1. Yini leyavimbela umndeni wa-Adamu na-Eva kutsi ungene ensimini yase-Edeni, futsi yini Abela labeyifuna kakhulu?

ABELA abebuke umhlambi wakhe wetimvu udla ngekuthula entsabeni. Kungenteka kutsi wabese ubuka ngale kwawo, wabona lapho bekulokota khona lilangabi. Bekati kutsi kuleyo ndzawo bekunenkemba lenelilangabi lebeyisolo iphendvuphendvuka, ivimbe indlela leya ensimini yase-Edeni. Batali bakhe bebake bahlala lapho, kodvwa nyalo bona nebantfwababo bebangasakwati kungena kuyo. Asewucabange nje umoya lopholile wantsambama uphephetelisa tinwele ta-Abela njengobe abuke etulu acabanga ngeMdali wakhe. Bebutawuke bulungiswe yini buhlobo lobonakele emkhatsini webantfu naNkulunkulu? Nguloko Abela labekufuna kakhulu.

2-4. Abela ukhuluma njani natsi lamuhla?

² Abela ukhuluma nawe lamuhla. Uyamuva yini? Ungase utsi loku ngeke kuze kwenteke. Phela lendvodzana yesibili ya-Adamu kadze yafa. Sekwengce iminyaka lengaba ngu-6 000 ematsambo ayo asaba ngumhlabatsi. Mayelana nalabafile, liBhayibheli litsi: “Abati lutfo.” (Shu. 9:5, 10) Kantsi futsi kute nalinye livi lelashiwo ngu-Abela lelibhalwe eBhayibhelini. Ngako angakhuluma njani natsi?

³ Umphostoli Pawula waphefumulelwa kutsi abhale loku nga-Abela: “Nanobe afile . . . usakhuluma.” (Fundza Hebheru 11:4.) Abela ukhuluma njani natsi? Ngekukholwa kwakhe. Abengumuntfu wekucala lowaba nekukholwa. Kukholwa kwakhe wakubonisa kakhulu kangangekutsi sibonelo sakhe siyaphila, futsi singasilingisa lamuhla. Nasifundza ekukholweni kwakhe futsi setama kukulingisa, umlandvo wakhe kuba shengatsi ukhuluma natsi mbamba.

⁴ Kodvwa yini lesingayifundza nga-Abela nangekukholwa kwakhe njengobe kukuncane kakhulu lokushiwo ngaye eBhayibhelini? Asesibone.

5. Asho kutsini emavi aJesu latsi Abela waphila esikhatsini ‘sekusekelwa kwemhlaba’? (Fundza nembhalo longentansi.)

⁵ Abela watalwa kungakapheli sikhatsi lesidze kudalwe bantfu  bekucala. Ngekuhamba kwesikhatsi, Jesu watsi Abela abephila esikhatsini ‘sekusekelwa kwemhlaba.’ (Fundza Lukha 11:50, 51.) Kungenteka kutsi lapha Jesu abesho bantfu lebebangakhululwa esonweni. Nanobe Abela abengumuntfu wesine lowaba khona, kubonakala shengatsi ungumuntfu wekucala Nkulunkulu lamtsatsa njengalobekangakhululwa. * Kuyacaca-ke kutsi Abela wakhula ete tibonelo letinhle labengatilingisa.

6. Abela abenebatali labanjani?

⁶ Nanobe umhlaba bewusandza kudalwa, bantfu besebavele basesimeni lesimatima. Batali ba-Abela, bo-Adamu na-Eva, bebabantfu labahle nalabanemandla. Kodvwa bebehluleke kakhulu ekuphileni, futsi nabo bebakwati loko. Bebake baba bete sono, futsi banelitsemba lekuphila phakadze. Babese bavukela Jehova Nkulunkulu futsi bacoshwa ekhaya labo leliyiPharadisi lebelisensimini yase-Edeni. Ngekubeka tifiso tabo kucala kunako konkhe lokunye, lokufaka ekhatsi netidzingo tebantfwana babo, balahlekelwa kuba bete sono kanye nekuphila lokuphakadze.​—Gen. 2:15–3:24.

