteri a bun nyunsu èn sosrefi a nyunsu taki sma ben o kisi krutu.—Yesaya 61:2.

Dri dei baka dati, den wortu fu Yosef kon tru. A kownu ben hori en friyari-oso, wan sani di a pipel fu Gado na ini Bijbel ten no ben e du. A dei dati a kiri a bakriman, ma a gi man di ben e kanti win a wroko fu en baka. A sari taki a man disi frigiti Yosef.—Genesis 40:20-23.

Tu langa yari pasa (Genesis 41:1). Prakseri fa a pisi ten dati ben muilek gi Yosef. Kande a ben kon abi moro howpu baka di Yehovah yepi en fu frustan san a dren fu den tu man ben wani taki. Kande ibri dei baka dati, Yosef ben e wiki nanga a howpu taki den ben o lusu en a dei dati. Ma na a kaba fu a dei a ben e si taki a strafu-oso libi fu en ben e go doro. Kande den tu yari dati ben de den moro hebiwan gi Yosef. Toku a no lasi frutrow noiti na ini Yehovah, a Gado fu en. Na presi taki a lasi-ati, a bosroiti fu horidoro èn a bribi fu en kon moro tranga srefi.—Yakobus 1:4.

Na ini den muilek ten disi wi alamala musu leri fu horidoro. Fu man pasa den hebi tesi fu a libi, wi musu horidoro, wi musu abi pasensi, èn wi musu abi wan korostu firi di Gado wawan kan gi wi. Neleki fa a du gi Yosef, na so a kan yepi wi fu no lasi-ati èn fu no lasi a howpu fu wi.—Romesma 12:12; 15:13.

Awansi a man di ben e kanti win ben frigiti Yosef, toku Yehovah noiti no frigiti Yosef. Wan neti, a meki Kownu kisi tu dren di a no ben man frigiti. Na ini a fosi dren, a kownu si seibi moi fatu kaw di ben opo komoto na ini Nijl-liba, èn baka dati seibi takru mangri kaw opo komoto tu na ini a liba. Den mangri kaw bigin nyan den fatuwan. Bakaten, a kownu dren fa seibi taki nanga bun aleisi ben e gro na wán tiki. Ma baka dati, a si fa ete seibi kruwa taki nanga aleisi, gro kon èn den bigin swari den taki nanga bun aleisi. Na mamanten, Kownu wiki èn fu di den dren fu en bigin trobi en, meki a kari ala den koniman nanga bonuman kon fu fruklari den gi en. Nowan fu den ben man du dati (Genesis 41:1-8). Kande den no ben sabi san fu taki, noso kande den ben e taki ala sortu sani, wi no sabi seiker. Ma san wi sabi, na taki den no ben man yepi a kownu. A sani dati meki taki a ben wani sabi nomonomo san den dren ben wani taki.

Te fu kaba, a man di ben e kanti win memre Yosef! A konsensi fu en ben trobi en. A fruteri Kownu fu a koni yonkuman na strafu-oso, di tu yari na fesi ben fruklari soifri gi en san a dren fu en èn a di fu a bakriman ben wani taki. Wantewante Kownu seni kari Yosef na strafu-oso.—Genesis 41:9-13.

Prakseri fa Yosef ben e firi di den boskopuman fu Kownu kon taigi en taki Kownu ben seni kari en. A kenki krosi esi-esi èn a puru en barba. A kan taki a piri en heri ede, fu di dati ben de wan gwenti fu den Egeptesma. A no de fu taki dati a begi fayafaya taki Yehovah ben o meki sani waka bun gi en te a ben o taki nanga Kownu. Syatu baka dati, a ben e tanapu na fesi Kownu na ini a bigi kownu-oso. Bijbel e taki: „Ne Kownu taigi Yosef: ’Mi dren wan dren, ma nowan sma de fu fruklari en gi mi. We, mi yere taki na fruteri sma musu fruteri yu wan dren nomo, dan yu man fruklari en kaba.’” A fasi fa Yosef piki e sori baka taki a ben abi sakafasi èn taki a ben e bribi na ini a Gado fu en: „A no mi musu kisi a grani! Na Gado o taki efu sani o waka bun gi Kownu.”—Genesis 41:14-16.

