Imisebenti Yebaphostoli 20:1-38
20 Ngemuva kwalesiphitsiphitsi, Pawula wabita bafundzi, wabakhutsata futsi wabavalelisa, wase uyesuka uya eMasedoniya.
2 Nasekahambe kuleto tifundza, futsi sekakhutsate nebazalwane bakhona, wefika eGrisi.
3 Ngemuva kwetinyanga letintsatfu alapho, wancuma kuhamba ngaseMasedoniya ngobe emaJuda+ bekente lisu lekumbulala ngesikhatsi sekatawusuka aye eSiriya.
4 Bekaphekeletelwa nguSopateri indvodzana yaPhurosi waseBheriya, na-Aristakhusi+ kanye naSekhundusi lababaseThesalonika, naGayusi waseDebe, naThimothi,+ kanye naThikhikhusi+ naTrofimusi+ basesifundzeni sase-Asiya.
5 Bona bahamba embili bafike basimela eThrowasi;
6 kodvwa ngemuva kwelilanga leMkhosi Wesinkhwa Lesite Imvubelo,+ sesuka eFiliphi sabakhandza eThrowasi ngemuva kwemalanga lasihlanu, futsi sahlala lapho emalanga langu-7.
7 Ngelilanga lekucala evikini,* sahlangana ndzawonye kuze sidle. Pawula wakhuluma nebantfu balapho njengobe bekatawuhamba ngakusasa, futsi wakhuluma kwaze kwaba sekhatsi nebusuku.
8 Bekukhanyiswe tibane letinyentana kulelikamelo lelisetulu lebesihlangene kulo.
9 Lelinye lijaha lebelihleti efasitelweni, libito lalo kungu-Oyithikhusi, latumeka lalala ngesikhatsi Pawula asakhuluma, laze lawela phansi lisuka esitezi sesitsatfu, futsi balikhandza selifile.
10 Pawula wehla, wafike wagobondzela walibamba,+ watsi: “Ningakhatsateki, ngobe sewuyaphila.”+
11 Wabese ubuyela etulu esitezi, wafike watsatsa kudla* badla. Wachubeka nekukhuluma kwaze kwaba sentsatsakusa, wase uyahamba.
12 Ngako balitsatsa lelijaha seliphilile, futsi bebadvudvuteke kakhulu.
13 Sahamba saya emkhunjini, sase siyesuka siya e-Asosi, lapho besihlose kutsatsa khona Pawula njengobe bekashito, ngobe yena bekatawuya khona ngetinyawo.
14 Watsi nakahlangana natsi e-Asosi, samtsatsa sahamba naye saya eMithilene.
15 Ngakusasa sesuka lapho ngemkhumbi sase sifika macondzana neKhiyosi, kwatsi ngelilanga lelilandzelako sema eSamosi, futsi ngakusasa sefika eMilethusi.
16 Pawula wancuma kwendlula e-Efesu,+ kuze angacitsi sikhatsi esifundzeni sase-Asiya, ngobe bekafuna kutsi nakungenteka afike eJerusalema+ ngelilanga leMkhosi weliPhentekhoste.
17 Ngesikhatsi aseMilethusi watfumela umlayeto e-Efesu, wabita labadzala belibandla.
18 Nabefika watsi kubo: “Nati kahle kutsi bengiphila njani ngesikhatsi nginani kusukela ngelilanga lekucala lengefika ngalo esifundzeni sase-Asiya,+
19 ngisebentela iNkhosi ngekutfobeka lokukhulu,+ ngetinyembeti, nangekuhlupheka lengahlangabetana nako ngenca yemachinga emaJuda;
20 angizange nginigodlele kunitjela konkhe lokulusito,* nekunifundzisa embikwebantfu+ nasemtini ngemuti.+
21 Kodvwa ngafakaza ngalokuphelele kumaJuda nakumaGriki kutsi kufanele aphendvuke,+ abuyele kuNkulunkulu futsi akholwe yiNkhosi yetfu Jesu.+
22 Nyalo ngiholwa* ngumoya waNkulunkulu kutsi ngiye eJerusalema, nanobe ngingatati tintfo letitangehlela khona,
23 ngaphandle kwekutsi kulelo nalelo dolobha umoya longcwele bewusolo ungitjela kutsi ngilindzelwe kuboshwa kanye netinhlupheko.+
24 Nanobe kunjalo, kuphila kwami akusilutfo kimi,* yingci nje nangingacedza indzima yami+ nemsebenti lengiwunikwe yiNkhosi Jesu, wekufakaza ngetindzaba letimnandzi temusa lomkhulu waNkulunkulu.
25 “Ngiyati kutsi nonkhe nine lengashumayela kini ngeMbuso waNkulunkulu ngeke niphindze ningibone.
26 Ngako lamuhla ngifuna nati kutsi ngimsulwa engatini yabo bonkhe bantfu,+
27 ngobe anginigodlelanga kunitjela konkhe lokuyintsandvo* yaNkulunkulu.+
28 Ticapheleni nine+ kanye nawo wonkhe umhlambi, loyo umoya longcwele lonibeke kutsi nibe babonisi bawo,+ futsi neluse libandla laNkulunkulu+ lalitsenga ngengati yeNdvodzana yakhe.+
29 Ngiyati kutsi nasengihambile, lapha emkhatsini wenu kutawuvela timphisi letiyingoti,+ tiwuphatse kabi umhlambi,
30 futsi lapha kini kutawuvela emadvodza latawukhuluma tintfo letisontsekile kuze advonse bafundzi kutsi bawalandzele.+
31 “Ngako-ke hlalani nicaphele, nikhumbula nekutsi busuku nemini, angizange ngiyekele kufundzisa ngamunye wenu ngetinyembeti kwaze kwaphela iminyaka lemitsatfu.+
32 Nyalo senginishiya kuNkulunkulu futsi nginishiya nelivi lelimayelana nemusa wakhe lomkhulu, lelivi litawunakha liphindze lininike lifa lelitawutfolwa ngibo bonkhe labangcwele.+
33 Angizange ngifise lisiliva, ligolide, nobe timphahla temuntfu.+
34 Nani niyati kutsi ngasebenta nganati tami tandla kuze nginakekele tidzingo tami+ netalabo lebebanami.
35 Nginikhombise kanyenti kutsi kufanele nisite lababutsakatsaka ngekutsi nikhandleke,+ futsi kufanele nikhumbule emavi iNkhosi Jesu leyawasho, latsi: ‘Kunenjabulo lenkhulu ekupheni+ kunasekwemukeleni.’”
36 Watsi Pawula nasekacedze kusho tonkhe letintfo, waguca kanye nabo bonkhe, wathantaza.
37 Bonkhe bakhala, bamgaca* futsi bamanga,
38 ngenca yekutsi bebeva buhlungu ngobe bekabatjele kutsi ngeke basaphindze bambone.+ Ngemuva kwaloko bamphekeletela baya emkhunjini.
Imibhalo lengentansi
^ Fundza umbhalo longentansi waMat 28:1.
^ NgesiGriki kutsi, “wahlephula sinkhwa.”
^ Nobe “lokutanizuzisa.”
^ Nobe “ngichutjwa.”
^ Nobe “akukabaluleki kangako kimi.”
^ Nobe “yonkhe injongo.”
^ NgesiGriki kutsi, “bawela entsanyeni yaPawula.”
