Sembulo Lesembulelwa Johane 19:1-21
19 Ngemuva kwaletintfo, ngeva lobekunjengelivi lelikhulu lesicumbi lesikhulu ezulwini. Besitsi: “Dvumisani Jehova!+ Insindziso, inkhatimulo nemandla kwaNkulunkulu wetfu,
2 ngobe tehlulelo takhe tiliciniso futsi tilungile.+ Wehlulele ingwadla lenkhulu leyone umhlaba ngebugwadla* bayo, waphindziselela nengati yetinceku takhe lesetandleni tayo.”*+
3 Ngaso leso sikhatsi lesicumbi sakhuluma kwesibili satsi: “Dvumisani Jehova!+ Intfutfu yekusha kwayo ichubeka yenyuka phakadze naphakadze.”+
4 Labadzala labangu-24+ netidalwa letine letiphilako,+ bakhotsama bakhonta Nkulunkulu lohleti esihlalweni sebukhosi, batsi: “Amen! Dvumisani Jehova!”+
5 Kwaphuma nelivi livela esihlalweni sebukhosi, latsi: “Dvumisani Nkulunkulu wetfu, nonkhe nine tinceku takhe+ lenimesabako, kusukela kulabancane kuya kulabakhulu.”+
6 Ngeva nelivi lebelinjengelivi lesicumbi lesikhulu, nanjengemsindvo wemanti lamanyenti kanye nekudvuma lokukhulu kwelitulu. Belitsi: “Dvumisani Jehova,+ ngobe Jehova* Nkulunkulu wetfu, longuSomandla,+ sewucalile kuba yinkhosi.+
7 Asitfokote, sijabule kakhulu, futsi simkhatimulise, ngobe umshado weliWundlu sewufikile, namakoti walo sewutilungiselele.
8 Uvunyelwe kutsi agcoke ilineni lekhanyako, lehlantekile, nalecolisakele, ngobe ilineni lecolisakele imelela imisebenti lelungile yalabangcwele.”+
9 Ingilosi yatsi kimi: “Bhala utsi: Bayajabula labo labamenywe esidlweni sakusihlwa semshado weliWundlu.”+ Yaphindze yatsi: “Lawa ngemavi aNkulunkulu laliciniso.”
10 Ngaso leso sikhatsi ngawela ngasetinyaweni tayo kuze ngiyikhonte. Kodvwa yona yatsi kimi: “Ungakwenti loku!+ Ngobe ngimane nje ngiyinceku njengawe nanjengebazalwane bakho labanemsebenti wekufakaza ngaJesu.+ Ngako khonta Nkulunkulu,+ ngobe injongo yesiphrofetho kufakaza ngaJesu.”+
11 Ngabona lizulu livulekile, futsi bekunelihhashi lelimhlophe.+ Loyo loligibele ubitwa ngekutsi nguLowetsembekile+ naloLiciniso,+ wehlulela aphindze alwe ngekulunga.+
12 Emehlo akhe anjengelilangabi lemlilo,+ nasenhloko yakhe kunemichele* leminyenti. Uneligama lelibhaliwe lokute lolatiko ngaphandle kwakhe,
13 ugcoke ingubo yangetulu lenengati,* futsi ubitwa ngekutsi nguLivi+ waNkulunkulu.
14 Emabutfo asezulwini bekamlandzela ngemahhashi lamhlophe, agcoke ilineni lemhlophe, lehlantekile, futsi lecolisakele.
15 Emlonyeni wakhe kuphuma inkemba lekhaliphako+ futsi lendze latawushaya ngayo tive; utawutelusa ngentfonga yensimbi.+ Ngetulu kwaloko, ugcobagcoba litje lekuhluta lentfukutselo yelulaka lwaNkulunkulu Somandla.+
16 Engutjeni yakhe yangetulu, lokusho kutsi etsangeni lakhe, kuneligama lelibhaliwe lelitsi: Nkhosi yemakhosi neMbusi webabusi.+
17 Ngabona nengilosi ime elangeni, futsi yamemeta ngelivi lelikhulu kuto tonkhe tinyoni letindiza emoyeni* yatsi: “Wotani lapha, nibutsane ndzawonye esidlweni sakusihlwa lesikhulu saNkulunkulu,+
18 kuze nidle inyama yemakhosi, yetindvuna temphi, yemadvodza lanemandla,+ yemahhashi neyebagibeli bawo,+ nidle nenyama yabo bonkhe, labakhululekile nalabatigcili, labancane nalabakhulu.”
19 Ngabona silwane sesiganga, emakhosi emhlaba nemabutfo awo, babutsene ndzawonye kuze balwe naloyo logibele lihhashi kanye nelibutfo lakhe.+
20 Lesilwane sesiganga sabanjwa kanye nemphrofethi wemanga+ lowenta tibonakaliso embikwaso, ladukisa ngato labo labemukele luphawu lwesilwane sesiganga,+ nalabo labakhonta umfanekiso waso.+ Bobabili bajikwa basaphila echibini lemlilo lelivutsa sibabule.+
21 Kodvwa bonkhe labanye babulawa ngalenkemba lendze leyaphuma emlonyeni waloyo logibele lihhashi.+ Tonkhe tinyoni tesutsa inyama yabo.+
Imibhalo lengentansi
^ Ligama lesiGriki lelihunyushwe ngekutsi “bugwadla,” lifaka ekhatsi tonkhe tinhlobo tekulalana letingemukeleki kuNkulunkulu. NgesiGriki kutsi por·neiʹa. Fundza Tinchazelo Temagama.
^ NgesiGriki kutsi, “lesesandleni sayo.”
^ Fundza Sandzisanchazo A5.
^ Nobe “kunemichele yasebukhosini.”
^ Kungaphindze kubekwe ngekutsi, “lefafatwe ngengati.”
^ Nobe “esibhakabhakeni; etulu.”
