“Tonkhe tipho letinhle naletiphelele tivela etulu, tichamuka kuYise wetibane tasesibhakabhakeni.” (Jakobe 1:17) Ecinisweni, lombhalo ukhuluma ngaBabe wetfu losezulwini lowephanako, Nkulunkulu Jehova. Nobe kunjalo, kunesipho lesikhulu kunato tonkhe Jehova lasiphe sona. Ngusiphi lesipho? Emavi aJesu latiwa kakhulu lasencwadzini yaJohane 3:16, atsi: “Nkulunkulu walitsandza kakhulu live kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.”

Lesipho Nkulunkulu lasiphe sona lesiyiNdvodzana yakhe lekuphela kwayo​—lokusipho lesikhulu kunato tonkhe umuntfu lake waphiwa tona, ngaso singakhululwa ekugcilatweni sono, kuguga kanye nekufa. (Tihlabelelo 51:5; Johane 8:34) Nobe singetama kangakanani, ngeke size sikhone kutikhulula ekugcilatweni sono. Nobe kunjalo, Nkulunkulu lonelutsandvo wasiniketa loko besikudzinga kute sikhululwe. Ngekunikela ngeNdvodzana yakhe Jesu Khristu, kute ibe yinhlawulo, Nkulunkulu Jehova wavulela bonkhe bantfu litfuba lekutfola kuphila lokuphakadze. Iyini vele lenhlawulo? Kungani ibalulekile? Futsi singazuza kanjani kuyo?

Inhlawulo linani lelikhokhwako kute kubhadalwe intfo lebeyilahlekile nobe kute intfo letsite ikhululwe ekugcilatweni. LiBhayibheli lisitjela kutsi batali betfu bekucala bebadalwe bete sono, futsi bebanelitfuba lekuphila phakadze emhlabeni lolipharadisi bakanye nebantfwana babo. (Genesisi 1:26-28) Lokubuhlungu kutsi balilahla lelotfuba ngekutsi bakhetse kungamlaleli Nkulunkulu​—futsi baba toni. Waba yini umphumela waloko? LiBhayibheli litsi: “Ngemuntfu munye sono sangena eveni, nekufa kwangena ngesono, ngenca yaloko kufa kwasakatekela kubo bonkhe bantfu ngobe bonkhe bonile.” (Roma 5:12) Kunekutsi Adamu andlulisele kuphila lokute sono kubantfwana bakhe, wandlulisela sono nemphumela waso lokukufa.

Endzabeni yenhlawulo, loko lokubhadalwa ngako kufanele kulingane naloko lokulahlekile. Ngalesikhatsi Adamu angamlaleli ngemabomu Nkulunkulu, wona futsi umphumela waloko waba kulahleka kwekuphila lokute sono​—kuphila lebekutawuphilwa ngu-Adamu asete sono. Ngekuvumelana nalokushiwo liBhayibheli, loko kwabangela kutsi bantfwana ba-Adamu babe tigcili tesono nekufa. Ngenca yaloko, kwadzingeka kuphila kwemuntfu lote sono​—lokukuphila kwaJesu—​kube yinhlawulo kute akhulule bantfu ekugcilatweni sono. (Roma 5:19; Efesu 1:7) Ngesizatfu sekutsi Nkulunkulu uyabatsandza bantfu, wakhokha lenhlawulo kute batotfola kuphila lokwalahlwa ngu-Adamu na-Eva​—kuphila lokuphakadze emhlabeni lolipharadisi.​—Sembulo 21:3-5.

Nasibuka loko lokufezwa yinhlawulo, asingabati kutsi lesipho saNkulunkulu senhlawulo, lesenta bantfu batfole kuphila lokuphakadze, sisipho lesikhulu kunato tonkhe. Kute sicondze kutsi siyini ‘sipho lesihle nalesiphelele,’ ake sicoce ngetindlela letikahle, lesingakwenta ngato kute siphe bantfu tipho ngendlela letabajabulisa, njengobe sichazile esihlokweni lesendlulile.

 Senetisa sifiso setfu. Bonkhe bantfu banesifiso semvelo sekuphila phakadze. (Umshumayeli 3:11) Nanobe tsine ngekwetfu singakhoni kunetisa leso sifiso, inhlawulo yaJesu isivulela lelotfuba. LiBhayibheli litsi: “Ngobe umvuzo wesono kufa, kodvwa sipho Nkulunkulu lasinika sona, kuphila lokuphakadze ngaKhristu Jesu iNkhosi yetfu.”​—Roma 6:23.

Senetisa sidzingo setfu. Bantfu angeke baze bakhone kukhokha inhlawulo. LiBhayibheli litsi: “Ngobe phela kuhlengwa kwemphefumulo wakhe kubita kakhulu, kute intsengo lengakwenela.” (Tihlabelelo 49:8) Ngako, besidzinga lusito lwaNkulunkulu kute sikhululwe ekugcilatweni sono nekufa. Nkulunkulu wasinika loko besikudzinga ngekutsi ‘asihlenge ngaKhristu Jesu.’​—Roma 3:23, 24.

Sefika ngesikhatsi lesikahle. LiBhayibheli litsi: “Ngobe ngesikhatsi sisetoni, Khristu wasifela.” (Roma 5:8) Ngenca yekutsi lenhlawulo yakhokhwa “ngesikhatsi sisetoni,” isicinisekisa ngelutsandvo lanalo ngatsi ngisho nobe sinesono. Iphindze isinikete litsemba letintfo lesingatilindzela, ngisho nobe kusafanele sikhutsatelele imiphumela yesono.

Sinesisusa lesihle kakhulu nalesite umona. LiBhayibheli lisitjela ngaloko lokwenta Nkulunkulu wanikela ngeNdvodzana yakhe njengenhlawulo, litsi: “Lutsandvo lwaNkulunkulu lwavetwa ngaloku kitsi, ngobe Nkulunkulu wayitfumela eveni iNdvodzana yakhe lekuphela kwayo kuze sitfole kuphila ngayo. Ngulolo-ke lutsandvo, hhayi kutsi ngitsi lesitsandze Nkulunkulu, kodvwa nguye lowasitsandza.”​—1 Johane 4:9, 10.

Singakhombisa njani kutsi siyabonga ngalesipho lesikhulu lesitendlula tonkhe? Khumbula kutsi emavi aJesu lakuJohane 3:16 atsi ngulabo ‘labakholwa nguye’ kuphela labatawusindziswa. Ngekusho kweliBhayibheli, kukholwa “kukutilindzela ngekuciniseka tintfo letetsenjwako.” (Hebheru 11:1) Kute sibe naloko kukholwa, kudzingeka sibe nelwati lolungulonalona. Ngenca yaloko, sikuncenga kutsi utinike sikhatsi sekufundza ngaNkulunkulu Jehova, uMuphi walesipho ‘lesihle nalesiphelele,’ uphindze ufundze nangaloko lokufanele ukwente kute utfole kuphila lokuphakadze lokwaletfwa yinhlawulo yaJesu.

Konkhe loku ungakufundza ngekuhlola lokwatiswa lokuseBhayibhelini lokutfolakala ku-www.pr2711.com. BoFakazi BaJehova bangakujabulela kukusita. Siyaciniseka kutsi njengoba ufundza ngaloku futsi uzuza ngalesipho lesikhulu, nawe utawutsi: “Akabongwe Nkulunkulu ngaJesu Khristu iNkhosi yetfu!”​—Roma 7:25.