Tihlabelelo 119:1-176
-
Kubonga ngelivi laNkulunkulu leliligugu
-
“Yini umuntfu lomusha lokufanele ayente kuze aphile imphilo lehlantekile?” (9)
-
“Ngiyakutsandza loko longikhumbuta kona” (24)
-
“Maye ngiyawutsandza umtsetfo wakho!” (97)
-
“Ngihlakaniphe kakhulu kwendlula bonkhe labangifundzisako” (99)
-
“Livi lakho lisibane lesicondzisa tinyawo tami” (105)
-
“Onkhe emavi akho aliciniso” (160)
-
Kuthula kulabo labatsandza umtsetfo waNkulunkulu (165)
-
א [Aleph]
119 Bayajabula labo labaphila imphilo lemsulwa,*Labo labahamba ngemtsetfo waJehova.+
2 Bayajabula bantfu labenta loko labakhumbuta kona,+Labo labamfunisisa ngenhlitiyo yabo yonkhe.+
3 Abakwenti lokungakalungi;Bahamba etindleleni takhe.+
4 Wena usiyalile,Watsi kufanele siyigcine ngekucophelela imitsetfo yakho.+
5 Ngifisa kuhlala ngetsembekile+Kuze ngikhone kugcina imitsetfo yakho.
6 Loko kutawungenta ngingahlazeki+Nangihlolisisa yonkhe imitsetfo yakho.
7 Ngitakudvumisa ngenhlitiyo lecotfoNangifundza ngetehlulelo takho letilungile.
8 Ngitayigcina imitsetfo yakho.
Shengatsi ungete wangishiya.
ב [Beth]
9 Yini umuntfu lomusha lokufanele ayente kuze aphile imphilo lehlantekile?
Kufanele alalele livi lakho.+
10 Ngikufuna ngenhlitiyo yami yonkhe.
Ungavumi kutsi ngiphambuke emitsetfweni yakho.+
11 Loko lokushito ngikulondvolote enhlitiyweni yami,+Kuze ngingoni kuwe.+
12 Awu Jehova, shengatsi ungadvunyiswa;Ngifundzise imitsetfo yakho.
13 Ngemlomo wami ngimemetelaTonkhe tehlulelo lotikhiphile.
14 Kuyangijabulisa loko longikhumbuta kona,+Kungijabulisa kwendlula tonkhe letinye tintfo letiligugu.+
15 Ngitawucabangisisa* ngemitsetfo yakho+Futsi emehlo ami ngeke esuke etindleleni takho.+
16 Ngiyayitsandza imitsetfo yakho.
Angeke ngilikhohlwe livi lakho.+
ג [Gimel]
17 Ngentele umusa, mine nceku yakhoKuze ngiphile futsi ngigcine livi lakho.+
18 Vula emehlo ami kuze ngitibone kahleTintfo letimangalisako letisemtsetfweni wakho.
19 Ngifana nesihambi kulelinye live.+
Ungangifihleli imitsetfo yakho.
20 Ngihlale ngiyilangatelelaNjalo imitsetfo yakho.
21 Uyabekhuta labatigabatisako,Labo labacalekiswe ngobe bangayilaleli imitsetfo yakho.+
22 Bente bayekele kungedzelela, futsi ubente bayekele kungibukela phansi,Ngobe ngikwentile loko longikhumbute kona.
23 Ngisho nalapho baholi bahlangene futsi bakhuluma kabi ngami,Mine nceku yakho ngitawucabangisisa* ngemitsetfo yakho.
24 Ngiyakutsandza loko longikhumbuta kona;+Kufanana nebantfu labangelulekako.+
ד [Daleth]
25 Ngibhabhalele elutfulini.+
Londvolota kuphila kwami njengobe wetsembisile.+
26 Ngikutjele yonkhe intfo lengiyentako, futsi wena wangiphendvula;Ngifundzise imitsetfo yakho.+
27 Ngente ngikucondze loko lokushiwo yimitsetfo yakho,Kuze ngicabangisise* ngemisebenti yakho lemangalisako.+
28 Bengingasakhoni kulala ngenca yelusizi.
Ngiphe emandla njengobe wetsembisile.
29 Ngisite ngingabi ngumuntfu wemanga,+Ngentele umusa ngekutsi ungifundzise umtsetfo wakho.
30 Ngitimisele kuhlala ngetsembekile.+
Ngiyabona kutsi tehlulelo takho tilungile.