Yehovah lobi sma di abi sakafasi èn di e gi yesi na en. Dati meki wi kan frustan taki a gi Yosef a piki di den koniman nanga den priester no ben man gi. Yosef fruklari taki den tu dren fu a kownu ben wani taki a srefi sani. A kownu ben dren a srefi sani tu leisi, fu di Yehovah ben wani sori taki a sani dati ’ben o pasa trutru’. Den fatu kaw nanga den bun taki aleisi ben wani taki dati seibi yari langa bun furu nyanyan ben o de na ini Egepte. Ma den mangri kaw nanga den kruwa taki aleisi ben wani taki dati baka den seibi yari fu bogobogo nyanyan,  seibi yari fu angriten ben o de. Na angriten dati ben o hebi srefisrefi.—Genesis 41:25-32.

A kownu ben sabi taki Yosef ben fruklari den dren na a yoisti fasi. Ma san a ben o du? Yosef gi en rai san fu du. Kownu ben musu feni wan man „di koni èn di sabi sani”. A ben musu gi en a frantwortu fu tyari ala a nyanyan di ben tan abra kon na wán na ini maksin. A ben musu du dati na ini den seibi yari te nyanyan ben o lai. Baka dati den ben musu prati a nyanyan dati gi sma te na angriten ben o de (Genesis 41:33-36). Yosef ben abi nofo ondrofeni nanga koni fu du a wroko disi, ma a no pusu ensrefi go na fesi. Wan sakafasi man leki en noiti no ben o prefuru fu du dati, èn fu di a ben abi bribi, meki a no ben abi fu du dati tu. Te wi e bribi na ini Yehovah, dan wi no o feti fu kisi grani noso fu meki bigi gi wisrefi. Wi o man abi wan korostu firi fu di wi e libi sani gi Yehovah.

A kownu nanga ala den futuboi fu en si taki Yosef ben gi den wan koni rai. Kownu sori tu taki a ben bribi taki na a Gado fu Yosef ben yepi en fu taki den koni sani dati. A taigi den futuboi na ini a kownu-oso: „Wi o man feni wan tra man di abi a yeye fu Gado, neleki a man disi?” A taigi Yosef: „Fu di Gado meki yu kon sabi ala den sani disi, meki nowan tra man de di koni leki yu èn di sabi sani leki yu. Yu o abi a frantwortu fu mi oso èn a heri pipel fu mi o du ala san yu taki. Na mi wawan o abi moro makti leki yu, fu di mi na kownu.”—Genesis 41:38-41.

A kownu du san a pramisi. Syatu baka dati, den weri moi krosi gi Yosef. Kownu gi en wan gowtu keti, wan linga di a ben e gebroiki leki stampu, wan kownuwagi, èn ala a makti fu go na ini a heri kondre fu du san a ben taki (Genesis 41:42-44). Na ini wan-enkri dei nomo, Yosef komoto na strafu-oso fu go libi na ini a kownu-oso. A wiki leki wan strafuman, ma a go sribi leki a moro makti tiriman baka Kownu. A de krin taki a bribi di Yosef ben abi na ini Yehovah no ben de fu soso. Yehovah ben si ala den takru sani di ben pasa nanga a futuboi fu en na ini den yari na fesi. A poti prakseri na den sani dati na a yoisti ten èn na a yoisti fasi. Yehovah no ben wani frulusu Yosef wawan, ma a ben wani kibri a heri pipel Israel. Wi o si fa a du dati na ini wan tra artikel di o kon.

Efu yu de na ini wan muilek situwâsi, kande sma e du ogri nanga yu omeni yari kaba, dan no lasi-ati. Prakseri Yosef. Fu di a tan sori switifasi, a tan sori sakafasi, a tan horidoro, èn a tan sori bribi, meki a gi Yehovah okasi fu blesi en te fu kaba.