7, 8. Eva watsini nakutalwa Khayini, futsi yini lokungenteka beyisengcondvweni yakhe?

⁷ Njengobe besebacoshiwe kulensimu, kuphila kwabo-Adamu na-Eva kwaba matima. Kodvwa ngesikhatsi umntfwana wabo wekucala atalwa, bametsa libito batsi nguKhayini nobe “Lokutelwe,” futsi Eva wababata watsi: “Ngitfole indvodzana ngekusitwa nguSimakadze.” Emavi akhe aveta kutsi kungenteka abecabanga ngesetsembiso Jehova lasenta ensimini, ngesikhatsi abiketela kutsi umfati lotsite  abetawuveta ‘intalo’ nobe umntfwana, ngalelinye lilanga lobekatawubhubhisa lomubi lowadukisa bo-Adamu na-Eva. (Gen. 3:15; 4:1) Eva abecabanga kutsi ungulomfati lokukhulunywa ngaye kulesiphrofetho yini nekutsi Khayini ‘abengulentalo’ letsenjisiwe?

⁸ Nangabe kunjalo, bekente liphutsa lelikhulu. Ngetulu kwaloko, nangabe yena na-Adamu bebangcingca ingcondvo yaKhayini ngemibono lenjalo ngesikhatsi asakhula, bebambangela kutsi aticabange amkhulu. Ngekuhamba kwesikhatsi Eva watala indvodzana yesibili, kodvwa akazange awasho emagama lanjalo ngayo. Bayetsa libito batsi ngu-Abela, lokungenteka lisho kutsi “Umoya lophuma emakhaleni” nobe “Intfo lengenamsebenti.” (Gen. 4:2) Kungenteka yini kutsi lelibito labalikhetsa beliveta kutsi kute lokungako labakulindzele ku-Abela, shengatsi yena abengakabaluleki kunaKhayini? Asiciniseki ngaloko.

9. Yini batali lamuhla labangayifundza kubatali betfu bekucala?

⁹ Lamuhla, batali bangafundza lokunyenti kulabatali bekucala. Ngemavi nangetento tenu, nitawufundzisa bantfwana benu kutsi batigabatise yini, bafune tikhundla futsi baticabangele bona? Nobe nitawubafundzisa kutsi batsandze Jehova Nkulunkulu futsi bafune kuba bangani bakhe? Kuyadzabukisa kutsi labatali bekucala behluleka kufeza umtfwalo wabo. Kodvwa-ke bantfwana babo bebasenalo litsemba.

10, 11. BoKhayini na-Abela benta miphi imisebenti, futsi yini Abela laba nayo?

¹⁰ Njengobe labafana lababili bakhula, kungenteka kutsi Adamu wabafundzisa imisebenti lebeyibalulekile kute banakekele umndeni. Khayini waba ngumlimi, Abela yena waba ngumelusi.

¹¹ Kodvwa Abela wenta lokutsite lokubaluleke kakhulu. Njengobe iminyaka ichubeka, waba nekukholwa, lokuyintfo lenhle Pawula labhala ngayo ngemuva kwesikhatsi. Asewucabange nje, Abela bekete umuntfu langabuka kuye njengesibonelo. Ngako-ke, waba nako njani kukholwa kuJehova Nkulunkulu? Cabanga ngetintfo letintsatfu letamenta waba nekukholwa lokucinile.

12, 13. Kubuka indalo yaJehova kwamsita njani Abela kutsi akhulise kukholwa kwakhe?

¹² Indalo yaJehova. Kuliciniso kutsi Jehova abewucalekisile umhlabatsi, wawenta waveta emanyeva nelukhula, lobekutintfo letenta kulima kube matima. Nanobe kunjalo, umhlaba bewuchubeka uveta kudla lokunyenti lobekugcina umndeni wakubo-Abela uphila. Tilwane atizange ticalekiswe, lokufaka ekhatsi tinyoni netinhlanti; ngisho netintsaba, emachibi, imifula, lwandle, sibhakabhaka, emafu, lilanga, inyanga netinkhanyeti. Yonkhe indzawo lapho Abela abebuka khona wabona bufakazi belutsandvo lolukhulu, kuhlakanipha nebuhle baJehova Nkulunkulu, lokunguye lowadala tonkhe tintfo.  (Fundza Roma 1:20.) Asingabati kutsi kuzindla kwakhe ngaletintfo kwakucinisa kukholwa kwakhe.