31 Ngibambelela kuloko longikhumbuta kona.+
Awu Jehova, ungavumi kutsi ngidvumateke.*+
32 Ngitayilalela ngekutimisela imitsetfo yakho,Ngobe wena wenta kutsi ngiyicondze kancono.*
ה [He]
33 Awu Jehova, ngifundzise+ kulalela imitsetfo yakho,Futsi ngitawuhlale ngiyilalela.+
34 Ngente ngihlakaniphe,Kuze ngilalele umtsetfo wakhoFutsi ngiwugcine ngenhlitiyo yami yonkhe.
35 Ngicondzise kuze ngilalele* imitsetfo yakho,+Ngobe iyangijabulisa.
36 Yenta kutsi inhlitiyo yami ikutsandze loko longikhumbuta kona,Ingabi nebugovu.*+
37 Yenta kutsi emehlo ami angakubuki lokungenamsebenti;+Ungente ngihambe endleleni yakho kuze ngichubeke ngiphila.
38 Gcina setsembiso lowasenta kimi, mine nceku yakho,Kuze bantfu bakwesabe.*
39 Susa lihlazo lengilesabako,Ngobe tehlulelo takho tilungile.+
40 Maye ngiyayilangatelela imitsetfo yakho.
Londvolota kuphila kwami ngobe wena ulungile.
ו [Waw]
41 Awu Jehova, shengatsi ungangentela umusa,*+Ungisindzise njengobe wetsembisile;+
42 Mine ngitawubese ngiyakhona kumphendvula longetfukako,Ngobe ngetsembele evini lakho.
43 Shengatsi ungete walisusa livi leliliciniso emlonyeni wami,Ngobe ngetsembele etincumeni takho.
44 Ngitawuchubeka ngiwugcina umyalo wakhoKuze kube phakadze.+
45 Ngitawuhamba ngikhululekile endzaweni lephephile,+Ngobe ngifuna kuyigcina imitsetfo yakho.
46 Ngisho nasembikwemakhosi ngitawukhuluma ngemitsetfo yakho,Futsi angeke ngibe nemahloni.+
47 Ngiyayitsandza imitsetfo yakho,Ngiyitsandza mbamba.+
48 Ngitawuthantaza ngiphakamise tandla tami ngenca yemitsetfo yakho lengiyitsandzako,+Futsi ngitawucabangisisa* ngemiyalo yakho.+
ז [Zayin]
49 Khumbula lowakusho kimi,* mine nceku yakho,Loko lowakusho kute ungente ngibe nelitsemba.
50 Kuyangidvudvuta ekuhluphekeni kwami,+Ngobe loko lowakusho kungenta ngichubeke ngiphila.
51 Labatigabatisako sebahlale bahlekisa ngami,Kodvwa angiphambuki emtsetfweni wakho.+
52 Awu Jehova, ngiyatikhumbula tehlulelo takho takadzeni,+Futsi tiyangidvudvuta.+
53 Ngitfukutsele ngiyabilelana ngenca yalababi,Labangawulaleli umtsetfo wakho.+
54 Imitsetfo yakho ingumgogodla wetingoma lengitihlabelaNome ngukuphi langihlala khona.*
55 Awu Jehova, ebusuku ngikhumbula libito lakho,+Kuze ngitewugcina umtsetfo wakho.
56 Lena sekwaba yindlela yami yekuphila,Ngobe ngiyilalele imiyalo yakho.
ח [Heth]
