1. Yini umuntfu lomusha lokufanele ayihlele ngelikusasa lakhe, futsi kungani loko kungakafanele kumkhatsate kakhulu? (Buka sitfombe lesisekucaleni kwalesihloko.)

NINE labasha nitawuvuma kutsi ngaphambi kwekube uye endzaweni letsite, kukuhlakanipha kucale uhlele kutsi utawuya kuphi. Kuphila kufana neluhambo, futsi sikhatsi lesikahle sekuhlela kutsi nitakwentani nasenikhulile kunyalo nisebancane. Liciniso, kuhlela tintfo lofuna kutenta akusimelula. Lenye intfombatane lokutsiwa nguHeather itsi: “Kuyintfo lesabekako. Kufanele utsatse sincumo saloko lofuna kukwenta kuphila kwakho konkhe.” Nobe kunjalo, kufanele ube nesibindzi. Jehova utjela bantfu bakhe utsi: “Ngako-ke ungesabi, ngobe mine nginawe; ungajabhi, ngobe mine nginguNkulunkulu wakho. Ngitakucinisa ngikusite.”​—Isa. 41:10.

2. Wati njani kutsi Jehova ufuna kutsi utibekele umgomo lotakujabulisa?

² Jehova ukucela kutsi ulihlele kahle likusasa lakho. (Shu. 12:1; Mat. 6:20) Ufuna kutsi ujabule. Buhle bendalo, imisindvo lemnandzi kanye netintfo letimnandzi lotinambitsako tifakazela kutsi ufuna ujabule. Cabanga futsi nangendlela lasinakekela ngayo aphindze asifundzise nendlela lekahle yekuphila. Naku lakushoko Jehova kulabo labangasifuni seluleko sakhe, utsi: “Nakhetsa loko lokungangijabulisi. . . . Tinceku tami tiyawujabula, kodvwa nine niyawuhlazeka, nijabhe. Tinceku tami tiyawuhlabela ngenca yekujabula lokuphuma etinhlitiyweni tato.” (Isa. 65:12-14) Jehova uyadvunyiswa nangabe bantfu  benta tincumo letihlakaniphile ekuphileni.​—Taga 27:11.

3. Yini Jehova lafuna kutsi uyente?

³ Ngumiphi imigomo Jehova lafuna kutsi utibekele yona? Wadala bantfu kutsi bakujabulele kumati yena futsi bamkhonte ngekwetsembeka. (Hla. 128:1; Mat. 5:3) Loku kwehlukile etilwaneni latidala, ngoba tona tiphilela kudla, kunatsa tiphindze titalane. Nkulunkulu ufuna ujabulele kwenta tintfo letingetulu kwaleto letijatjulelwa tilwane. Umdali wakho ‘unguNkulunkulu welutsandvo,’ “Nkulunkulu lojabulako,” lowadala bantfu ‘ngemfanekiso wakhe.’ (2 Khor. 13:11; 1 Thim. 1:11; Gen. 1:27) Utawujabula nangabe ulingisa Nkulunkulu wetfu lositsandzako. Uke wakubona yini ekuphileni kwakho naku lokushiwo liBhayibheli nalitsi: “Kunenjabulo lenyenti ekupheni kunasekwemukeleni”? (Imis. 20:35) Leli liciniso lelisebaleni ngekuphila kwemuntfu. Ngako-ke, Jehova ufuna kutsi imigomo yakho ikhombise kutsi uyabatsandza labanye nekutsi uyamtsandza Nkulunkulu.​—Fundza Matewu 22:36-39.

4, 5. Yini leyenta Jesu wajabula?

⁴ Nine labasha Jesu Khristu wanibekela sibonelo lesihle. Ngesikhatsi asesengumtfwana bekadlala futsi ajabula. LiVi laNkulunkulu litsi kunesikhatsi “sekuhleka . . . nesikhatsi sekugidza.” (Shu. 3:4) Jesu waphindze wasondzelana naJehova ngekutsi atadishe imiBhalo. Nakaneminyaka lengu-12 budzala, bafundzisi lebebasethempelini bamangala ‘ngekucondza kwakhe’ imiBhalo “kanye netimphendvulo takhe.”​—Luk. 2:42, 46, 47.

