Kulandzisa KwaLukha 19:1-48
19 Wabese ungena eJerikho futsi bekendlula.
2 Kuleyondzawo bekunendvodza lebeyibitwa ngekutsi nguZakewu, ingumtselisi lomkhulu futsi injingile.
3 Yetama kubona Jesu, kodvwa yehluleka kumbona ngenca yesicumbi sebantfu njengobe beyiyimfishane.
4 Ngako yagijima embili yagibela esihlahleni semkhiwa* kuze imbone, ngobe Jesu bekatawendlula ngalapho.
5 Watsi Jesu nakefika lapho, wabuka etulu wase utsi kuyo: “Zakewu, yehla masinyane ngobe lamuhla ngitakuvakashela endlini yakho.”
6 Ngako wehla masinyane wamemukela ngenjabulo endlini yakhe.
7 Bantfu batsi nabakubona loku, bonkhe bacala kunhhinhhitela batsi: “Lomuntfu uvakashe endlini yesoni.”+
8 Kodvwa Zakewu wasukuma watsi eNkhosini: “Nkhosi, incenye yetintfo tami ngitayipha labeswele, futsi konkhe lengakutsatsa* kulabanye ngitakubuyisela sekuphindvwe tikhatsi letine.”+
9 Ngako Jesu watsi kuye: “Lamuhla insindziso ifikile kulendlu ngenca yekutsi nawe uyindvodzana ya-Abrahama.
10 Ngobe iNdvodzana yemuntfu yetela kutofuna lebebalahlekile nekutobasindzisa.”+
11 Njengobe bafundzi bakhe bebasalalele, washo lomunye umfanekiso ngobe bekasondzela eJerusalema, futsi bebacabanga kutsi uMbuso waNkulunkulu bewutawuvela ngaso leso sikhatsi.+
12 Watsi: “Lenye indvodza yasebukhosini yaya eveni lelikhashane+ kuze iyobekwa kutsi ibe yinkhosi, bese iyabuya.
13 Yabita tisebenti tayo letingu-10, yatinika emamina* langu-10, yatsi kuto: ‘Wataliseni ngize ngibuye.’+
14 Kodvwa takhamiti taseveni layo betiyitondza, ngako tatfumela emancusa kuyo kuze afike atsi: ‘Asifuni kutsi ube yinkhosi yetfu.’
15 “Yatsi naseyibekiwe kutsi ibe yinkhosi* yabuya, yabita letisebenti lebeyitinikete lemali* kuze ive kutsi tiyitalise kangakanani.+
16 Ngako sisebenti sekucala sefika satsi: ‘Nkhosi, limina lakho ngilitalise ngatfola lamanye langu-10.’+
17 Yatsi kuso: ‘Wente kahle sisebenti lesihle! Njengobe utivete wetsembekile etintfweni letincane kakhulu, yengamela emadolobha langu-10.’+
18 Kwase kuta sisebenti sesibili satsi: ‘Nkhosi, limina lakho ngilitalise ngatfola lamanye lasihlanu.’+
19 Nakulesi yatsi: ‘Nawe yengamela emadolobha lasihlanu.’
20 Kodvwa lesinye sefika satsi: ‘Nkhosi, nali limina lakho, bengisolo ngiligocotele ngendvwangu futsi ngilifihlile.
21 Bengikwesaba kakhulu, ngobe bengati kutsi unelulaka; utsatsa lapho ungazange ubeke khona, uvune nalapho ungazange uhlanyele khona.’+
22 Yatsi kuso: ‘Sisebenti lesibi, ngitakwehlulela ngaloko lokushito. Angitsi bewati kutsi nginelulaka, nekutsi ngitsatsa lapho ngingazange ngibeke khona, ngivune nalapho ngingazange ngihlanyele khona?+
23 Lemali* yami awuyifakanga ngani-ke ebhange? Bengitawutsi nangibuya ngiyitsatse seyinentalo.’
24 “Ngako yatsi kulabo lebebeme edvutane: ‘Tsatsani lelimina lelikuye nilinike lona lonalangu-10.’+