57 Jehova, wena usabelo sami;+Ngetsembisile kutsi ngitakwenta loko lokushoko.+
58 Ngikucela ngenhlitiyo yami yonkhe;+Ngentele umusa+ njengobe wetsembisile.
59 Ngiyihlolisisile indlela lengiphila ngayo,Kuze ngiphindze ngiphile ngekuvumelana naloko longikhumbuta kona.+
60 Ngivele ngisheshe futsi ngingacitsi sikhatsi
Kulalela imitsetfo yakho.+
61 Lababi bangitungelete ngetintsambo tabo,Kodvwa angiwukhohlwa umtsetfo wakho.+
62 Ekhatsi nebusuku ngiyavuka ngikubonge+Ngetehlulelo takho letilungile.
63 Ngingumngani wabo bonkhe labakwesabako,Newalabo labagcina imitsetfo yakho.+
64 Awu Jehova, lutsandvo lwakho lolucotfo lugcwele emhlabeni wonkhe;+Ngifundzise imiyalo yakho.
ט [Teth]
65 Wena uyentele lokuhle inceku yakho,Njengobe wetsembisile Jehova.
66 Ngente ngibe nekucondza kanye nelwati,+Ngobe ngetsembele emitsetfweni yakho.
67 Ngake ngaphambuka, ngase ngiyahlupheka,Kodvwa nyalo sengiyakulalela lokushoko.+
68 Wena umuhle,+ nemisebenti yakho mihle.
Ngifundzise imiyalo yakho.+
69 Bantfu labatigabatisako bakhuluma emanga ngami,Kodvwa imitsetfo yakho ngiyigcina ngayo yonkhe inhlitiyo yami.
70 Banetinhlitiyo letilukhuni,+Kodvwa mine ngiyawutsandza umtsetfo wakho.+
71 Kusitile kutsi ngihlupheke,+Ngobe sengiyayicondza imiyalo yakho.
72 Umtsetfo lophuma kuwe muhle kimi,+Muhle kakhulu kwendlula lisiliva neligolide lelinyenti.+
י [Yod]
73 Wangidala futsi wangibumba ngetandla takho.
Ngente ngihlakaniphe,Kuze ngicondze imitsetfo yakho.+
74 Labo labakwesabako batsi nabangibona bajabule,Ngobe ngetsembele evini lakho.*+
75 Awu Jehova, ngiyati kutsi tehlulelo takho tilungile+Nekutsi ungijezise ngobe wetsembekile.+
76 Ngicela ungidvudvute ngemusa wakho,*+Njengobe ungetsembisile mine nceku yakho.
77 Ngentele umusa kuze ngichubeke ngiphila,+Ngobe ngiyawutsandza umtsetfo wakho.+
78 Shengatsi bantfu labatigabatisako bangahlazeka,Ngobe bangiphatsa kabuhlungu ngaphandle kwesizatfu.
Kodvwa mine ngitawucabangisisa* ngemitsetfo yakho.+
79 Shengatsi labo labakwesabako bangabuya kimi,Labo labacondza tecwayiso* takho.
80 Shengatsi imiyalo yakho ngingayilalela ngenhlitiyo yami yonkhe,+Kuze ngingahlazeki.+
כ [Kaph]
81 Ngiyakulangatelela kusindziswa nguwe,+Ngobe ngetsembele evini lakho.*
82 Emehlo ami ayasilangatelela setsembiso sakho+Njengobe ngitibuta ngitsi: “Utangidvudvuta nini?”+
83 Ngobe sengifana nesikhwama sesikhumba lesomiswe yintfutfu,Kodvwa imiyalo yakho angiyikhohlwa.+
84 Kutawuze kube ngunini solo ngilindzile?
Utabehlulela nini labo labangiphatsa kabi?+
85 Bantfu labatigabatisako bangigubhela imigodzi,Lokungulabo labangawuhloniphi umtsetfo wakho.
86 Yonkhe imitsetfo yakho yetsembekile.
Ngisite, ngobe bantfu bangiphatsa kabi ngaphandle kwesizatfu.+
87 Bacishe bangibulala,Kodvwa angizange ngiyishiye imitsetfo yakho.
88 Londvolota kuphila kwami ngenca yekutsi wena unemusa,*Kuze ngikhone kulalela loko longikhumbuta kona.
ל [Lamed]
