“Awu Nkulunkulu wami, wena uyayiva imithantazo futsi tonkhe tinhlobo tebantfu titakuta kuwe.”—Tihlabelelo 65:2.

Labanye bantfu bathantaza ngobe batsi umthantazo ubenta bative bancono, ngisho nobe bangakholelwa kutsi ukhona umuntfu lobalalele. Kodvwa kuthantaza akusiyo nje intfo lesiyenta kuze sitive sincono futsi sikhone nekubeketelela tinkinga tetfu. LiBhayibheli liyasicinisekisa kutsi “Jehova * usedvute nabo bonkhe labambitako, usedvute nabo bonkhe labambita ngeliciniso. . . . Uyabeva nabakhalela lusito.”—Tihlabelelo 145:18, 19.

Ngako singaciniseka kutsi Nkulunkulu Jehova uyayiva imithantazo yetikhonti takhe. Ngelutsandvo utsi: “Nitangibita nithantaze kimi, futsi mine ngitanilalela.”—Jeremiya 29:12.

“Phikelelani emthantazweni.”—Roma 12:12.

EBhayibhelini, sikhutsatwa kutsi ‘sichubeke sithantaza’ futsi ‘sisebentise tonkhe tinhlobo tekuthantaza.’ Kuyacaca kutsi, Nkulunkulu Jehova ufuna sithantaze kuye.—Matewu 26:41; Efesu 6:18.

Kungani Nkulunkulu afuna sithantaze kuye? Cabanga ngaloku: Babe uyajabula nangabe umntfwana wakhe acela kutsi amsite. Kuliciniso kutsi lobabe kungeteka usuke akwati loko lokudzingwa ngumntfwana wakhe kanye nendlela lativa ngayo, kodvwa nakamuva acela lusito lwakhe, uyabona kutsi lomntfwana uyametsemba futsi usondzelene naye. Ngendlela lefanako, nasithantaza kuNkulunkulu Jehova sisuke sikhombisa kutsi siyametsemba futsi sifuna kusondzelana naye.—Taga 15:8; Jakobe 4:8.

“Niphonse konkhe kukhatsateka kwenu kuye, ngobe uyanikhatsalela.”—1 Phetro 5:7.

Nkulunkulu ufuna sithantaze kuye ngobe uyasitsandza futsi uyasikhatsalela. Utati tonkhe tinkinga tetfu naloko lokusikhatsatako, futsi ufuna kusisita.

Kuko konkhe kuphila kwayo, iNkhosi Davide beyithantaza kuNkulunkulu Jehova icela lusito futsi imtjela loko lebeyikucabanga nendlela lebeyitiva ngayo. (Tihlabelelo 23:1-6) Nkulunkulu wativa njani ngaDavide? Bekamtsandza Davide futsi ayilalela yonkhe imithantazo yakhe. (Imisebenti 13:22) Ngendlela lefanako, Nkulunkulu uyilalela yonkhe imithantazo yetfu ngobe uyasikhatsalela.

Lawa ngemavi alomunye umbhali wetihlabelelo letiseBhayibhelini. Bekaciniseka kutsi Nkulunkulu uyayiva imithantazo yakhe, futsi loko kwamsita kakhulu. Wativa asondzelene naNkulunkulu futsi watfola emandla ekumelana nekucindzeteleka nebuhlungu.—Tihlabelelo 116:1-9.

Nasiciniseka kutsi Nkulunkulu uyayiva imithantazo yetfu sitawuchubeka sithantaza kuye. Cabanga ngesibonelo saPedro, lohlala enyakatfo yaseSpain. Indvodzana yakhe leneminyaka lengu-19 yashona engotini yemoto. Asebuhlungwini, Pedro watjela Nkulunkulu indlela labekativa ngayo futsi wachubeka athantaza kuye tikhatsi letinyenti acela indvudvuto nekusekelwa. Yini leyenteka? Pedro utsi: “Jehova wayiphendvula imithantazo yami asebentisa umkami nebazalwane ebandleni kutsi bangisekele futsi bangidvudvute.”

Nanobe kuthantaza kungazange kuyibuyise indvodzana yakhe, kodvwa kwamsita kakhulu yena nemndeni wakhe. Umkakhe, María Carmen, utsi: “Kuthantaza kwangisita ngabeketelela buhlungu lebengibuva. Bengati kutsi Nkulunkulu Jehova uyasati simo lebengikuso ngobe nangithantaza kuye bengitiva nginekuthula.”

LiBhayibheli netintfo letinyenti letenteke ekuphileni kwebantfu, kwenta kucace kutsi Nkulunkulu uyayiva imithantazo. Nanobe kunjalo, Nkulunkulu akayiphendvuli yonkhe imithantazo. Kungani aphendvula leminye imithantazo kodvwa leminye angayiphendvuli?