¹³ Kufanele kutsi Abela abetinika sikhatsi lesinyenti sekuzindla ngaJehova. Asewumcabange anakekela umhlambi wakhe. Umelusi abecitsa sikhatsi lesinyenti ahamba. Abehola tilwane takhe emagcumeni, etigodzini, futsi atewelise nemifula, atifunela emadlelo laluhlata, tindzawo letikahle tekutfola emanti, netindzawo tekuphumula letinemtfunti lomuhle. Kuyo yonkhe indalo yaNkulunkulu, timvu kubonakala kungito letiludzinga kakhulu lusito, kuba shengatsi tadalwa ngendlela yekutsi tidzinge kucondziswa nekuvikelwa ngumuntfu. Abela abebona yini kutsi naye udzinga sicondziso, sivikelo, nekunakekelwa nguMuntfu lohlakaniphe kakhulu nalonemandla kakhulu kunebantfu? Asingabati kutsi imiva lenjalo wayiveta nakathantaza, futsi ngaleyo ndlela kukholwa kwakhe kwachubeka kukhula.

14, 15. Tetsembiso taJehova tamenta njani Abela waba nalokunyenti labengazindla ngako?

¹⁴ Tetsembiso taJehova. Kungenteka kutsi bo-Adamu na-Eva bebawacocela emadvodzana abo ngetintfo letenteka ensimini yase-Edeni letabangela kutsi bacoshwe. Ngako Abela abenetintfo letinyenti labengazindla ngato.

¹⁵ Jehova watsi umhlaba bewutawucalekiswa. Abela wawabona kahle emanyeva nelukhula lokwafakazela lamavi. Jehova abebiketele nekutsi Eva abetawuba nebuhlungu nakatetfwele nalapho abeleka. Njengobe bantfwana bakhabo Abela batalwa, kufanele kutsi nalamavi wawabona agcwaliseka. Jehova wakubona kusengembili kutsi Eva abetawuba nesidzingo lesikhulu sekutsandvwa nekunakwa yindvodza yakhe, futsi Adamu abetawumbusa. Abela watibona tenteka embikwakhe letintfo letibuhlungu. Kuto tonkhe timo, wabona kutsi emavi aJehova angetsenjwa ngalokuphelele. Ngako waba netizatfu leticinile tekusikholwa setsembiso saNkulunkulu lesimayelana “nentalo” nobe umntfwana, lobekutawutsi ngalelinye lilanga alungise umonakalo lobewenteke e-Edeni.​—Gen. 3:15-19.

16, 17. Yini lokungenteka Abela wayifundza kumakherubi aJehova?

¹⁶ Tinceku taJehova. Kute sibonelo lesihle Abela lasitfola kubantfu,  kodvwa bekungasibo bantfu kuphela lebebasemhlabeni ngaleso sikhatsi. Ngesikhatsi bo-Adamu na-Eva bacoshwa ensimini, Jehova waciniseka kutsi bona nebantfwana babo abakhoni kungena kuleliPharadisi. Kute ligadvwe, Jehova wabeka emakherubi​—lokutingilosi letinesikhundla lesiphakeme​—kanye nenkemba lenelilangabi lebeyihlale iphendvuphendvuka.​—Fundza Genesisi 3:24.

