Ditaba tse molemo tse reng batho ba tla phela ka ho sa feleng lefatsheng, di ngotswe ka Bibeleng. (Pesaleme ya 37:29) Bibele e na le mangolo a 66. Modimo o sebedisitse banna ba ka bang 40 ba tshepahalang hore ba a ngole. Mangolo a mahlano a qalang a ngotswe ke Moshe hoo e ka bang dilemo tse 3 500 tse fetileng. Lengolo le qetellang le ngotswe ke moapostola Johanne dilemong tse fetang 1 900 tse fetileng. Bangodi ba Bibele ba ne ba ngola maikutlo a mang? Modimo o ile a sebedisa moya o halalelang hore a fetisetse ditaba tsa hae ho bangodi ba Bibele. (2 Samuele 23:2) Ba ile ba ngola mehopolo ya Modimo, eseng ya bona. Ha e le hantle, Jehova ke yena Mongodi wa Bibele.—Bala 2 Timothea 3:16; 2 Petrose 1:20, 21.

Shebella video e reng Mongodi wa Bibele ke mang?

Re a tseba hore Bibele e tswa ho Modimo hobane e profeta dintho tse nepahetseng ka bokamoso. Ha ho motho ya ka etsang jwalo. (Joshua 23:14) Ke Modimo ya Matla ohle feela eo ka nepo a ka bonang esale pele bokamoso ba batho.—Bala Esaia 42:9; 46:10.

Re lebelletse hore buka e tswang ho Modimo e be e ikgethang, mme ka sebele e jwalo . Ho ile ha fanwa ka Dibibele tse dimilione ka dipuo tse makgolo. Le hoja e le buka ya kgale, Bibele e dumellana le saense e netefaditsweng. Hape, bangodi ba yona ba 40 ha ba hanyetsane. * Ho feta moo, Bibele e re senolela botho bo lerato ba Modimo, mme e ntse e na le matla a ho fetola bophelo ba batho hore ba phele ka tsela e thabisang. Dintlha tsena di kgodisa batho ba bangata hore Bibele ke Lentswe la Modimo.—Bala 1 Bathesalonika 2:13.

Shebella video e reng Re ka Kgodiseha Jwang Hore Bibele e Nepahetse?

Taba e ka sehloohong eo Bibele e buang ka yona ke ditaba tse molemo tsa hore Modimo o batla hore re phele hamonate. Mangolo a hlalosa kamoo batho ba ileng ba lahlehelwa ke monyetla wa ho dula lefatsheng la paradeise kateng qalong ya histori ya batho le kamoo paradeise e tla tsosoloswa kateng.—Bala Tšenolo 21:4, 5.

Ka Bibeleng ho na le melao, melaomotheo hammoho le dikeletso. Ho phaella moo, Bibele e re bolella tsela eo Modimo a neng a sebedisana le batho ka yona, e leng histori e senolang botho ba Modimo. Kahoo, Bibele e ka o thusa hore o tsebe Modimo. E hlalosa kamoo o ka bang motswalle wa hae kateng.—Bala Pesaleme ya 19:7, 11; Jakobo 2:23; 4:8.

Bukana ena e tla o thusa hore o utlwisise Bibele haholwanyane, e sebedisa mokgwa o tshwanang le oo Jesu a neng a o sebedisa. O ne a qotsa ditemana tsa Bibele ka makgetlo a mangata mme a hlalosa “se bolelwang ke Mangolo.”—Bala Luka 24:27, 45.

Hase dintho tse ngata tse thabisang jwaloka ditaba tse molemo tse tswang ho Modimo. Empa batho ba bang ha ba di rate, ha ba bang di ba tena. O se ke wa nyahama. Monyetla wa hore o thabele bophelo bo sa feleng o itshetlehile ka hore o tsebe Modimo.— Bala Johanne 17:3.