HA BAISERAELE ba ne ba le haufi le ho tshela Noka ya Jordane, ho kena naheng eo Modimo a neng a ba tshepisitse yona, ba ile ba fumana baeti. Baeti bao, e ne e se basadi ba Baiseraele mme ba ile ba ba memela moketeng. Baiseraele ba ile ba bona memo ena e ba bulela monyetla wa ho etsa metswalle, ho tantsha le ho thabela dijo tse monate. Le hoja meetlo le boitshwaro ba basadi bao bo ne bo sa dumellane le melao ya Modimo, e ka nna yaba banna ba bang ba Baiseraele ba ile ba nahana hore ba ke ke ba tshwaetswa ke mekgwa eo e mebe.

 Ebe keng se ileng sa etsahala? Tlaleho ya Bibele e re: “Setjhaba sa qala ho kopanela diphate ho ditshila le baradi ba Moabe.” Ha e le hantle, basadi bao ba ne ba batla hore banna ba Baiseraele ba rapele medimo ya bohata mme ke sona seo ba ileng ba se etsa. Ka hona, “bohale ba Jehova ba qala ho tukela Iseraele.”​—Num. 25:1-3.

Baiseraele ba ne ba tlotse Molao wa Modimo ka ditsela tse pedi: Ba ile ba rapela ditshwantsho, ba ba ba etsa le boitshwaro bo bobe ba thobalano. Ho ile ha shwa Baiseraele ba dikete ka lebaka la ho se mamele. (Ex. 20:4, 5, 14; Deut. 13:6-9) Ke hobaneng ha se ba etsahalletseng se ne se le bohloko ka ho fetisisa? Lebaka ke hore hoja Baiseraele bao sa ka ba tlola Molao wa Modimo, ba ka be ba ile ba tshela Jordane mme ba kena Naheng e Tshepisitsweng.​—Num. 25:5, 9.

Ha moapostola Pauluse a bua ka diketsahalo tseo, o ile a re: “Dintho tsena di ile tsa tswela pele ho ba hlahela e le mehlala, mme di ile tsa ngolwa hore e be temoso ho rona bao bofelo ba ditsamaiso tsa dintho bo ba fihletseng.” (1 Bakor. 10:7-11) Ha ho pelaelo hore Satane o ile a thaba haholo ha a bona ba bang ba Baiseraele ba wela sebeng se tebileng mme ba lahlehelwa ke monyetla wa ho kena Naheng e Tshepisitsweng. Jwale, re lokela ho ithuta ho se ileng sa ba etsahalla, ka ha Satane a ka thaba haholo ha re ka lahlehelwa ke monyetla wa ho kena lefatsheng le letjha leo Modimo a re tshepisang lona.

Satane o batla ho tshwasa Bakreste mme o sebedisa maraba ao a tsebang hore a a atleha ka ha o ile a a sebedisa pele. Jwalo ka ha re se re ithutile, Satane o ile a sebedisa boitshwaro bo bobe ba thobalano ho tshwasa Baiseraele. Le kajeno boitshwaro bo bobe e ntse e le leraba le kotsi leo Satane a le sebedisang. Pornography ke leraba le ka sehloohong leo Satane a re tshwasang ka lona.

Kajeno motho a ka kgona ho shebella pornography ho sena motho ya mmonang. Dilemong tse fetileng, ha motho a ne a batla ho shebella pornography, o ne a lokela ho ya moo ho neng ho shebellwa difilimi tse hlahisang thobalano teng kapa a ye dishopong tse rekisang dibuka tse hlahisang ditshwantsho tsa batho ba tsotseng. Batho ba bangata ba ne ba sa ye dibakeng tsena, ka ha ba ne ba swabela hore ba bang ba tla ba bona. Empa matsatsing ana, motho a ka kgona ho shebella pornography ka ho kena Inthaneteng e bang o mosebetsing kapa o ka koloing. Athe dinaheng tse ding teng, batho ba ka kgona ho shebella pornography ba ntse ba le ka tlung.

Ha ho felle moo. Difounu tsa moraorao le dithabolete, di entse hore ho be bonolo hore batho ba shebelle pornography. Ka hoo ba kgona ho e shebella, ebang ba seterateng, ka beseng kapa ka tereneng.

Ka ha ho se ho le bonolo hore motho a ka shebella pornography ba bang ba sa tsebe, e lemaditse batho ba bangata ho feta le ha e le neng pele. Batho ba e shebellang, manyalo a bona a a senyeha, ha ba itlhomphe ebile ba dula ba ikutlwa ba le molato. Ho hobe le ho feta ke hore ba sentse setswalle sa bona le Modimo. Ka hoo, ho hlakile hore pornography e ntsha batho ba e shebellang kotsi mme maemong a mangata e ba senya maikutlo. Ho jwalo ka ha motho a ka ba le leqeba. Le hoja le ka fola, le siya lebadi le dulang nako e telele.

