Kulandzisa KwaLukha 7:1-50
7 Nasekacedzile kukhuluma nalabantfu, wangena eKhaphanawume.
2 Indvuna yemasotja beyinesisebenti lebeyisitsandza kakhulu, futsi besigulela kufa.+
3 Nayiva ngaJesu, lendvuna yatfuma emadvodza lamadzala emaJuda kutsi ayomcela kutsi ete atophilisa lesisebenti sayo.
4 Ngako afika kuJesu, amncengisisa atsi: “Ulufanele lusito lwakho,
5 ngobe uyasitsandza sive setfu futsi nguye lowasakhela lelisinagoge.”
6 Jesu wahamba nawo. Kodvwa batsi nasebatawufika kulendlu yayo, lendvuna beseyivele itfumele bangani bayo kuJesu kutsi bafike batsi: “Nkhosi ungatihluphi, ngobe akungifaneli ngisho nekukungenisa endlini yami.+
7 Ngako ngikubone kungangifaneli ngisho nekuta kuwe. Kodvwa shano lokutsite khona lesisebenti sami sitawuphila.
8 Nanobe nami ngiphetfwe, kunemasotja langephansi kwami, futsi nangitsi kulelinye lawo: ‘Hamba!’ livele lente njalo, nangitsi kulelinye: ‘Wota lapha!’ livele lite, nangitsi esisebentini sami: ‘Yenta loku!’ sivele sikwente.”
9 Watsi Jesu nakeva loku, wamangala futsi watsi kulesicumbi lebesimlandzela: “Ngitsi kini, angikake ngikutfole kukholwa lokunjengaloku lapha ka-Israyeli.”+
10 Ngako labo lebebatfunyiwe batsi nabefika endlini, batfola lesisebenti sesiphilile.+
11 Ngekushesha nje ngemuva kwaloko, wesuka waya edolobheni lelibitwa ngekutsi yiNayini, futsi bafundzi bakhe nesicumbi lesikhulu sebantfu bebahamba naye.
12 Njengobe bekasondzela esangweni lalelidolobha, bantfu bebatfwele indvodza leshonile lebeyikuphela kwayo kumake wayo,+ kantsi futsi lomake bekangumfelokati. Bantfu labanyenti bakulelo dolobha bebanalomfelokati.
13 Ngesikhatsi iNkhosi imbona lomake, yamhawukela,+ yatsi kuye: “Ungakhali.”+
14 Yasondzela yatsintsa loluhlaka, futsi labo lebebalutfwele bema. Yase itsi: “Ndvodzana, ngitsi kuwe: Vuka!”+
15 Lomuntfu lobekafile wavuka wacala kukhuluma, futsi Jesu wambuyisela kumake wakhe.+
16 Bonkhe bantfu besaba kakhulu, badvumisa Nkulunkulu batsi: “Sesinemphrofethi lomkhulu,”+ baphindze batsi: “Nkulunkulu ubahawukele bantfu bakhe.”+
17 Letindzaba letimayelana naJesu tagcwala kuyo yonkhe iJudiya nakuto tonkhe tindzawo lebetisondzelene nayo.
18 Bafundzi baJohane bambikela ngato tonkhe tintfo lebetentiwa nguJesu.+
19 Ngako Johane watfuma bafundzi bakhe lababili kutsi baye kuJesu, bafike bambute batsi: “Unguye yini Loyo Lotako,+ nobe kusafanele silindzele lomunye?”
20 Nabefika kuJesu, labafundzi batsi: “Johane uMbhabhatisi usitfume kuwe kutsi sitobuta kutsi: ‘Unguye yini Loyo Lotako, nobe kusafanele silindzele lomunye?’”
21 Ngaleso sikhatsi, welapha bantfu labanyenti lebebanetifo,+ ngisho naletimatima imbala, nalebebaphetfwe ngemadimoni, welapha nalabangaboni emehlweni, wabenta babona.
22 Wase uyabaphendvula utsi: “Hambani niyobikela Johane loko lenikubonile nalenikuvile, nitsi: Labangaboni emehlweni sebayabona,+ labachutako sebahamba kahle, labanebulephelo bayahlanjululwa, labangeva etindlebeni sebayeva,+ labafile bayavuswa, nalabeswele beva tindzaba letimnandzi letishunyayelwa kubo.+
23 Uyajabula loyo lote sizatfu sekungabata ngami.”+
24 Nasebahambile labafundzi baJohane, Jesu wakhuluma nalesicumbi sebantfu mayelana naJohane, watsi: “Ngesikhatsi nisuka niya ehlane, beniyele kuyobonani? Beniyele kuyobona umhlanga upheshulwa ngumoya yini?+
25 Beniyobonani vele? Beniyobona umuntfu lowembetse tingubo letinhle?+ Anati yini kutsi labo labembatsa tingubo letinhle nalabaphila kamnandzi basetindlini temakhosi?