25 Kodvwa batsi kuyo: ‘Nkhosi, lomuntfu sewuvele unemamina langu-10!’
26 Yona yaphendvula yatsi: ‘Ngitsi kini: Wonkhe umuntfu lonalokunyenti utawunikwa lokwengetiwe, kodvwa loyo lote lutfo, utawemukwa ngisho naloko lanako.+
27 Ngako letsani letitsa tami lebetingafuni kutsi ngibe yinkhosi, nitibulale embikwami.’”
28 Jesu watsi nakacedza kusho loku, wachubeka wahamba waya eJerusalema.
29 Nasekasondzela eBhethifage kanye naseBhethani, eNtsabeni Yemincumo,+ watfuma bafundzi bakhe lababili,+
30 watsi kubo: “Hambani niye kulela dolobha, futsi nitawutsi nanisandza kungena kulo nikhandze litfole lembongolo likhungiwe, lokute umuntfu loke waligibela. Nibolikhumula nililetse kimi.
31 Kodvwa nakukhona lonibutako atsi: ‘Nilikhumulelani?’ nibotsi kuye: ‘INkhosi iyalidzinga.’”
32 Ngako labo lebekabatfumile bahamba, batfola kunjengobe bekabatjelile.+
33 Ngesikhatsi balikhumula, banikati balo batsi: “Nilikhumulelani lelitfole?”
34 Bona batsi: “INkhosi iyalidzinga.”
35 Balimikisa kuJesu, bagaca tingubo tabo tangetulu etikwalo, Jesu wase uyaligibela.+
36 Njengobe ahamba, bebendlala tingubo tabo tangetulu emgwacweni.+
37 Ngekushesha nje nabasondzela endleleni leya eNtsabeni Yemincumo, bonkhe bafundzi bajabula futsi baphakamisa emavi badvumisa Nkulunkulu ngato tonkhe timangaliso lebebatibonile,
38 batsi: “Ibusisiwe iNkhosi leta ngelibito laJehova!* Akube nekuthula ezulwini, futsi akakhatinyuliswe Nkulunkulu!”+
39 Labanye baFarisi lebebakulesicumbi batsi kuye: “Mfundzisi, yekhuta labafundzi bakho.”+
40 Kodvwa wabaphendvula watsi: “Ngiyanitjela ngitsi: Kube laba bebangabindza, ematje bekatawumemeta.”
41 Nasekasondzela, walibuka lelidolobha futsi walikhalela,+
42 watsi: “Nyalo kufanele ngabe wena sewuvele uyakucondza loko lokungakuletsela kuthula, kodvwa kufihliwe emehlweni akho.+
43 Sikhatsi siyeta lapho titsa takho titawakha lutsango ngetigodvo leticijile, tikutungelete, futsi tikuvimbetele* kuto tonkhe tinhlangotsi.+
44 Titakubhubhisa kanye nebantfwana bakho labanawe,+ futsi ngeke tishiye litje etikwalelinye litje,+ ngobe wena awuzange usibone sikhatsi sekuhlolwa kwakho.”
45 Ngemuva kwaloko, wangena ethempelini wacosha labo lebebatsengisa,+
46 watsi kubo: “Kubhaliwe kutsi: ‘Indlu yami kutawutsiwa yindlu yemthantazo,’+ kodvwa nine niyente indlu yetigebengu.”+
47 Wachubeka afundzisa ethempelini malanga onkhe. Kodvwa baphristi labakhulu, tati temtsetfo kanye nebaholi bebantfu bebafuna kumbulala,+
48 kepha behluleka kutfola indlela yekukwenta loko, ngobe bonkhe bantfu bebasolo baseceleni kwakhe, bamlalele.+
Imibhalo lengentansi
^ Nobe “semsikhamori.”
^ Nobe “lengakutsatsa ngebucili.”
^ Kulelivesi emamina asho imali. Limina lesiGriki belingemagremu langu-340, futsi belilingana nemadrakma langu-100. Fundza Sandzisanchazo B14.
^ Nobe “ibuse.”
^ NgesiGriki kutsi, “lelisiliva.”
^ NgesiGriki kutsi, “Lelisiliva.”
^ Fundza Sandzisanchazo A5.
^ Nobe “tikuhlasele.”