⁵ Jesu wakhula waba ngumuntfu lojabulako. Yini leyamenta wajabula? Kuletinye tintfo letamjabulisa, bekukwati kutsi Nkulunkulu ufuna amemetele “tindzaba letimnandzi kulabaphuyile . . . nangekuvulwa kwemehlo alabatimphumphutse.” (Luk. 4:18) Kwenta loko Nkulunkulu bekamcele kutsi akwente, kwenta Jesu wajabula. Tihlabelelo 40:8 natichaza indlela lativa ngayo, titsi: “Nkulunkulu wami, kujabula kwami kusekwenteni intsandvo yakho.” Jesu bekakujabulela kufundzisa bantfu ngaBabe wakhe wasezulwini. (Fundza Lukha 10:21.) Ngemuva kwekufundzisa lomunye wesifazane ngekukhonta kweliciniso, Jesu watjela bafundzi bakhe watsi: “Kudla kwami kwenta intsandvo yaloyo longitfumile nekutsi ngicedze umsebenti wakhe.” (Joh. 4:31-34) Kutsandza Nkulunkulu kanye nekutsandza labanye bantfu kwenta Jesu wajabula. Nawe kungakujabulisa kwenta kanjalo.

6. Kuzuzisa ngani kucoca nemaKhristu lacala kuba ngemahlahlandlela asemasha?

⁶ EmaKhristu lamanyenti akujabulela kuba ngemahlahlandlela ngesikhatsi asemasha. Kungani ungacoci nalamanye awo ngemigomo lonayo? LiBhayibheli litsi: “Tinhloso atiphumeleli ngaphandle kweteluleko; kodvwa nangabe kunebeluleki labanyenti tiyakuphumelela.” (Taga 15:22) EmaKhristu lanjengalawa angakutjela kutsi umsebenti wasikhatsi sonkhe ungakuniketa imfundvo lengakuzuzisa kuphila kwakho konkhe. Ngemuva kwekufundziswa nguBabe wakhe ezulwini, Jesu wachubeka afundza ngesikhatsi enta umsebenti wekushumayela lamhlabeni. Sibonelo saloku kutsi, wafundza ngenjabulo loba nayo nawutsintsa tinhlitiyo talabanye ngetindzaba letimnandzi, kanye nenjabulo loyitfolako nawuchubeka wetsembeka nawuvivinywa. (Fundza Isaya 50:4; Heb. 5:8; 12:2) Ake sicoce ngaletinye tibusiso letingakujabulisa nawenta umsebenti wasikhatsi sonkhe.

7. Kungani linyenti lebantfu labasha likujabulela kwenta labanye bantfu bafundzi?

⁷ Jesu watsi: “Ngako-ke hambani, nente . . . bafundzi . . . nibafundzise.” (Mat. 28:19, 20) Nangabe uhlela kwenta umsebenti wekwenta bafundzi, utawube ukhetse kwenta umsebenti lojabulisako nalodvumisa Nkulunkulu. Njengayo yonkhe imisebenti, udzinga sikhatsi kuze ube nelikhono lekuwenta. Muva-nje,  lomunye umzalwane longuTimothy lowacala kuba lihlahlandlela ngesikhatsi asemusha, watsi: “Ngiyakutsandza kukhonta Jehova sikhatsi sonkhe ngobe nguleyo indlela lengikhombisa ngayo kutsi ngiyamtsandza. Ekucaleni, bekute bantfu lebengifundza nabo liBhayibheli, kodvwa kamuva ngatfutsela kulenye indzawo futsi kungakapheli nenyanga besengifundza nebantfu labambalwa. Lomunye lebengifundza naye wacala kuya eHholweni LeMbuso. Ngemuva kwekuya eSikolweni Lesisekelwe EBhayibhelini Sebazalwane Labangakashadi, lesatsatsa tinyanga letimbili, * ngatfola sabelo lesisha lapho ngafike ngafundza khona liBhayibheli nebantfu labane. Ngiyakutsandza kufundzisa bantfu, ngobe ngiye ngibone kutsi vele umoya longcwele uyabasita bantfu kutsi bashintje kuphila kwabo.”​—1 Thes. 2:19.