89 Awu Jehova, livi lakho lihlala kuze kube phakadze,Livi lakho litawuhlala likhona njengemazulu.+
90 Wena uhlala wetsembekile kusukela kulesinye situkulwane kuye kulesinye.+
Umhlaba uwumise wacina kuze uchubeke ukhona.+
91 Ngenca yemitsetfo yakho, konkhe lokudalile kusekhona nalamuhla,Ngobe konkhe kutinceku takho.
92 Kube bengingawutsandzi umtsetfo wakho,Ngabe ngacedvwa tinhlupheko tami.+
93 Angeke ngize ngiyikhohlwe imitsetfo yakho,Ngobe kuphila kwami ukulondvolote ngayo.+
94 Mine ngiwakho, ngisindzise,+Ngobe ngiyafuna kulalela imitsetfo yakho.+
95 Bantfu lababi bafuna kungibulala,Kodvwa mine ngiyakunakisisa loko longikhumbuta kona.
96 Ngibone tintfo letinyenti letingenasici,Kodvwa umtsetfo wakho uncono kakhulu kunato.
מ [Mem]
97 Maye ngiyawutsandza umtsetfo wakho!+
Ngicabangisisa* ngawo lilanga lonkhe.+
98 Umtsetfo wakho ungenta ngihlakaniphe kwendlula titsa tami,+Ngobe ngihlale ngicondziswa ngiwo.
99 Ngihlakaniphe kakhulu kwendlula bonkhe labangifundzisako,+Ngobe ngiyacabangisisa* ngaloko longikhumbuta kona.
100 Ngihlakaniphe kwendlula emadvodza lamadzala,Ngobe ngiyayilalela imitsetfo yakho.
101 Ngiyakubalekela kuhamba etindleleni letimbi,+Kuze ngilalele livi lakho.
102 Angiyishiyi imitsetfo yakho,Ngobe wena ungifundzisile.
103 Maye amnandzi emavi akho elulwimini lwami,Amnandzi kakhulu kwendlula luju!+
104 Imitsetfo yakho ingenta ngihlakaniphe.+
Kungako ngikwenyanya konkhe lokungemanga.+
נ [Nun]
105 Livi lakho lisibane lesicondzisa tinyawo tami,Futsi likukhanya lokukhanyisa indlela yami.+
106 Ngente sifungo futsi ngitasigcina,Ngifunge kutsi ngitayilalela imitsetfo yakho lelungile.
107 Sengihlupheke kakhulu.+
Awu Jehova, londvolota kuphila kwami njengobe wetsembisile.+
108 Awu Jehova, ngicela uyemukele iminikelo yami yekukudvumisa lengiyenta ngekutitsandzela,*+Futsi ungifundzise imitsetfo yakho.+
109 Kuphila kwami kuhlale kusengotini,Kodvwa angikawukhohlwa umtsetfo wakho.+
110 Bantfu lababi bangibekele lugibe,Kodvwa angikayishiyi imiyalo yakho.+
111 Ngitawuhlale ngikukhumbula* loko longikhumbuta kona,Ngobe kuyayijabulisa inhlitiyo yami.+
112 Ngitimisele kulalela imiyalo yakho,Ngitawuhlale ngiyilalela ngize ngiyokufa.
ס [Samekh]
113 Ngiyabenyanya bantfu labangenti tintfo ngenhlitiyo yabo yonkhe,*+Kodvwa ngiyawutsandza umtsetfo wakho.+
114 Wena uyindzawo yami yekukhosela futsi usihlangu sami,+Ngobe ngetsembele evini lakho.*+
115 Sukani kimi nine bantfu lababi,+Kuze ngigcine imitsetfo yaNkulunkulu wami.
116 Awu Nkulunkulu, ngisite njengobe wetsembisile,+Kuze ngichubeke ngiphila;Ungangijabhisi ngobe ngetsembele kuwe.+
117 Ngisite kuze ngisindziswe;+Futsi ngitawubese ngiyachubeka nginaka imitsetfo yakho.+
118 Uyabenyanya bonkhe labashiya imitsetfo yakho,+Ngobe banemanga futsi bayakhohlisa.
119 Bonkhe bantfu lababi emhlabeni ubalahla kuhle kwentfo lengenamsebenti.+
Kungako ngititsandza tintfo longikhumbuta tona.
120 Umtimba wami uyachachatela ngenca yekukwesaba;Tehlulelo takho ngiyatesaba.
ע [Ayin]
121 Mine ngente lokulungile futsi ngehlulela kahle.
Ungangiyekeleli kulabo labangicindzetelako.
122 Yenta kutsi tonkhe tintfo tiyihambele kahle inceku yakho;Shengatsi labo labatigabatisako bangete bangicindzetela.
123 Emehlo ami sekaze abona kalufifi solo ngimele kusindziswa nguwe,+Futsi ngimele setsembiso sakho+ lesitawufezeka nakanjani.