¹⁷ Asewucabange kutsi wativa njani Abela nakabona lamakherubi ngesikhatsi asengumfana. Njengobe abenemitimba yenyama, abebonakala anemandla lamakhulu. ‘Lenkemba’ lebeyihlale inelilangabi futsi iphendvuphendvuka nayo beyimangalisa kakhulu. Njengobe Abela akhula, wake wawatfola yini lamakherubi asatihlalele nje, ashiye umsebenti wawo? Cha. Busuku nemini, umnyaka nemnyaka, ngisho nemashumi eminyaka, letidalwa letihlakaniphile naletinemandla tachubeka tenta umsebenti wato. Abela wafundza kutsi Jehova Nkulunkulu unato tinceku letilungile naletetsembekile. Kulamakherubi, wabona kwetsembeka nekulalela Jehova, lokuyintfo labengayiboni emndenini wakubo. Kuyacaca kutsi lesibonelo saletingilosi sakucinisa kukholwa kwakhe.

18. Ngutiphi tizatfu lesinato tekuba nekukholwa lamuhla?

¹⁸ Ngesikhatsi azindla ngako konkhe Jehova lakwembula ngaYe ngekwakhe asebentisa indalo, tetsembiso, nesibonelo setingilosi takhe, Abela wabona kukholwa kwakhe kucina kakhulu. Kuyacaca kutsi sibonelo sakhe sikhuluma natsi. Bantfu labasha kungabacinisa kwati kutsi bangaba nekukholwa kweliciniso kuJehova Nkulunkulu, ngisho nobe emalunga emindeni yakubo angenti njalo. Njengobe situngeletwe yindalo lemangalisako, sineliBhayibheli, futsi sinetibonelo  tebantfu labanyenti labanekukholwa, sinetizatfu letinyenti tekuba nekukholwa lamuhla.

19. Ngekuhamba kwesikhatsi, nguliphi liciniso lelibalulekile Abela lalicondza?

¹⁹ Njengobe kukholwa Abela labenako kuJehova kukhula, abefuna kutfola indlela yekuveta kukholwa kwakhe ngetento. Kodvwa yini nje umuntfu labengayinika uMdali wendzawo yonkhe? Kusebaleni kutsi Nkulunkulu abengasidzingi sipho nobe lusito lwebantfu. Ngekuhamba kwesikhatsi, Abela wacondza nali liciniso lelibalulekile: Nangabe ngesisusa lesihle anganikela kuJehova ngalokuncono kakhulu lanako, Babe wakhe lonelutsandvo abetawujabula.

20, 21. BoKhayini na-Abela benta miphi iminikelo kuJehova, futsi yena wentani?

²⁰ Abela walungiselela kunikela ngetimvu latitsetse emhlambini wakhe. Wakhetsa letincono kakhulu futsi letingematibulo, watsatsa netincenye letinhle tato. Ngesikhatsi lesifanako, Khayini naye abefuna sibusiso kuNkulunkulu nekwemukelwa nguye, ngako walungiselela kunikela ngalakulimile. Kodvwa tisusa takhe betingafani neta-Abela. Umehluko wabonakala kahle ngesikhatsi bobabili sebenta iminikelo yabo.

²¹ Kungenteka kutsi omabili lamadvodzana a-Adamu asebentisa emalati kanye nemlilo kute ente iminikelo, futsi mhlawumbe abeme endzaweni lebonwa ngemakherubi, lobekungiwo kuphela labemelela Jehova emhlabeni ngaleso sikhatsi. Jehova wenta lokutsite! LiBhayibheli litsi: “Simakadze wanaka Abela nemnikelo wakhe.” (Gen. 4:4) LiBhayibheli aliyisho indlela Nkulunkulu laveta ngayo kutsi uyamemukela.

22, 23. Yini leyabangela kutsi Jehova emukele umnikelo wa-Abela?

²² Kungani Nkulunkulu emukela Abela? Bekungenca yalomnikelo yini? Abela wanikela ngesilwane lesiphilako nalesiphefumulako, futsi wacitsa ingati yaso leligugu. Bekati yini kutsi umnikelo lonjalo utawubaluleka kangakanani? Emakhulwini eminyaka ngemuva kwekuphila kwa-Abela, Nkulunkulu wasebentisa umhlatjelo wemvu lete sici kute umelele umhlatjelo weNdvodzana yaKhe lete sono, “liWundlu laNkulunkulu,” lobekutawucitfwa ingati yayo lengenacala. (Joh. 1:29; Eks. 12:5-7) Kodvwa-ke Abela abengakwati futsi angakucondzi konkhe loko.