8. Yini lamanye emaKhristu lasemasha layentile kuze ente umsebenti wekwenta bafundzi?

⁸ Lamanye emaKhristu lasemasha afundze lolunye lulwimi. Nasi sibonelo, Jacob losuka enyakatfo nelive laseMelika utsi: “Ngesikhatsi nginemnyaka lengu-7 budzala, linyenti lebantfwana lebengifundza nabo belikhuluma lulwimi lwaseVietnam. Bengifuna kubatjela ngaJehova, ngako ngemuva kwesikhatsi ngahlela kufundza lulwimi lwabo. Esikhatsini lesinyenti, bengifundza lolulwimi ngekutsi ngicatsanise Sicongosekulindza sesiNgisi kanye neselulwimi lwesiVietnamese. Ngaphindze ngaba nebangani lebebakhuluma siVietnamese ebandleni lebesisedvute nalo. Nangineminyaka lengu-18 budzala ngaba lihlahlandlela. Kamuva ngaya eSikolweni Lesisekelwe eBhayibhelini Sebazalwane Labangakashadi. Lesikolwa sangisita kutsi ngikhone kuba lihlahlandlela kulendzawo lengikuyo njengoba kungimi ngedvwa lomdzala welibandla, kulelibandla lelikhuluma siVietnamese. Linyenti lebantfu lelikhuluma siVietnamese liyajabula ngekutsi ngafundza kukhuluma lulwimi lwabo. Bavame kungimema emakhaya abo futsi ngivamise kutadisha nabo liBhayibheli. Labanye baze babhatjatiswa.”​—Catsanisa ne-Imisebenti 2:7, 8.

9. Yini lesiyifundzako nasenta umsebenti wekwenta bafundzi?

⁹ Umsebenti wekwenta bantfu bafundzi ukufundzisa imikhuba lemihle yekusebenta, emakhono ekukhuluma, kutetsemba kanye netindlela letihlakaniphile tekucoca nebantfu labehlukahlukene. (Taga 21:5; 2 Thim. 2:24.) Umsebenti wekwenta bafundzi ujabulisa kakhulu ngenca yekutsi ukwenta ujwayelane nemiBhalo lesisekelo yekukholwa kwakho. Uphindze ufundze nekusebenta naJehova.​—1 Khor. 3:9.

10. Ungakujabulela njani kwenta umsebenti wekwenta bafundzi ngisho nobe usendzaweni lenebantfu labangatifuni tindzaba letimnandzi?

¹⁰ Ungakujabulela kwenta labanye bafundzi ngisho nobe babancane bantfu labalalela tindzaba letimnandzi endzaweni lokuyo. Kwenta labanye bafundzi ngumsebenti lowentiwa ngekubambisana. Lonkhe libandla lifuna bantfu labatfobekile emsebenti wekushumayela. Ngisho nobe kungumzalwane nobe dzadze kuphela lotfole umuntfu logcine sekangumfundzi, libandla lonkhe lisuke lihlanganyele ekufuneni loyo muntfu futsi lonkhe liyajabula. Sibonelo saloko kutsi Brandon wacitsa iminyaka leyimfica alihlahlandlela endzaweni lebeyinebantfu labangatemukeli tindzaba letimnandzi. Brandon utsi: “Ngiyakutsandza kwenta umsebenti wekushumayela ngoba nguloko Jehova lasicele kutsi sikwente. Ngacala kuba lihlahlandlela nangicedza nje esikolweni. Ngiyakujabulela kukhutsata bazalwane labasebasha ebandleni lengikulo futsi ngiyakujabulela nekubabona batfutfuka ebuhlotjeni babo naNkulunkulu. Ngesikhatsi ngicedza eSikolweni Lesisekelwe eBhayibhelini Sebazalwane Labangakashadi, ngatfola sabelo sekuyoba lihlahlandlela kulenye indzawo. Kuliciniso kutsi kute lengike ngafundza naye liBhayibheli wate wabhatjatiswa kodvwa labanye bakhonile. Ngiyajabula ngekutsi ngiye ngahlela timo tami kute ngente umsebenti wekwenta bafundzi ngalokugcwele.”​—Shu. 11:6.