124 Ngentele umusa,* mine nceku yakho,+Futsi ungifundzise imiyalo yakho.+
125 Mine ngiyinceku yakho, ngente ngihlakaniphe,+Kuze ngiticondze tecwayiso* takho.
126 Awu Jehova, sesifikile sikhatsi sekutsi ubajezise,+Ngobe bephule umtsetfo wakho.
127 Ngiyayitsandza imitsetfo yakhoNgiyitsandza kwendlula ligolide, kwendlula ligolide lelicwengisisiwe.+
128 Ngako tonkhe ticondziso letivela kuwe ngititsatsa njengaletilungile;+Konkhe lokungemanga ngiyakwenyanya.+
פ [Pe]
129 Tintfo longikhumbuta tona tinhle.
Kungako ngitenta.
130 Kwati emavi akho kuletsa kukhanya,+Kwenta umuntfu longenalwati ahlakaniphe.+
131 Ngomele imitsetfo yakhoFutsi ngiyilangatelela kakhulu.+
132 Nginake futsi ungentele umusa,+Njengobe uhlale wenta* kulabo labatsandza libito lakho.+
133 Ngicondzise ngelivi lakho;Ungavumi kutsi lokubi kungincobe.+
134 Ngikhulule kubantfu labangicindzetelako,Futsi mine ngitayigcina imitsetfo yakho.
135 Ngentele umusa, mine nceku yakho,+Ungifundzise nemiyalo yakho.
136 Kuhushuka tinyembeti emehlweni amiNgobe bantfu abawulaleli umtsetfo wakho.+
צ [Tsade]
137 Awu Jehova, wena ulungile,+Futsi wehlulela ngendlela lelungile.+
138 Tecwayiso* takho tilungileFutsi tetsembeke mbamba.
139 Kushiseka kwami kufana nemlilo lovutsa ngekhatsi kimi,+Ngobe titsa tami tiwakhohliwe emavi akho.
140 Livi lakho lihlanteke mbamba,+Futsi inceku yakho iyalitsandza.+
141 Bantfu bangibukela phansi futsi bayangenyanya;+Kodvwa angikayikhohlwa imitsetfo yakho.
142 Kulunga kwakho kukulunga lokutawuhlala kuze kube phakadze,+Futsi umtsetfo wakho uliciniso.+
143 Nanobe ngicindzeteleka futsi ngibhekana nebumatima,Ngichubeka ngiyitsandza imitsetfo yakho.
144 Loko longikhumbuta kona kutawuhlala kulungile kuze kube phakadze.
Ngente ngihlakaniphe+ kuze ngichubeke ngiphila.
ק [Qoph]
145 Awu Jehova, ngiphendvule, ngobe ngikubita ngenhlitiyo yami yonkhe.
Ngitayigcina imiyalo yakho.
146 Ngisindzise ngobe ngikhala kuwe.
Ngitakwenta loko longikhumbuta kona.
147 Ngivuka kusengakasi,* ngikhale kuwe futsi ngicele lusito,+Ngobe ngetsembele emavini akho.*
148 Ngivuka ekhatsi nebusuku,Kuze ngicabangisise* ngemavi akho.+
149 Ngicela ungilalele ngobe wena unelutsandvo lolucotfo.+
Awu Jehova, ngilondvolote ngobe wena wehlulela ngekulunga.
150 Labo labenta tintfo letilihlazo bayangisondzelela kuze bangilimate;Abawulaleli umtsetfo wakho.
151 Awu Jehova, wena usedvute nami,+Futsi yonkhe imitsetfo yakho iliciniso.+
152 Kusukela kadzeni mine ngafundza ngetecwayiso* takho,Kutsi watibeka kute tihlale tikhona kuze kube phakadze.+
ר [Resh]
153 Buka indlela lengihlupheka ngayo futsi ungikhulule,+Ngobe angikawukhohlwa umtsetfo wakho.
154 Ngivikele* futsi ungikhulule;+Ngilondvolote njengobe wetsembisile.
155 Angeke ubasindzise lababi,Ngobe abafuni kulalela imitsetfo yakho.+
156 Awu Jehova, mkhulu umusa wakho.+
Ngilondvolote ngobe wena wehlulela ngekulunga.
