Incwadzi Yesibili YaPhetro 1:1-21
1 Mine Simoni Phetro, sigcili nemphostoli waJesu Khristu, ngibhalela labo labanekukholwa lokuligugu njengekwetfu,* futsi labakwemukele ngenca yekulunga kwaNkulunkulu wetfu nekweMsindzisi longuJesu Khristu:
2 Shengatsi ningemukela umusa lomkhulu kanye nekuthula ngelwati lolungulonalona+ ngaNkulunkulu nangaJesu iNkhosi yetfu,
3 ngobe ngemandla aNkulunkulu sinikwe* tonkhe tintfo letisenta siphile naletisenta sitinikele kuye, ngelwati lolungulonalona ngaLoyo lowasibita+ ngenkhatimulo yakhe nangebuhle bakhe.
4 Ngaletintfo, usinike* tetsembiso letinhle naletinkhulu kakhulu,+ kuze kutsi ngato nibe njengaye,+ njengobe senikubalekele konakala kwelive lokuletfwa tifiso letimbi.*
5 Ngaleso sizatfu, yentani konkhe lokusemandleni enu+ kuze nengete buhle+ ekukholweni kwenu, ebuhleni benu nengete lwati,+
6 elwatini lwenu nengete kutibamba, ekutibambeni+ kwenu nengete kucinisela, ekuciniseleni kwenu nengete kutinikela kuNkulunkulu,+
7 ekutinikeleni kwenu kuNkulunkulu nengete kutsandza bazalwane, ekutsandzeni kwenu bazalwane nengete kutsandza labanye bantfu.+
8 Nangabe letintfo tikhona kini futsi tiphuphuma, nitalusebentisa lwati lolungulonalona lolumayelana neNkhosi yetfu Jesu Khristu futsi ngeke niphole nobe nihlale ningatseli.+
9 Ngobe umuntfu lote letintfo uyimphumphutse, uvale emehlo akhe kuze angakuboni kukhanya,*+ futsi sewukhohliwe nekutsi Nkulunkulu wamhlanta etonweni takhe+ takadzeni.
10 Ngako-ke bazalwane, yentani konkhe lokusemandleni enu kuze niciniseke kutsi nihlala netsembekile njengobe nibitiwe+ futsi nikhetsiwe; ngobe nanichubeka nitenta letintfo, ngeke nize nehluleke.+
11 Ecinisweni, nanenta njalo nitawubusiswa kakhulu futsi nitawungena eMbusweni+ waphakadze weNkhosi yetfu neMsindzisi wetfu Jesu Khristu.+
12 Ngaleso sizatfu ngitawuchubeka nginikhumbuta ngaletintfo, nanobe nitati futsi nicinile ecinisweni lenalifundza.
13 Kodvwa ngikubona kukuhle kutsi nginikhutsate ngekunikhumbuta,+ yingci nje nangisesekulelithende,*+
14 ngobe ngiyati kutsi lelithende lami selitawususwa, njengobe nje iNkhosi yetfu Jesu Khristu yakwenta kwacaca loko kimi.+
15 Ngako ngaso sonkhe sikhatsi ngitawenta konkhe lokusemandleni ami kuze kutsi nasengihambile, nikwati kutikhumbulela* nine letintfo.
16 Ngesikhatsi sinitjela ngemandla eNkhosi yetfu Jesu Khristu nangekuba khona kwayo, asinitjelanga tintfo lebetisekelwe etindzabeni letingemanga letakhiwe ngebucili, kodvwa sanitjela ngenkhatimulo yakhe lesatibonela yona.+
17 Ngobe watfola ludvumo nenkhatimulo kuNkulunkulu longuBabe, ngesikhatsi Nkulunkulu lokhatimulako amtjela lamavi* latsi: “Lena yiNdvodzana yami letsandzekako nalengiyemukele.”+
18 Lamavi saweva avela ezulwini ngesikhatsi sinaye entsabeni lengcwele.
19 Ngako sinemavi esiphrofetho lacinisekiswe kakhulu, futsi nenta kahle ngekuwalalela kube shengatsi asibane+ lesikhanya endzaweni lemnyama (kuze kube sentsatsakusa futsi kuphume inkhanyeti yekusa)+ etinhlitiyweni tenu.
20 Kwekucala niyati kutsi kute siphrofetho semBhalo lesivela embonweni wemuntfu.
21 Ngobe siphrofetho asikaze siletfwe ngentsandvo yemuntfu,+ kodvwa bantfu bebakhuluma lokuvela kuNkulunkulu njengobe bebacondziswa* ngumoya longcwele.+
Imibhalo lengentansi
^ Nobe “lokulilungelo lelifana nalelo lesinikwe lona.”
^ Nobe “siphiwe ngekukhululeka.”
^ Nobe “siphiwe ngekukhululeka.”
^ Nobe “tinkhanuko letimbi.”
^ Kungaphindze kubekwe ngekutsi, “akaboni kahle, ubona dvutane.”
^ Nobe “umtimba wasemhlabeni.”
^ Nobe “kutikhuluma.”
^ NgesiGriki kutsi, “livi lelitsi.”
^ NgesiGriki kutsi, “bebachutjwa.”