11. Ngumiphi imisebenti lengcwele bantfu labasha labajabulele kuyenta?

¹¹ Manyenti ematfuba lasivulekele ekukhonteni Jehova. Sibonelo saloku kutsi bantfu labanyenti labasebasha bahlanganyela emsebentini wekwakha ngekutitsandzela. Kudzingeka emaHholwa eMbuso langemakhulu. Kwakha lamahholwa kungumsebenti longcwele nalodvumisa Nkulunkulu futsi ungakwenta ujabule. Njengobe kunjalo nakuleminye imisebenti lengcwele, kusebenta nalabanye kulomsebenti wekwakha kuyinjabulo. Umsebenti wekwakha tindzawo tekukhontela nawo uyafundzisa, njengoba ukufundzisa kutsi ucaphele tingoti letingase tenteke, ube sisebenti lesikhutsele futsi ubambisane nebacondzisi balowomsebenti.

12. Umsebenti wekuba lihlahlandlela ungakuvulela njani lamanye ematfuba?

¹² Lomunye umzalwane longu Kevin utsi: “Kusukela ngisengumfana lomncane, bengisolo ngifuna kukhonta Jehova emsebentini wasikhatsi sonkhe. Ekugcineni, ngaba lihlahlandlela nangineminyaka lengu-19 budzala. Bengitisekela ngekutsi ngente umsebenti wemalanga latsite evikini kulomunye umzalwane lebekangumakhi. Ngafundza kufaka luphahla, emafasitelo kanye netivalo. Kamuva ngahamba ngayosebenta iminyaka lemibili nelicembu lelisita nakunetehlakalo temvelo, sakha kabusha emaHholwa eMbuso kanye nemakhaya ebazalwane. Ngesikhatsi ngiva kutsi kunesidzingo sebantfu labatakwenta umsebenti wekwakha eNingizimu Afrika, ngafaka sicelo sami futsi bangemukela. Njengobe ngilana e-Afrika, njalo ngemuva kwemaviki lambalwa ngiyaye ngitfutsele lapho kutakwakhiwa khona liHholwa leMbuso. Licembu lengakha nalo lifana nemndeni kimi. Kuyangijabulisa kushumayela nebazalwane labakhona kulendzawo njalo ngeliviki. Imigomo lengatibekela yona ngisengumfana ingente ngajabulela nematfuba lebengingacabangi kutsi ngingaba nawo.”

13. Kusebenta eBethel kubajabulisa njani bantfu labasha?

¹³ Labanye labanamatsele emigomeni yabo  yekukhonta Jehova sikhatsi sonkhe, nyalo sebakhonta eBethel. Kukhonta eBethel kuyajabulisa ngobe konkhe losuke ukwenta lapho usuke ukwentela Jehova. Umndeni waseBethel uyasisita kute sitfole imfundvo levela kuNkulunkulu. Lomunye umzalwane losebenta eBethel longu-Dustin utsi: “Ngatibekela umgomo wekukhonta Jehova sikhatsi sonkhe nangineminyaka lengu-9 budzala, futsi ngacala kuba lihlahlandlela nangicedza nje esikolweni. Ngemuva kwemnyaka netinyanga letisitfupha ngamenyelwa eBethel, lapho ngafike ngafundza khona indlela yekusebentisa imishini yekunyatselisa, ngemuva kwesikhatsi ngafundza kusebentisa ema-computer. Njengobe ngilapha eBethel, ngijabulela kuva imibiko lemihle lemayelana nemsebenti wekwenta bafundzi emhlabeni wonkhe. Ngiyakutsandza kusebanta la-Bethel, ngobe umsebenti lesiwentako usita bantfu kutsi basondzelane naJehova.”