²³ Naku lesiciniseka ngako: Abela wanikela ngalokuncono kakhulu labenako. Jehova akazange emukele umnikelo wakhe nje kuphela, kodvwa wemukela naye. Abela wenta lomnikelo ngobe abechutjwa lutsandvo ngaJehova nekukholwa kweliciniso kuye.

24. (a) Kungani sitsi umnikelo waKhayini bewute inkinga? (b) Khayini ufana nebantfu balamuhla ngayiphi indlela?

²⁴ Kwenteka lokwehlukile kuKhayini. Jehova ‘akazange amnake Khayini nemnikelo wakhe.’ (Gen. 4:5) Akusiko kutsi umnikelo  waKhayini bewunenkinga, ngobe ngekuhamba kwesikhatsi uMtsetfo waNkulunkulu wakuvumela kutsi kunikelwe ngemikhicito yemhlaba. (Lev. 6:14, 15) Kodvwa liBhayibheli litsi “imisebenti yakhe [Khayini] beyimibi.” (Fundza 1 Johane 3:12.) Njengebantfu labanyenti lamuhla, Khayini abecabanga kutsi bekwenele ngaye kumane avete kutsi utinikele kuNkulunkulu. Kweswela kwakhe kukholwa nekuba bete lutsandvo ngaJehova kwasheshe kwabonakala ngaloko lakwenta.

25, 26. Jehova wamecwayisa ngani Khayini, kodvwa yena wentani?

²⁵ Ngesikhatsi Khayini abona kutsi Jehova akakamemukeli, wetama yini kufundza esibonelweni sa-Abela? Cha. Wafukamela inzondo ngemnakabo. Jehova wakubona loko lokwakusenhlitiyweni yaKhayini, futsi wetama kubonisana naye ngemusa. Wamecwayisa ngekutsi loko lakwentako bekutamholela esonweni lesikhulu, futsi wametsembisa kutsi ‘utawuphakanyiswa’ nangabe nje ashintja tindlela takhe.​—Gen. 4:6, 7, NW.

²⁶ Khayini akazange asinake secwayiso saNkulunkulu. Wabita umnakabo lobekametsemba watsi abaye etsafeni. Nabefika lapho, Khayini wahlasela Abela futsi wambulala. (Gen. 4:8) Ngemcondvo lotsite, Abela waba ngumuntfu wekucala lowahlushwa ngenca yenkholo yakhe, waba wekucala lowafela kukholwa. Nanobe abesafile, Jehova akazange amkhohlwe.

27. (a) Kungani singaciniseka ngekutsi Abela utawuvuswa? (b) Yini lesingayenta kute simbone ngalelinye lilanga?

²⁷ Ngemcondvo longumfanekiso, ingati ya-Abela yakhala kuJehova Nkulunkulu icela kuphindziselelwa nobe kutsi kwentiwe kulunga. Nkulunkulu waciniseka kutsi kwentiwa kulunga ngekutsi ajezise Khayini ngebubi labenta. (Gen. 4:9-12) Lokubaluleke kakhulu kutsi umlandvo wekukholwa kwa-Abela usakhuluma natsi lamuhla. Kuphila kwakhe, lokungenteka kutsi kwaba minyaka lengaba likhulu, kwakukufisha kakhulu nakucatsaniswa nekwebantfu bangaleso sikhatsi, kodvwa Abela wayisebentisa kahle leyo minyaka. Wafa ati kutsi Babe wakhe wasezulwini longuJehova uyamtsandza futsi uyamemukela. (Heb. 11:4) Singaciniseka ngekutsi Jehova uyamkhumbula, futsi ulindzele kumvusela ekuphileni emhlabeni lolipharadisi. (Joh. 5:28, 29) Utambona yini wena? Ungambona nangabe utimisele kumlalela njengobe akhuluma futsi ulingise nekukholwa kwakhe lokuhamba embili.