Nkulunkulu utabavumela yini bantfu kutsi bachubeke babusa labanye futsi bonakalise nelikusasa labo? Ngeke abavumele. Njengobe sibonile, Nkulunkulu utawutsatsa sinyatselo ngekutsi acedze lusizi nekucindzeteleka losekube khona emakhulu eminyaka. UMdali webantfu kanye nemhlaba ufuna wati kutsi sikhatsi sakhe sekutsi atsatse sinyatselo sesisedvute. Ulembula kanjani lolwati lolubaluleke kangaka?

Cabanga nganangu umfanekiso: Nawutawuhamba ngemoto, ungacale uhlole i-internet, emabalave, kanye neticondziso letikulayela indlela. Njengobe usahamba, ubona emabhodi kanye netakhiwo letivumelana neticondziso lebetikulayela indlela, uba nesibindzi sekutsi sekusedvute lapho uya khona. Ngendlela lefanako, Nkulunkulu usinikete liVi lakhe lelichaza indlela lemangalisako tintfo letitakwenteka ngayo emhlabeni. Njengobe sibona leto tintfo tenteka, siyaciniseka kutsi sesisemalangeni lasiholela esikhatsini sekuphela.

LiBhayibheli lichaza kutsi umhlaba utawufika esikhatsini lesibucayi futsi lesingakavami lesitawuchubeka kuze kufike kuphela. Ngaleso sikhatsi, kutawuba netintfo letenteka emhlabeni kanye netimo letehlukile kunobe yini leyenteka emlandvweni webantfu. Cabanga ngaletinye tintfo letichazwe eVini laNkulunkulu.

1. TIPHITSIPHITSI LETITAWENTEKA EMHLABENI WONKHE Siphrofetho lesikuMatewu sehluko 24 sichaza tintfo letentekako emhlabeni lebetitawuba tibonakaliso. Letibonakaliso titawusho ‘kuphela kwalelive’ futsi titawuholela esikhatsini lapho ‘kuphela kutawufika’ khona. (Emavesi 3, 14) Tifaka ekhatsi timphi, indlala, kutamatama kwemhlaba etindzaweni letehlukahlukene, kwandza kwebubi, kuphela kwelutsandvo, kanye nemetamo leyentiwa baholi benkholo kuze badukise bantfu. (Emavesi 6-26) Kuliciniso kutsi letintfo betisolo tenteka ngelizinga lelitsite kulamakhulu eminyaka leyendlulile. Nanobe kunjalo, njengobe kuphela kusondzela, tonkhe letintfo titawukwenteka ngesikhatsi lesifanako. Titawuhambisana naletimphawu letintsatfu letisecwayiso.

2. SIMO SENGCONDVO SEBANTFU LiBhayibheli litsi ‘emalanga ekugcina’​—lokusikhatsi lesiholela ekupheleni—​abetawubonakala ngekutsi simo sengcondvo sebantfu sibe sibi kakhulu. Siyafundza: “Bantfu batawutitsandza bona, batsandze imali, batigabatise, batigcabhe, bahlambalate, bangalaleli batali, bangabongi, bangetsembeki, babe bete lutsandvo, bangavumi kwenta tivumelwane, banyundzele, bangatibambi, babe nelulaka, bangakutsandzi lokuhle, batsengise ngalabanye, babe nenkhani, bagcwale umgcabho, batsandze injabulo kunekutsandza Nkulunkulu.” (2 Thimothi 3:1-4) Kuliciniso kutsi kungahloniphi kwebantfu akusiyo intfo lensha, kodvwa ‘kukulamalanga ekugcina’ lapho lomoya ubonakala uba mubi kakhulu kangangekutsi lesikhatsi size sichazwe ngekutsi ‘tikhatsi letibucayi lokumatima kubhekana nato.’ Uke wanaka yini kutsi simo sengcondvo sebantfu sesibi kakhulu?

3. UMHLABA UYAMOSHWA LiBhayibheli litsi Nkulunkulu ‘utawubhubhisa labo labamosha umhlaba.’ (Sembulo 11:18) Bantfu bawumosha ngatiphi tindlela umhlaba? Sikhatsi Nowa labephila ngaso sachazwa ngendlela lefanako: “Umhlaba wawonakele emehlweni aNkulunkulu; umhlaba wawugcwele budlova. Nkulunkulu wabuka umhlaba wabona kutsi wonakele.” Ngako-ke naku Nkulunkulu lakusho ngalabo bantfu labakhohlakele, watsi: “Ngitawubabhubhisa.” (Genesisi 6:11-13) Ububonile yini bufakazi lobunyenti lobuveta kutsi umhlaba sewugcwele budlova? Ngetulu kwaloko, bantfu sebafike ecophelweni lelisetulu emlandvweni wekuphila kwabo: Banemandla ekumosha lomhlaba ngobe bangakhona kubulala bonkhe bantfu labakhona, basebentisa tikhali letinemandla. Umhlaba umoshwa nangalenye futsi indlela. Tintfo letisekela kuphila emhlabeni, letifaka ekhatsi umoya lesiwuphefumulako, budlelwane lobukhona emkhatsini wetilwane netitjalo, kanye nelwandle, tiyonakaliswa  kancane kancane ngenca yekutsi bantfu abatinakekeli kahle.