157 Banyenti bantfu labangihluphako nalabamelene nami;+Kodvwa angikayekeli kulalela loko longikhumbuta kona.
158 Ngivele ngenyanye nangibuka labo labakhohlisako,Ngobe abawalaleli emavi akho.+
159 Maye ngiyayitsandza imitsetfo yakho!
Awu Jehova, ngilondvolote ngobe wena unelutsandvo lolucotfo.+
160 Onkhe emavi akho aliciniso,+Yonkhe imitsetfo yakho lelungile itawuhlala ikhona kuze kube phakadze.
ש [Sin] nobe [Shin]
161 Baholi bangihlupha+ ngaphandle kwesizatfu,Kodvwa mine ngiwahlonipha kakhulu emavi akho.+
162 Emavi akho ayangijabulisa,+Angenta ngijabule njengemuntfu lotfole intfo leligugu.
163 Ngiyawatondza emanga, ngiwenyanya mbamba,+Kodvwa ngiyawutsandza umtsetfo wakho.+
164 Ngikudvumisa tikhatsi letingu-7 ngelilangaNgobe imitsetfo yakho ilungile.
165 Labo labatsandza umtsetfo wakho ngibo labanekuthula lokukhulu;+Kute lokutawubenta bagileke.*
166 Awu Jehova, mine ngetsembele ekusindzisweni nguwe,Futsi ngiyayilalela imitsetfo yakho.
167 Ngiyatenta tintfo longikhumbuta tona,Futsi ngititsandza kakhulu.+
168 Ngiyayilalela imitsetfo yakho, ngikwente naloko longikhumbuta kona,Ngobe wena ukwati konkhe lengikwentako.+
ת [Taw]
169 Awu Jehova, shengatsi ungangiva nangikhalela lusito.+
Ngiphe kuhlakanipha lokusevini lakho.+
170 Shengatsi ungangilalela nangicela kutsi ungentele umusa.
Ngisindzise njengobe wetsembisile.
171 Ngitawuhlale ngikudvumisa,+Ngobe ungifundzisa imitsetfo yakho.
172 Ngitawuhlabela mayelana nemavi akho,+Ngenca yekutsi yonkhe imitsetfo yakho ilungile.
173 Shengatsi sandla sakho singahlala sikulungele kungisita,+Ngobe ngikhetsa kulalela imitsetfo yakho.+
174 Ngiyakulangatelela kusindziswa nguwe Jehova,Futsi ngiyawutsandza umtsetfo wakho.+
175 Yenta kutsi ngichubeke ngiphila khona ngitekudvumisa;+Shengatsi imitsetfo yakho ingangisita.
176 Ngedukile, njengemvu lelahlekile.+ Ngifune, mine nceku yakho,Ngobe angikayikhohlwa imitsetfo yakho.+
Imibhalo lengentansi
^ Nobe “labacotfo.”
^ Nobe “Ngitawufundza.”
^ Nobe “ngitawufundza.”
^ Nobe “ngifundze.”
^ Nobe “ngihlazeke.”
^ Kungaphindze kubekwe ngekutsi, “wenta inhlitiyo yami ibe nesibindzi.”
^ Nobe “Ngente ngihambe ngendlela.”
^ Nobe “Ingatifuneli lokuzuzisa yona kuphela.”
^ Kungaphindze kubekwe ngekutsi, “Lowasenta kulabo labakwesabako.”
^ Nobe “lutsandvo lolucotfo.”
^ Nobe “ngitawufundza.”
^ Nobe “lowangetsembisa kona.”
^ Nobe “Endlini langihlala khona njengesihambi.”
^ Nobe “ngilindzele livi lakho.”
^ Nobe “ngelutsandvo lwakho lolucotfo.”
^ Nobe “ngitawufundza.”
^ Nobe “tikhumbuto.”
^ Nobe “ngilindzele livi lakho.”
^ Nobe “lutsandvo lolucotfo.”
^ Nobe “Ngifundza.”
^ Nobe “ngiyafundza.”
^ NgesiHebheru kutsi, “iminikelo yekutitsandzela lengiyenta ngemlomo wami.”
^ Nobe “Kutawuba lifa lami kuze kube phakadze.”
^ Nobe “labanenhlitiyo lehlukene ekhatsi.”
^ Nobe “ngilindzele livi lakho.”
^ Nobe “lutsandvo lolucotfo.”
^ Nobe “tikhumbuto.”
^ NgesiHebheru kutsi, “Njengobe uncumile.”
^ Nobe “Tikhumbuto.”
^ Nobe “entsatsakusa.”
^ Nobe “ngilindzele emavi akho.”
^ Nobe “ngifundze.”
^ Nobe “ngetikhumbuto.”
^ Nobe “Ngimelele ecaleni lami.”
^ Nobe “Kute lokutawubagila endleleni.”
