2 Tikhronike 6:1-42
6 Ngaleso sikhatsi Solomoni watsi: “Jehova watsi utawuhlala ebumnyameni lobukhansa phansi.+
2 Nyalo sengikwakhele indlu lephakeme, indzawo yakho lotawuhlala kuyo kuze kube phakadze.”+
3 Ngemuva kwaloko, inkhosi yagucuka yabusisa sonkhe sive saka-Israyeli ngesikhatsi sonkhe lesive sisemile.+
4 Yatsi: “Shengatsi Jehova Nkulunkulu wema-Israyeli angadvunyiswa, yena ngemlomo wakhe wetsembisa babe wami Davide futsi ngesandla sakhe ukufezile loko, watsi:
5 ‘Kusukela ngelilanga lengakhipha ngalo bantfu bami ema-Israyeli eGibhithe angikaze ngikhetse lidolobha kuto tonkhe tive taka-Israyeli lokutakwakhiwa kulo indlu letawubitwa ngelibito lami kuze lihlale lapho,+ futsi kute lengimkhetsile kutsi abe ngumholi webantfu bami ema-Israyeli.
6 Kodvwa nyalo ngikhetse iJerusalema+ kutsi ibe yindzawo letawuhlala libito lami futsi ngikhetse Davide kutsi abuse bantfu bami ema-Israyeli.’+
7 Bekusifiso senhlitiyo yababe wami Davide kwakha indlu letawubitwa ngelibito laJehova Nkulunkulu wema-Israyeli.+
8 Kodvwa Jehova watsi kubabe wami Davide: ‘Bekusifiso senhlitiyo yakho kwakha indlu letawubitwa ngelibito lami, futsi wente kahle kakhulu ngekuba naleso sifiso enhlitiyweni yakho.
9 Nome kunjalo, angeke uyakhe lendlu kodvwa indvodzana yakho letawutalwa nguwe,* ngiyo letakwakha lendlu letawubitwa ngelibito lami.’+
10 Jehova usifezile setsembiso lasenta ngobe sengilandzele babe wami Davide futsi ngihleti esihlalweni sebukhosi saka-Israyeli+ njengobe Jehova etsembisa.+ Ngiphindze ngakha lendlu lebitwa ngelibito laJehova Nkulunkulu wema-Israyeli,
11 futsi kulendlu, ngibeke leLibhokisi lelinesivumelwane+ lesentiwa nguJehova nebantfu baka-Israyeli.”
12 Solomoni wabese uma embikweli-al’thare laJehova, embikwaso sonkhe lesive saka-Israyeli, futsi waphakamisa tandla takhe.+
13 (Ngobe Solomoni bekakhe siteji ngelitfusi wase usibeka emkhatsini walelibala.*+ Besingemamitha langetulu kwalamabili* budze, nalangetulu kwalamabili* bubanti nangetulu kwemitha kuphakama; futsi wema etikwaso.) Wase uyaguca embikwaso sonkhe lesive sema-Israyeli waphakamisela tandla takhe emazulwini,+
14 watsi: “Awu Jehova Nkulunkulu wema-Israyeli, kute Nkulunkulu lonjengawe emazulwini nobe emhlabeni, logcina sivumelwane futsi lotitsandzako* tinceku takhe letihamba embikwakhe ngayo yonkhe inhlitiyo yato.+
15 Usigcinile setsembiso lowasenta encekwini yakho Davide, babe wami.+ Wenta lesetsembiso ngemlomo wakho futsi lamuhla usifezile ngesandla sakho.+
16 Manje-ke, Jehova Nkulunkulu wema-Israyeli, gcina setsembiso lowasenta encekwini yakho Davide, babe wami, ngalesikhatsi utsi: ‘Angeke kuze kwenteke kutsi kungabi nendvodza letawuhlala embikwami esihlalweni sebukhosi saka-Israyeli, kuphela nje nangabe emadvodzana akho akucaphelisisa konkhe lakwentako ngekuhamba ngemtsetfo wami+ njengobe nawe uhambile embikwami.’+
17 Awu Jehova Nkulunkulu wema-Israyeli, nyalo ngicela usente sifezeke lesetsembiso lowasenta encekwini yakho Davide lengubabe wami.
