Bonkhe bantfu banawo emabito. Ngete kwaba nengcondvo yini kutsi naNkulunkulu abe neligama? Kuba nelibito kanye nekulisebentisa, kuyindlela lebalulekile ebantfwini yekwakha bungani. Kufanele kwehluke yini nasibuya ebuhlotjeni betfu naNkulunkulu?

 EBhayibhelini, Nkulunkulu utsi: “Ngingu[Jehova]; lelo libito lami.” (Isaya 42:8) Ngisho noma aneticu letinyenti letifaka ekhatsi “Nkulunkulu Somandla,” “Nkhosi Lephakeme,” kanye ‘neMdali,’ unikete tikhonti takhe lilungelo lekutsi timbite ngelibito lakhe.—Genesisi 17:1; Imisebenti 4:24; 1 Phetro 4:19.

 Emahumusho lamanyenti eliBhayibheli anelibito laNkulunkulu ku-Eksodusi 6:3. Lelivesi litsi: “Ngabonakala ku-Abrahama, naku-Isaka, nakuJakobe kutsi nginguNkulunkulu Somandla, kodvwa angizange ngibatise lelibito lami lelingcwele, [Jehova].”

 Sesidze sikhatsi kusetjentiswa ligama laNkulunkulu ngesiNgisi lelitsi “Jehovah”. Bantfu labanyenti labafundzile banconota “Yahweh,” kodvwa ligama lelitsi Jehova, ngilo lelatiwa bantfu labanyenti. Incenye yekucala yeliBhayibheli ayizange ibhalwe ngesiNgisi kodvwa ngesiHebheru, lesifundvwa kusuka ngesekudla kuye ngesencele. Kulolulwimi, leligama laNkulunkulu limelelwa tinhlavu letine, יהוה. Letinhlavu letine tesiHebheru—letihunyushwe ngekutsi YHWH—tatiwa nangekutsi i-Tetragrammaton.