Don kanye na-Margaret  * bajabula ngesikhatsi bavakashelwa yindvodzakati yabo kanye nemndeni wayo. Esidlweni sabo sekugcina bandzawonye, Margaret, umpheki lonelikhono futsi nalosewatsatsa umhlalaphansi, wabaphekela macaroni nashizi, kudla lebekutsandvwa batukulu bakhe bebafana lababili.

Ngesikhatsi bonkhe sebahleti phansi, Margaret waletsa lokudla bekakuphekile futsi wakubeka etafuleni kute kutsi wonkhe muntfu atiphakele. Nakavula simbonyo, wamangala nakatfola kutsi kulendishi bekunelisobho lelishisako lashizi nje kuphela. Margaret bekakhohlwe kufaka loko bekubalulekile, macaroni! *

Ngisho nobe sibadzala kangakanani nobe sinemakhono lamanyenti, sonkhe siyawenta emaphutsa. Kungaba ngemaphutsa lanjengekukhuluma emagama latsite singakacabangi nobe kwenta intfo letsite ngesikhatsi lesingakafanele nobe mhlawumbe sente intfo singakanaki nobe sikhohlwe kuyenta. Kungani senta emaphutsa? Singawasingatsa kanjani? Singakhona yini kuwagwema? Umbono lokahle ngemaphutsa ungasisita kutsi siphendvule lemibuto.

Nangabe senta tintfo kahle, siyajabula nasidvunyiswa futsi sitiva sikufanelekela kutfola lolodvumo. Nangabe sente liphutsa, ngisho nalelo lesingakalenti ngemabomu futsi labanye bangakasiboni, kungani singavumi kutsi sente liphutsa? Kute sente kanjalo kufanele sitfobeke.

Nangabe sibeka tidzingo tetfu kucala kunetalabanye, kulula kutsi sibone emaphutsa etfu amancane nobe sisole labanye ngalawo maphutsa nobe-ke siphike size silale ngesisu. Kwenta kanjalo ngalokuvamile kuba nemiphumela lemibi. Lenkinga ngeke seyilungiseke futsi kungasolwa bantfu labangenalicala. Ngisho nobe singaphunyula emaphutseni lesiwenta nyalo, kodvwa kufanele kuhlale kusetingcondvweni tetfu kutsi esikhatsini lesitako, “ngamunye wetfu utawutilandzisela kuNkulunkulu.”​—Roma 14:12.

Nkulunkulu unembono lokahle ngemaphutsa. Encwadzini yeTihlabelelo, Nkulunkulu uchazwa njengemuntfu ‘lonemusa nesihawu’; nekutsi “akatsetsi ngaso sonkhe sikhatsi, futsi akahlali atfukutsele kuze kube phakadze.” Uyati kutsi sinesono, uyabucondza butsakatsaka lesatalwa nabo, futsi “uyakhumbula kutsi silutfuli nje.”​—Tihlabelelo 103:8, 9, 14.

Ngetulu kwako konkhe, njengababe lonemusa, Nkulunkulu ufuna kutsi tsine njengobe sibantfwana bakhe, sibe nembono lofana newakhe ngemaphutsa. (Tihlabelelo 130:3) LiVi lakhe lisiniketa teluleko letinyenti kanye neticondziso letitasisita kutsi sikhone kusingatsa kahle emaphutsa etfu kanye newalabanye.

Ngalokuvamile, nangabe umuntfu ente emaphutsa ubese ucitsa sikhatsi lesinyenti kanye nemandla akhe solo azama kusola labanye nobe atitsetselele ngaloko lakushito nobe lakwentile. Kunaloko, nangabe  ukhulume kabi kulomunye umuntfu, kungani ungavele ucolise, ulungise tintfo, futsi uchubeke wakha bungani benu. Kukhona yini intfo lembi lowake wayenta futsi yakutfukutselisa nobe yakwenta wacabana nalabanye bantfu? Kunekutsi utitfukutselele nobe usole labanye, kungani ungenti imetamo yekulungisa timo? Kuchubeka usola labanye kungenta lenkinga ingapheli futsi yente ningevani kuphindze kube lukhuni kuyilungisa. Kunaloko, fundza emaphutseni akho, uwalungise, futsi uchubeke nekuphila.

