Kungani Kufanele Sikujabulele Kuphila?
TIHLOKO LETENDLULILE tivete kutsi tinhlekelele letehlukahlukene tingakwenta njani kuphila kube matima. Njengoba ubeketelela tinkinga lonato, kungenteka uyatibuta kutsi: Kubaluleke ngani kuphila? nekutsi kukhona yini lonendzaba nawe? Ungangabati kutsi Nkulunkulu unawe ekuhluphekeni kwakho. Uligugu kuye.
Umbhali weTihlabelelo 86 waveta kutsi uyametsemba Nkulunkulu nakatsi: “Ngelilanga lekuhlupheka kwami ngikhala kuwe, ngobe wena uyangiphendvula.” (Tihlabelelo 86:7) Kungenteka uyacabanga, ‘Nkulunkulu utongiphendvula njani “ngelilanga lekuhlupheka kwami”?’
Kuliciniso kutsi kungenteka Nkulunkulu angaticedzi tinkinga takho ngekushesha, kodvwa liVi lakhe liBhayibheli letsembisa kutsi utasinika kuthula kwangekhatsi lokutasisita sibeketele. Litsi: “Ningakhatsateki ngalutfo, kodvwa kuko konkhe ticelo tenu atatiwe nguNkulunkulu ngekuthantaza, ngekuncusa nangekubonga; kuthula kwaNkulunkulu lokwendlula konkhe kucondza kutawulondza tinhlitiyo netingcondvo tenu.” (Filiphi 4:6, 7) Sicela ucabange ngekutsi lamavesi lalandzelako asisita njani sibone kutsi Nkulunkulu unendzaba natsi.
Nkulunkulu Unendzaba Nawe
“Nkulunkulu akakhohlwa ngisho namunye [jolwane] wabo. . . Nine nibaluleke kwendlula bojolwane labanyenti.”—Lukha 12:6, 7.
CABANGA NGALOKU: Tinyoni letingabonakala tingasilutfo kubantfu, timcoka kuNkulunkulu. Kute ngisho namunye jolwane longakabaluleki kuNkulunkulu, ngamunye wabo uligugu kuye. Bantfu bamcoka kakhulu kuNkulunkulu kwendlula bojolwane. Bantfu bayindalo yaNkulunkulu lebalulekile lesemhlabeni. Badalwe ngemfanekiso wakhe futsi banelikhono lekuveta nekubonisa timfanelo takhe letinhle.—Genesisi 1:26, 27.
“Simakadze ungihlolisisile, uyangati. . . . Imicabango yami uyati ingakaveli . . . Ngilinge, wati imicabango yami.”—Tihlabelelo 139:1, 2, 23.
CABANGA NGALOKU: Nkulunkulu ukwati kahle. Uyati kahle imicabango lesekujuleni kwenhlitiyo yakho netintfo letikukhatsatako. Ngisho noma labanye bangakucondzi kucindzeteleka lonako, Nkulunkulu unendzaba nawe futsi ufuna kukusita. Loko kwenta kuphila kube yintfo lebaluleke kakhulu.
Kuphila Kwakho Kunenjongo
“Awu, Simakadze! Vani umthandazo wami. Kukhala kwami akufinyelele kuwe. . . . Beka indlebe yakho kimi; usheshe ungiphendvule njalo nje nangikhala kuwe. . . . Unake imikhuleko yalabangenabani.”—Tihlabelelo 102:1, 2, 17.
CABANGA NGALOKU: Kufanana nekutsi kusukela kwacala kuhlupheka kwebantfu, Jehova bekasolo atinaka tinyembeti temuntfu ngamunye nakakhala. (Tihlabelelo 56:8) Loku kufaka ekhatsi tinyembeti takho. Nkulunkulu ukwati konkhe kuhlupheka kwakho netinyembeti takho ngobe uligugu kuye.
“Ungajabhi, ngobe mine nginguNkulunkulu wakho. Ngitakucinisa ngikusite, . . . Mine nginguSimakadze, Nkulunkulu wakho, . . . lotsi kuwe: ‘Ungesabi, ngitakusita.’”—Isaya 41:10, 13.
CABANGA NGALOKU: Nkulunkulu ukulungele kukusita. Uma uwa utakuphakamisa.
Likhona Litsemba Lelikusasa Lelihle
“Ngobe Nkulunkulu walitsandza kakhulu live kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.”—Johane 3:16.
CABANGA NGALOKU: Uligugu kuNkulunkulu kangangekutsi wanikela ngeNdvodzana yakhe kutsi ibe yinhlawulo kuze kuzuze wena. Lenhlawulo ikunika litsemba lekuphila imphilo lejabulisako nalenenjongo kuze kube phakadze. a
Ngisho noma ungativa ukhatsatekile futsi kuphila kungabeketeleleki, tadisha liVi laNkulunkulu ngekucophelela kuze wakhe kukholwa kwakho etetsembisweni taNkulunkulu. Loko kutokwenta ujabule futsi uciniseke kutsi kuphila kubalulekile.
a Kuze utfole lokunyenti ngenhlawulo yaJesu, bukela i-video letsi Kukhumbula Kufa KwaJesu ku-www.pr2711.com/ss. Chafata lakutsi khona TINCWADZI > EMA-VIDEO>IMIHLANGANO YETFU NEKUSHUMAYELA.
Lokunye Longatsandza Kukuhlola
MAYELANA NATSI
Kungani Kufanele Utadishe LiBhayibheli?
LiBhayibheli lisita tigidzi tebantfu emhlabeni wonkhe kutsi titfole timphendvulo temibuto lebalulekile. Ungatsandza yini nawe kwati leto timphendvulo?
SICONGOSEKULINDZA
Kuyasisita Yini Kwati Kutsi Nkulunkulu Uyasinakekela?
LiBhayibheli lisisita kutsi sicinise kukholwa kwetfu ngetetsembiso taNkulunkulu letimayelana nelikusasa lelihle
SICONGOSEKULINDZA
Sibaluleke Ngani Sipho Lesikhulu Kunato Tonkhe Lesivela KuNkulunkulu?
Ngutiphi tintfo letenta sipho sibe ligugu kunalesinye? Kucabanga ngaletintfo kungasisita sikhulise kubonga kwetfu ngenhlawulo.