18 “Kodvwa vele Nkulunkulu angahlala yini nebantfu emhlabeni?+ Phela emazulu, ngisho lizulu lemazulu angeke likwetfwale;+ kangakanani-ke lendlu lengiyakhile!+
19 Awu Jehova Nkulunkulu wami, lalela umthantazo wenceku yakho nekuncusa kwayo kwekucela umusa uphindze ulalele nayicela lusito, ulalele umthantazo inceku yakho lewuthantaza embikwakho.
20 Shengatsi emehlo akho angahlale abuke lendlu busuku nemini, shengatsi angahlale abuke lendzawo lowatsi ngayo, utawubeka libito lakho kuyo,+ kute ulalele umthantazo inceku yakho lewuthantaza ibuke kulendzawo.
21 Lalela nemthantazo wenceku yakho nayicela lusito, ulalele neticelo tebantfu bakho ema-Israyeli nabathantaza babuke kulendzawo,+ shengatsi ungeva usendzaweni lohlala kuyo emazulwini;+ shengatsi ungeva futsi utsetselele.+
22 “Nangabe umuntfu aphoce umuntfu wakubo wase uyafungiswa* futsi kwatsiwa utawulandzisa nakangakwenti loko lakufungile,* kodvwa atsi asente leso sifungo* ete embikweli-al’thare lakho kulendlu,+
23 shengatsi wena ungabese uyeva usemazulwini, utsatse sinyatselo futsi wehlulele tinceku takho ngekutsi umlahle ngelicala umuntfu lomubi bese uyamjezisa ngesento sakhe,+ kodvwa kulolungile wena Nkulunkulu ubotsi umsulwa futsi umnikete umvuzo, kuye ngekulunga kwakhe.+
24 “Nangabe bantfu bakho ema-Israyeli bancotjwa sitsa ngenca yekutsi bebasolo bona kuwe,+ bese bayaphendvuka baphindze bakhatimulise libito lakho,+ bathantaze+ futsi bakuncenge kutsi ubentele umusa nabathantaza bakulendlu,+
25 shengatsi wena ungabese uyeva usemazulwini+ futsi utsetselele sono sebantfu bakho ema-Israyeli, uphindze ubabuyisele eveni lowalinika bona nabokhokho babo.+
26 “Nangabe emazulu avaliwe futsi sekute imvula+ ngenca yekutsi bachubeka nekona kuwe,+ bese bayathantaza bakulendzawo futsi bakhatimulise libito lakho baphindze baphendvuke esonweni sabo ngobe wena sewubatfobisile,*+
27 shengatsi ungabese uyeva usemazulwini futsi utsetselele sono setinceku takho, bantfu bakho ema-Israyeli, ngobe utabafundzisa indlela lengiyo lokufanele bahambe ngayo;+ bese unisa imvula+ eveni lakho lowalinika bantfu bakho kutsi libe lifa labo.
28 “Nakwenteka lelive lihlaselwa somiso,+ nobe sifo lesibulalako,+ sifo lesicotfulako setilimo, sifo lesibulala titjalo,+ libulo letintsetse, nome sikhonyane* lesishwabadzelako;+ nangabe sitsa sabo sibavimbetela kunome ngabe nguliphi lidolobha leliseveni labo*+ nome nangabe kuvela nome ngabe ngusiphi sishayo nobe sifo,+
29 ngisho nome bathantazela ini,+ benta nome ngusiphi sicelo semusa+ lesentiwa ngunobe ngabe ngubani, nobe ngibo bonkhe bantfu baka-Israyeli (ngoba nguloyo naloyo uyasati sishayo labhekene naso kanye nebuhlungu lobusenhlitiyweni yakhe)+ nabaphakamisa tandla tabo babuke kulendlu,+
30 shengatsi ungalalela usemazulwini, indzawo lohlala kuyo,+ futsi shengatsi ungacolela,+ utsatse nesinyatselo; unike umuntfu nemuntfu umvuzo, kuye ngato tonkhe tindlela takhe ngobe wena uyayati inhlitiyo yakhe (nguwe kuphela loyati kahle inhlitiyo yemuntfu),+
31 kuze bakwesabe ngekutsi bahambe etindleleni takho onkhe emalanga labatawaphila eveni lowalinika bokhokho betfu.
