Njengobe umnyaka wa-2023 ucala, sonkhe sitifisela lokuhle sikanye nemindeni yetfu. Yini lengasenta sibe nelitsemba?

 LiBhayibheli lisitjela tindzaba letimnandzi tekutsi tinkinga lesibhekene nato tesikhashana futsi madvutane titawuphela. Ecinisweni, liBhayibheli ‘labhalelwa kufundzisa tsine, kuze kutsi ngendvudvuto lesiyitfola emiBhalweni sibe nelitsemba.’—KubaseRoma 15:4.

•   Kuze utfole lokunyenti ngaloko liBhayibheli lelisetsembisa kona, fundza sihloko lesitsi “Litsemba Sibili Ngelikusasa Lelihle.”

 Loko liBhayibheli lelisetsembisa kona kungafaniswa ‘nelihhuka lemkhumbi letimphilo tetfu.’ (KumaHebheru 6:19, umbhalo longentansi) Lelitsemba lingasicinisa. Lingasisita kutsi sibeketelele tinkinga lesinato, lisente sinake lokuhle futsi sitfole injabulo lehlala njalo. Sibonelo nje:

•   Tfola kutsi setsembiso seliBhayibheli sayisita njani lenye indvodza lebeyilwisana nemkhuba lomubi lebeyingasakhoni kuwuyekela. Bukela i-video letsi Bengingasayijabuleli Indlela Lebengiphila Ngayo.

•   Tfola indlela setsembiso seliBhayibheli lesingasisita ngayo nasishonelwe ngumuntfu lesimtsandzako. Bukela i-video letsi Indvudvuto Kulabaselusizini Lwekushonelwa.

 Bantfu labanyenti banalo litsemba lekutsi tintfo letinhle titawenteka, kodvwa bete sicinisekiso sekutsi titawenteka mbamba yini vele. Loko lokwetsenjiswa liBhayibheli kwehlukile. Leni? Ngobe tetsembiso teliBhayibheli tivela kuJehova Nkulunkulu a lucobo lwakhe, yena “longeke acale emanga.” (Thithusi 1:2) NguJehova kuphela lonemandla ekugcwalisa tonkhe tetsembiso takhe; utawenta “konkhe lafuna kukwenta.”—Tihlabelelo 135:5, 6.

 Sikumema kutsi uzuze esetsembisweni seliBhayibheli lesingasetsemba. Ungacinisa kusetsemba kwakho ngekutsi ‘uhlolisise imiBhalo.’ (Imisebenti 17:11) Titfolele wena kutsi siyini lesetsembiso ngekutsi udadishe natsi liBhayibheli mahhala. Cala umnyaka wa-2023 ngelitsemba!