Nangabe lomunye umuntfu enta liphutsa, ngalokuvamile kulula nje kutsi sibonakale sidvumele. Kuncono kakhulu kulandzela sibonelo saJesu Khristu nakatsi: “Tonkhe tintfo lenifuna bantfu batente kini, nani tenteni kubo.” (Matewu 7:12) Nangabe wente liphutsa ngisho nalelibonakala lilincane, asingabati kutsi ufuna labanye bakuphatse ngemusa nobe linganakwa lelophutsa. Pho kungani ungenti intfo lefanako nakulabanye?​—Efesu 4:32.

Lesinye sichazamavi sitsi “inkinga ibakhona nangabe singawati onkhe emaciniso endzaba nobe nangabe singanaki kutsi kwentekeni.” Kufanele sikwemukele kutsi nobe nini, wonkhe umuntfu uyalenta liphutsa nobe emaphutsa. Nobe kunjalo, emaphutsa angaba mancane nangabe sicabanga ngeteluleko letibalulekile letiseBhayibhelini.

Lesinye seluleko lesikuTaga 18:13, sitsi: “Kubulima nelihlazo kuphendvula umbuzo ungakeva kutsi utsini.” Nangabe utiniketa sikhatsi sekutfola onkhe emaciniso endzaba futsi ucabange nangetento takho, siyakucinisekisa kutsi nakanjani utawukhona kugwema kusheshe ukhulume indzaba ungakeva kahle emaciniso nobe wente tintfo ngekubhudvutela. Lwati lolitfola ngekufunisisa kahle emaciniso endzaba lubaluleke kakhulu kute sigweme kwehlulela kabi tintfo futsi sigweme nekwenta emaphutsa.

Lesinye seluleko lesiseBhayibhelini sitsi: “Nakunekwenteka, yentani konkhe lokusemandleni enu kutsi nihlalisane ngekuthula nebantfu bonkhe.” (Roma 12:18) Yenta konkhe lokusemandleni akho kute wakhe kuthula nekuvana. Nangabe usebenta nalabanye, bacabangele futsi ubahloniphe, ubancome ngaloko labakwentile uphindze ubakhutsate. Nawenta njalo, emavi lakhulumeke ngebudlabha nobe tento letimbi letentiwe kuwe kungaba melula kutsi ticolelwe nobe tinganakwa, futsi ngetulu kwaloko netinkinga letinkhulu tingacatululwa ngelutsandvo nangendlela lelula.

Fundza lokuhle kulelo phutsa lolentile. Kunekutsi ufune tindlela tekutitsetselela kuloko lokukhulumile nobe lokwentile, kubone njengelitfuba lekutjengisa buntfu lobuhle. Sikhona yini sidzingo sekutsi utfutfukise endzabeni yekubeketela, yekuba nemusa, nobe yekutibamba? Kutsiwani ngendzaba yekuba nemoya lophansi, kuthula kanye nelutsandvo? (Galathiya 5:22, 23) Lokubaluleke kakhulu kutsi, singawaphindzi emaphutsa lesike sawenta. Kunekutsi unganaki, yetama kunganamatseli kakhulu endleleni lotiva ngayo. Kutfobeka kungasisita kutsi sicedze kungengevani.

Kuba nembono lokahle kungasisita kutsi silungise tinkinga ngendlela lekahle nangabe tiphakama. Kwenta kanjalo, kutawusenta sibe nekuthula kwangekhatsi kanye nekuthula nalabanye. Nangabe sigcine sifundzile emaphutseni lesiwentile, sitawuhlakanipha siphindze singeneke. Ngeke sidvumateke kakhulu ngaloko lesikwentile nobe sititfukutselele. Kwati kutsi nalabanye bantfu balwisana nemaphutsa abo, kungasenta sisondzelane nabo. Ngetulu kwako konkhe, singazuza nasingaba nelutsandvo lolufana nelwaNkulunkulu futsi simlingise ngekutsi sikulangatelele kutsetselela labanye ngalokuphelele.​—Kholose 3:13.

Liphutsa la-Margaret lesikhulume ngaye ekucaleni, lakuhliphita yini kuhlangana ndzawonye kwaloyomndeni? Cha, alizange. Wonkhe muntfu wahleka, lokufaka ekhatsi Margaret, futsi bakujabulela loko kudla, ngisho nobe bekute macaroni! Ngemuva kweminyaka letsite, labatukulu lababili bacocela bantfwana babo ngaleyo ndzaba futsi bakhumbula nenjabulo lebebanayo nagogo wabo namkhulu. Ecinisweni, lelo belikuliphutsa nje!