Nakufa umuntfu lesimtsandzako kuyatentakalela kutsi sikhale ngesizatfu sekutsi sitamkhumbula. Nanobe Jesu bekamtsandza Lazaro, akazange akhaliswe kutsi Lazaru ufile. Bekakhala ngenca yeluvelo bekanalo ngemndeni nebangani baLazaru njengobe kuchazwa kulombhalo waJohane.—Joh. 11:36.

Ngesikhatsi Jesu eva kwekucala ngekugula kwaLazaru, akazange ajakele kuyomelapha. Lokulandzisa kutsi: “Ngako-ke watsi kube eve [Jesu] kutsi [Lazaro] uyagula, wachubeka wahlala emalanga lamabili lapho abekhona.” (Joh. 11:6) Yini leyabangela kutsi Jesu ephute? Kukhona lebekakuhlosile. Watsi: “Lokugula akusiko kwekufa, kepha kungenca yenkhatimulo yaNkulunkulu, kuze iNdvodzana yaNkulunkulu idvunyiswe ngako.” (Joh. 11:4) Kufa akuzange kube siphetfo sekugula kwaLazaru. Jesu bekafuna kusebentisa kufa kwaLazaro “kute kudvunyiswe Nkulunkulu.” Njani? Jesu abetawenta simangaliso lesikhulu ngekuvusa umngani wakhe ethuneni.

Ngesikhatsi akhuluma nebafundzi bakhe ngalendzaba Jesu wacatsanisa kufa nekulala. Kungako-ke atsi: ‘Kodvwa ngitakuya kuye [Lazaro] ngiyemvusa.’ (Joh. 11:11) KuJesu, kuvusa Lazaro ekufeni bekungafana nemtali nakavusa umntfwana wakhe lotsetse sitfongwana. Ngako-ke bekute sizatfu sekutsi eve buhlungu ngekufa kwaLazaro.

Wabangelwa yini Jesu kutsi akhale tinyembeti? Lendzaba njengobe ichubeka iyaphendvula. Lapho Jesu ahlangana nadzadze waboLazaro Mariya, futsi ambona akhala kanye nalabanye bakhala naye “wabibitseka, wadzabuka kakhulu.” Kubona lobobuhlungu kwamtsintsa Jesu wate ‘wadzabuka kakhulu.’ Kungako “Jesu wakhala tinyembeti.” Kwaba buhlungu kuJesu kubona bangani bakhe labatsandzekako baselusizini.—Joh. 11:33, 35.

Lendzaba ikhombisa kutsi Jesu unemandla ekuvusa bantfu lesibatsandzako banemphilo lenhle eveni lelisha lelitako. Iphindze isisite sibone kutsi Jesu uyabavela labo labafelwe ngulabo lababatsandzako ngenca yekufa lokwavela nga-Adamu. Lesinye sifundvo lesingasifundza kulendzaba kutsi kufanele sibavele labo labaselusizini lwekufelwa ngulabo lababatsandzako.

Jesu bekati kutsi utamvusa Lazaro. Kodvwa wakhala tinyembeti ngenca yelutsandvo lolujulile neluvelo ngebangani bakhe. Ngendlela lefanako luvelo lungasenta kutsi ‘sikhale nalabakhalako.’ (Rom. 12:15) Kukhombisa indlela lotiva ngayo akusho kutsi awukholelwa etsembeni leluvuko. Jesu wabeka sibonelo sekukhombisa luvelo ngalabo lebebafelwe ngulabamtsandzako ngekukhala tinyembeti nanobe bekati kutsi utamvusa Lazaro.