Kulandzisa KwaMatewu 17:1-27
17 Nasekwendlule emalanga lasitfupha, Jesu watsatsa Phetro, Jakobe naJohane umnakabo, wenyukela nabo entsabeni lephakeme, baba bodvwa.+
2 Wase uyashintja embikwabo; buso bakhe bakhanya njengelilanga, netingubo takhe tangetulu takhanya bha!*+
3 Kusenjalo, babona Mosi na-Elija bakhuluma naye.
4 Phetro watsi kuJesu: “Nkhosi, kuhle kutsi sibe lapha. Nawutsandza, ngingakha emathende lamatsatfu, linye libe lakho, lelinye libe laMosi futsi lelinye libe la-Elija.”
5 Watsi asakhuluma, kwavela lifu lelikhanyako labasibekela, kwase kuvakala livi livela kulelifu litsi: “Lena yiNdvodzana yami letsandzekako nalengiyemukele.+ Yilaleleni.”+
6 Labafundzi batsi nabeva loko, besaba kakhulu futsi baguca batsintsa ngebuso phansi.
7 Jesu wasondzela kubo, wababamba, wabese utsi kubo: “Sukumani, ningesabi.”
8 Batsi nabavula emehlo, babona Jesu kuphela.
9 Nabasehla entsabeni, Jesu watsi kubo: “Ningatjeli muntfu ngalombono, kuze kube ngulapho iNdvodzana yemuntfu seyivusiwe ekufeni.”+
10 Labafundzi bambuta batsi: “Kwentiwa yini-ke kutsi tati temtsetfo titsi kufanele kufike Elija kucala?”+
11 Jesu wabaphendvula watsi: “Vele Elija uyeta, futsi utawubuyisela tonkhe tintfo esimeni sato.+
12 Kepha ngitsi kini: Elija sewefika, kodvwa abazange babone kutsi nguye, esikhundleni saloko benta labakutsandzako kuye.+ NeNdvodzana yemuntfu batayihlupha ngendlela lefanako.”+
13 Labafundzi base bayabona kutsi abekhuluma ngaJohane uMbhabhatisi.
14 Batsi nasebasondzela esicunjini sebantfu,+ indvodza letsite yeta kuJesu yafike yaguca embikwakhe yatsi:
15 “Nkhosi, mane uhawukele indvodzana yami ngobe inesifo sekuwa futsi isesimeni lesibucayi, ihlale iwela emlilweni nasemantini.+
16 Ngiyiletsile kubafundzi bakho, kodvwa behlulekile kuyiphilisa.”
17 Jesu watsi: “Awu nine situkulwane lesingakholwa nalesigwegwile,+ kufanele ngichubeke nginani sikhatsi lesingakanani? Ngitanibeketelela kuze kube ngunini? Mletseni lapha lomfana.”
18 Jesu walekhuta lelidimoni, lase liyaphuma kulomfana, futsi waphila ngaleso sikhatsi.+
19 Bafundzi baJesu beta kuye sebabodvwa, batsi: “Kwentiwe yini kutsi tsine sehluleke kulikhipha?”
20 Yena watsi kubo: “Kungobe kukholwa kwenu kuncane. Ngicinisile ngitsi kini: Kube kukholwa kwenu bekungangenhlanyelo yesinaphi, benitawutsi kulentsaba: ‘Suka lana uye lapha,’ ivele isuke, futsi kute lobekunganehlula.”+
21 *——
22 Ngesikhatsi bahlangene eGalile, Jesu watsi kubo: “INdvodzana yemuntfu itawunikelwa* kubantfu,+
23 futsi batayibulala, kutsi ngelilanga lesitsatfu ivuswe.”+ Nabeva loko, bafundzi bakhe beva buhlungu kakhulu.
24 Nasebafikile eKhaphanawume, emadvodza labetsatsa umtselo welithempeli* eta kuPhetro atsi: “Umfundzisi wenu uyawukhipha yini umtselo welithempeli?”+
25 Phetro watsi: “Yebo uyawukhipha.” Kepha watsi nakangena endlini, Jesu wakhuluma kucala, watsi: “Ucabangani Simoni? Emakhosi atselisa bobani? Atselisa emadvodzana awo yini nobe atselisa luntfu?”
26 Phetro watsi: “Atselisa luntfu.” Jesu wase utsi: “Yebo, emadvodzana awo akudzingeki awukhiphe umtselo.
27 Kodvwa-ke kute singabakhubi,+ hamba uye elwandle ufike ujike lidweba emantini, bese utsatsa inhlanti yekucala lotayibamba. Utawutsi nawuvula umlomo wayo utfole luhlavu lwelisiliva.* Ubolutsatsa, ubanike lona, usitselele sobabili.”
Imibhalo lengentansi
^ Nobe “taba mhlophe cwa!”
^ Fundza Sandzisanchazo A3.
^ Nobe “itawutsengiswa.”
^ NgesiGriki kutsi, “emadrakma lamabili.” Fundza Sandzisanchazo B14.
^ Lena yimali lokucatjangwa kutsi ingemadrakma lamane. Fundza Sandzisanchazo B14.