32 “Mayelana nemuntfu walesinye sive, longesiyo incenye yebantfu bakho ema-Israyeli futsi lochamuka eveni lelikhashane ngenca yelibito lakho lelikhulu*+ nesandla sakho lesinemandla kanye nemkhono wakho lowelulekile, lofike athantaze abheke kulendlu,+
33 shengatsi ungabese uyalalela usemazulwini, indzawo lohlala kuyo, wente konkhe lokucelwa ngulomuntfu walesinye sive kuze bonkhe bantfu labasemhlabeni balati libito lakho,+ bakwesabe, njengobe bantfu bakho ema-Israyeli benta futsi shengatsi bangati kutsi lendlu lengiyakhile ibitwa ngelibito lakho.
34 “Nakwenteka bantfu bakho baya emphini bayokulwa netitsa tabo ngendlela lobatfumele ngayo,+ bathantaze+ kuwe babuke kulelidolobha lolikhetsile nakulendlu lengiyakhele libito lakho,+
35 shengatsi ungayiva imithantazo yabo usemazulwini kanye neticelo tabo futsi ubancobele.+
36 “Nangabe bakona (ngobe kute umuntfu longoni),+ bese uyabatfukutselela futsi ubanikele esitseni, labo lababatfumbile bahambe nabo baye eveni lesitsa, lelikhashane nobe lelisedvute,+
37 bese bayasanguluka eveni labatfunjelwe kulo, babuyele kuwe baphindze bacele umusa baseveni labatfunjelwe kulo batsi, ‘Sonile futsi sente liphutsa; sente lokubi,’+
38 babuyele kuwe ngenhlitiyo yabo yonkhe+ nangemphefumulo* wabo wonkhe baseveni lesitsa sabo lesabatfumba,+ bathantaze kuwe babuke live labo lowalinika bokhokho babo futsi bathantaze babuke edolobheni lolikhetsile+ nakulendlu lengiyakhele libito lakho,
39 shengatsi ungalalela usemazulwini, indzawo lohlala kuyo, umthantazo wabo nekucela kwabo umusa futsi ubancobele+ futsi ucolele bantfu bakho labakonile.
40 “Awu Nkulunkulu wami, ngicela uvule emehlo akho, netindlebe takho tilalelisise imithantazo lethantazwa kulendzawo.+
41 Awu Jehova Nkulunkulu, nyalo hamba uye endzaweni yakho yekuphumula,+ wena kanye naleLibhokisi lemandla akho. Shengatsi baphristi bakho, awu Jehova Nkulunkulu, bangembatsa insindziso futsi shengatsi labacotfo bakho bangajabula ngebuhle bakho.+
42 Awu Jehova Nkulunkulu, ungamlahli* logcotjiwe wakho.+ Shengatsi ungalukhumbula lutsandvo lwakho lolucotfo lowalukhombisa inceku yakho Davide.”+
Imibhalo lengentansi
^ NgesiHebheru kutsi, “indvodzana yakho, letawuphuma elukhalo lwakho.”
^ Nobe “sibuya.”
^ NgesiHebheru kutsi, “emakhyubhitha lasihlanu.” Fundza Sandzisanchazo B14.
^ NgesiHebheru kutsi, “emakhyubhitha lasihlanu.” Fundza Sandzisanchazo B14.
^ Nobe “lotikhombisa lutsandvo lolucotfo.”
^ NgesiHebheru kutsi, “sicalekiso.”
^ NgesiHebheru kutsi, “sicalekiso.”
^ Nobe “umuntfu wakubo amcalekise.” Lokusifungo lesihambisana nesicalekiso njengesigwebo nangabe afunge emanga nobe aphule lesifungo.
^ Nobe “ubavise buhlungu.”
^ NgesiHebheru kutsi, “eveni lemasango akubo.”
^ Nobe “tintsetse.”
^ Nobe “loko lodvume ngako.”
^ Fundza Tinchazelo Temagama.
^ NgesiHebheru kutsi, “ungamfulatseli.”