26 Kantsi vele beniyobonani? Beniyobona umphrofethi? Ecinisweni nabona umuntfu lomkhulu kakhulu kunemphrofethi.+
27 Lona nguye lokwabhalwa ngaye nakutsiwa: ‘Ngitfumela sitfunywa sami embikwakho,* sona sitakulungisela indlela.’+
28 Ngitsi kini: Kubo bonkhe labake baphila emhlabeni, kute ngisho namunye lowaba mkhulu kunaJohane, kodvwa loyo lomncane eMbusweni waNkulunkulu mkhulu kunaye.”+
29 (Nabeva loku, bonkhe bantfu nebatselisi batsi Nkulunkulu ulungile, ngobe bona bebabhajatiswe nguJohane.+
30 Kodvwa baFarisi nalabo lebebati uMtsetfo abasinakanga sicondziso* saNkulunkulu,+ ngobe bona bebangakabhajatiswa nguJohane.)
31 “Bantfu balesitukulwane ngingabafanisa nabani?+
32 Banjengebantfwana labasetimakethe labamemetana bodvwa, batsi: ‘Sinishayele imintjingo kodvwa nangadansi; salila kodvwa nangasidzindzi sililo.’
33 Johane uMbhabhatisi weta angadli futsi anganatsi,+ kodvwa nine nitsi: ‘Unelidimoni.’
34 INdvodzana yemuntfu yona ifike yadla futsi yanatsa, kodvwa nine nitsi: ‘Asenibuke lomuntfu! Usimiti nemnatsi weliwayini, futsi ungumngani webatselisi netoni!’+
35 Kepha kuhlakanipha kubonakala kulungile* ngemisebenti yako.”*+
36 BekunemFarisi lobekasolo amema Jesu kutsi ayodla naye. Ngako wangena endlini yalomFarisi futsi wahlala etafuleni.
37 Umfati lotsite lobekatiwa ngekutsi usoni, weva kutsi Jesu usendlini yalomFarisi. Weta nesigujana lebesakhiwe ngelitje lelimhlophe lebesinemafutsa lanemakha.+
38 Wafike wahlala ngemuva kwaJesu, ngasetinyaweni takhe, wakhala waze wamantisa tinyawo taJesu ngetinyembeti, futsi watesula ngetinwele takhe. Waphindze watanga letinyawo wase utigcobisa ngalamafutsa lanemakha.
39 Nakakubona loku, lomFarisi lobekameme Jesu wacabanga watsi: “Kube lomuntfu ungumphrofethi mbamba ngabe uyati kutsi ungubani lomfati lomtsintsako, futsi ngabe uyati kutsi usoni.”+
40 Jesu watsi kuye: “Simoni,* kukhona lengifuna kukutjela kona.” Yena watsi: “Mfundzisi, khuluma!”
41 “Bekunemadvodza lamabili lebekakweleta umuntfu lotsite; lenye beyimkweleta bodenariyo* labangu-500, lelenye imkweleta bodenariyo labangu-50.
42 Ngesikhatsi lamadvodza angasakhoni kumbhadala, lomuntfu wawacolela ngekukhululeka. Ngako-ke nguyiphi kulamadvodza letamtsandza kakhulu?”
43 Simoni wamphendvula watsi: “Ngicabanga kutsi ngulena lebeyimkweleta kakhulu.” Yena watsi kuye: “Uphendvule kahle.”
44 Ngemuva kwaloko wabuka lomfati, wase utsi kuSimoni: “Uyambona yini lomfati? Mine ngingene lapha endlini yakho, kodvwa awukangiphi emanti ekugeza tinyawo. Kepha yena umantise tinyawo tami ngetinyembeti takhe futsi watesula ngetinwele takhe.
45 Wena awukangangi, kodvwa lomfati bekasolo anga tinyawo tami kusukela ngifikile lapha.
46 Awukayigcobisi inhloko yami ngemafutsa, kodvwa yena ugcobise tinyawo tami ngemafutsa lanemakha.
47 Ngiyakutjela ngitsi tono takhe setitsetselelwe+ nanobe betitinyenti,* ngobe ukhombise lutsandvo lolukhulu. Kodvwa loyo lotsetselelwe lokuncane, uba nelutsandvo loluncane.”
48 Ngako wase utsi kulomfati: “Tono takho titsetselelwe.”+
49 Labo lebebahleti naye etafuleni bakhuluma bodvwa batsi: “Kantsi ungubani lomuntfu lotsetselela ngisho netono?”+
50 Kodvwa Jesu watsi kulomfati: “Kukholwa kwakho kukusindzisile;+ hamba ngekuthula.”
Imibhalo lengentansi
^ NgesiGriki kutsi, “embikwebuso bakho.”
^ Nobe “injongo.”
^ Nobe “kuliciniso.”
^ Nobe “ngemiphumela yako.”
^ Leli ligama lalomFarisi lomeme Jesu.
^ Fundza Sandzisanchazo B14.
^ Nobe “betitinkhulu.”