14. Yini longayenta kute utilungiselele umsebenti wasikhatsi sonkhe?

¹⁴ Ungatihlela njani timo takho kute ube ngumKhristu lowenta umsebenti wasikhatsi sonkhe? Buntfu bebuKhristu bungakusita kutsi ukhonte Jehova sikhatsi sonkhe ngetulu kwanobe ngabe ngukuphi lokunye. Ngako, kukhutsalele kufundza liVi laNkulunkulu, uzindle ngaloko lelikushoko futsi ufune ematfuba ekukhombisa kukholwa kwakho emihlanganweni yelibandla. Nangabe usafundza sikolwa, ungafundza likhono lekuba ngumshumayeli lokahle wetindzaba letimnandzi. Batsandze bantfu ngekutsi usebentise imibuto ngekuhlakanipha kute utfole loko labakucabangako futsi ubalalele nabaphendvula. Ungaphindze wente imisebenti ebandleni, lenjengekuhlanta liHholwa leMbuso, kanye nekulinakekela. Jehova uyakujabulela kusebentisa labo labatfobekile nalabanemoya wekutinikela. (Fundza Tihlabelelo 110:3; Imis. 6:1-3) Umphostoli Pawula wamema Thimothi kutsi asebente naye njengesitfunywa selivangeli ngobe bazalwane “bebakhuluma kahle ngalomfundzi.”​—Imis. 16:1-5.

15. Ngutiphi tintfo longatenta kute ukhone kutisekela?

¹⁵ Bantfu labenta umsebenti wasikhatsi sonkhe bayawudzinga umsebenti wekutiphilisa. (Imis. 18:2, 3) Mhlawumbe ungafundzela likhono lelingakwenta ukhone kutiphilisa endzaweni lokuyo. Njengobe utibekela lemigomo, coca nembonisi wesigodzi kanye nemahlahlandlela lasesigodzini lokuso. Babute kutsi ngumuphi umsebenti lokahle longentiwa ngemahlahlandlela. LiBhayibheli liphindze litsi: “Yekelela konkhe lokwentako kuSimakadze, nakanjani tinhloso takho tiyawuphumelela.”​—Taga 16:3; 20:18.

16. Kukhonta Jehova ngalokugcwele usemusha kungakusita njani kutsi utfwale leminye imitfwalo esikhatsini lesitako?

¹⁶ Ungaciniseka kutsi Jehova ufuna ‘ubambisise’ likusasa lelijabulisako. (Fundza 1 Thimothi 6:18, 19.) Umsebenti wasikhatsi sonkhe ukwenta ujwayelane naletinye tisebenti tasikhatsi sonkhe futsi ukwente ube ngumKhristu lonebuhlobo lobucinile naNkulunkulu. Labanyenti labakhonte Jehova ngalokugcwele kusukela basebasha, kubasitile kutsi babe nemishado lephumelelako. Ngalokuvamile, labo labacale kuba ngemahlahlandlela basengakashadi baye bachubeka bangemahlahlandlela ngisho nobe sebashadile.​—Roma 16:3, 4.

17, 18. Kutibekela imigomo kuyitsintsa njani inhlitiyo yakho?

¹⁷ Imigomo lotibekela yona kufanele isuke enhlitiyweni. Tihlabelelo 20:4 titsi: “Akakuphe njengekufisa kwenhlitiyo yakho, afeze tonkhe tinhloso takho.” Ngako cabanga ngaloko lofuna kukwenta ekuphileni kwakho. Cabanga nangaloko Jehova lakwentako esikhatsini setfu nangendlela longahlanyela ngayo emsebentini wakhe. Ngemuva kwaloko, tibekele umgomo waloko longakwenta kute umjabulise.

¹⁸ Kukhonta Jehova ngalokugcwele kutakujabulisa kakhulu ngobe nguyona ndlela yekuphila lemdvumisako. Ngako, “yenta Simakadze abe yinjabulo yakho, yena-ke utakupha lokufiswa yinhlitiyo yakho.”—Hla. 37:4.