Tibute: ‘Emakhulwini eminyaka leyendlulile, bantfu bebanawo yini emandla ekonakalisa umhlaba ngalokuphelele?’ Kodvwa nyalo bantfu basebentisa lawo mandla kuze bakhe tikhali baphindze bamoshe imvelo. Intfutfuko leyenteka ngelizinga lelisetulu kutebuchwephesha ibonakala ilendlula likhono lebantfu lekulawula imiphumela leletfwa ngulentfutfuko. Nanobe kunjalo, akusiko kwemuntfu kuncuma kutsi likusasa lemhlaba litawuba njani. Ngaphambi kwekutsi konkhe kuphila lokusemhlabeni kucotfulwe, Nkulunkulu utawubhubhisa labo labamosha umhlaba. Setsembiso sakhe leso!

4. UMSEBENTI WEKUSHUMAYELA LOWENTIWA EMHLABENI WONKHE Lenye incenye yaletibonakaliso tekuphela yabiketela kutsi kutawukwentiwa umsebenti lomkhulu longakaze wentiwe, nayitsi: “Letindzaba letimnandzi teMbuso tiyawushunyayelwa emhlabeni wonkhe, kuze kube bufakazi etiveni tonkhe, bese-ke kuphela kuyefika.” (Matewu 24:14) Lomkhankaso wekushumayela bewutawehluka kakhulu kuloko lobekwentiwa tinkholo letinyenti kulamakhulu eminyaka leyendlulile, lebetiphocelela bantfu kutsi bashintje tinkholelo tabo. Kulamalanga ekugcina, kugcizelelwa umlayeto locacile ‘wetindzaba letimnandzi teMbuso.’ Likhona yini licembu lenkholo lolatiko leligcizelela loyo mlayeto? Ngisho nobe labanye bangabonakala bawushumayela lomlayeto, batfolakala endzaweni yinye kuphela yini, nobe sebatishumayele “emhlabeni wonkhe” yini letindzaba letimnandzi, “kuze kube bufakazi etiveni tonkhe”?

I-Web site letsi www.pr2711.com ikhuluma ‘ngaletindzaba letimnandzi teMbuso.’ Le-Web site inetincwadzi letichaza lomlayeto ngetilwimi letingetulu kwa-700. Ikhona yini lenye indlela loyatiko lesetjentisiwe kuze kugcizelelwe tindzaba letimnandzi teMbuso emhlabeni wonkhe? Ngaphambi kwekutsi i-internet ibe khona, BoFakazi BaJehova bebatiwa ngekwenta imetamo yekushumayela tindzaba letimnandzi, letimayelana neMbuso waNkulunkulu. Kusukela nga-1939, likhasi lekucala le-Sicongosekulindza ngasinye linemavi latsi: “Simemetela UMbuso WaJehova.” Incwadzi letsite yetenkholo yakhuluma ngemsebenti wekushumayela lowentiwa BoFakazi BaJehova njengaloyo “longeke ucatsaniswe nalutfo ngelizinga lowentiwa ngalo kanye nalapho ufinyelela khona.” Lokushumayela kugcizelela tindzaba letimnandzi tekutsi ngekushesha ‘kuphela kutawufika’ kuletfwe nguMbuso waNkulunkulu.

Unakile yini kutsi tonkhe letibonakaliso letine letiseBhayibhelini letichazwe kulesihloko setentekile kulesikhatsi losasiphilile? Ngetulu kweminyaka  lelikhulu leyendlulile, lomagazini bewusolo uniketa bantfu labawufundzako lwati lolumayelana netintfo letenteka emhlabeni kuze ubasite batibonele bona kutsi kuphela sekuyasondzela. Kuliciniso kutsi labanye bantfu abavumelani naloko, batsi emaciniso latsite lavetwako kanye netinombolo talokwentekile tiya ngembono wemuntfu futsi tingashintjwa ngunobe ngubani. Baphindze batsi timo talelive tibonakala ngatsi tiba timbi kakhulu ngobe tekuchumana tichubeka titfutfuka emhlabeni wonkhe. Nanobe kunjalo, kuchubeka kutfolakala bufakazi bekutsi sisekupheleni kwesikhatsi lesingakavami emlandvweni wekuphila kwebantfu.

Letinye tati ticabanga kutsi kunetingucuko letinkhulu letitakwenteka emhlabeni. Nasi sibonelo: Nga-2014, labanye bososayensi becwayisa i-United Nations Security Council mayelana netingoti letinkhulu letisongela kuphila kwebantfu. Labososayensi batsi: “Lucwaningo lolwentiwe ngekucophelela lolumayelana naletingoti lusenta siphetse ngekutsi kunelizinga lelisetulu lenhlekelele lengabangelwa kutfutfuka lokukhona kutebuchwephesha.” Bantfu labanyenti sebayaciniseka kutsi sesisesikhatsini lesibucayi emlandvweni wekuphila. Bashicileli balomagazini kanye nebantfu labanyenti labawufundzako abangabati kutsi lesikhatsi lesingakavami vele singemalanga ekugcina futsi kuphela sekusedvute. Kunekutsi ukhatsateke ngelikusasa, ungajabula ngaloko lokutakwenteka. Yini lengakwenta ujabule? Kutsi ungasindza nakufika kuphela!