Le ha ho le jwalo, re ka kgodiseha hore Jehova o tla re sirelletsa kgahlanong le leraba lena la Satane. Empa e le hore Jehova a re sirelletse, re lokela ho “mamela lentswe la [hae] ka tiyo,” e leng seo banna bane ba Baiseraele ba hlolehileng ho se etsa. (Ex. 19:5) Re lokela ho hopola hore Modimo o hloile pornography. Ebe ke hobaneng ha re tjho jwalo?

Nahana ka sena: Melao eo Modimo a neng a e file Baiseraele, e ne e fapane hole le melao  ya ditjhaba tse ding. Ene e tshwana le lebota le neng le sirelletsa Baiseraele hore ba se ke ba tshwaetswa ke mekgwa e mebe ya ditjhaba tse ding. (Deut. 4:​6-⁠8) Melao eo e ile ya totobatsa nnete ena: Jehova o hloile boitshwaro bo bobe ba thobalano.

Ha Jehova a bolella Baiseraele ka boitshwaro bo bobe ba ditjhaba tse ba potolohileng, o ile a re: “Le se ke la etsa ka tsela eo naha ya Kanana, eo ke le isang ho yona, e etsang ka yona . . . Naha ha e a hlweka, mme ke tla e tlisetsa kotlo bakeng sa phoso ya yona.” Ho Modimo ya halalelang wa Iseraele, tsela eo Bakanana ba neng ba itshwere ka yona e ne e le mpe hoo a ileng a bona le naha eo ba dulang ho yona e sa hlweka.​—Lev. 18:3, 25.

Le hoja Jehova a ile a fa Bakanana kotlo, ditjhaba tse ding tsona di ile tsa tswelapele ho etsa boitshwaro bo bobe ba thobalano. Le dilemo tse ka bang 1 500 hamorao, moapostola Pauluse o ile a ngola ka ditjhaba tseo Bakreste ba neng ba dula hara tsona, a re ke “tse felletsweng ke kutlo yohle ya boitshwaro.” Ha e le hantle, di ne “di ineheletse boitshwaro bo hlephileng ho sebetsa ho se hlweke ha mofuta o mong le o mong ka meharo.” (Baef. 4:17-19) Le kajeno boitshwaro ba batho ba bangata bo bodile. Ka lebaka leo, Bakreste ba nnete ba lokela ho etsa sohle seo ba ka se kgonang ho qoba ho shebella dintho tsohle tse hlahisang boitshwaro bo bobe.

Pornography e hlompholla Modimo hobane o bopile batho ka setshwantsho sa hae. O re file bokgoni ba ho kgetholla se nepahetseng le se fosahetseng. Ka bohlale Modimo o ile a fana ka melao mabapi le thobalano. O ne a reretse hore e thabelwe ke batho ba nyalaneng feela. (Gen. 1:26-28; Liprov. 5:18, 19) Empa batho ba kgothalletsang pornography bona ba etsang? Ba nyatsa melao ya Modimo ya boitshwaro. Ka sebele ha ba hlomphe Jehova mme o tla ba ahlola ka lebaka la seo.​—Bar. 1:24-27.

Jwale ho thweng ka batho ba balang le ho shebella pornography ka boomo? Ba bang ba nahana hore pornography empa e le boithabiso feela bo seng kotsi. Le ha ho le jwalo, ba tshehetsa batho ba nyatsang melao ya Modimo ya boitshwaro. Ho ka etsahala hore ebe e ne e se boikemisetso ba bona ha ba ne ba qala ho e shebella. Ho hlakile hore bahlanka ba Modimo ba lokela ho hloya pornography ka ha Bibele e re: “Lona ba ratang Jehova, hloyang se sebe.”​—⁠Pes.97:10.

 Esita le batho ba batlang ho qoba ho shebella pornography ba ka fumana ho le thata ho etsa seo. Ka ha ha re a phethahala, re ka nna ra lokela ho lwana ka thata hore re hanele ditakatso tse fosahetseng tsa thobalano. Ho feta moo, dipelo tsa rona di ka nna tsa re susumelletsa hore re se ke ra mamela melao ya Modimo. (Jer. 17:⁠9) Empa Bakreste ba bangata ba hlotse ntwa ena. Ho tseba sena ho ka o kgothatsa haeba le wena o na le bothata bo tshwanang. Ela hloko ka moo Bibele e ka o thusang ka teng ho qoba leraba lena la Satane la ho shebella pornography.

Jwalo ka ha re se re bone pejana, Baiseraele ba bangata ba ile ba dumella ditakatso tse fosahetseng hore di ba kenye mathateng. Le rona re ka etsahallwa ke se tshwanang kajeno. Jakobo ngwanabo Jesu, o ile a hlalosa kotsi ya seo ha a ne a re: “E mong le e mong o . . . hulwa le ho ekwa ke takatso ya hae. Jwale takatso, ha e emere, e tswala sebe.” (Jak. 1:14, 15) Ha motho a dula a nahana ka ditakatso tse fosahetseng, o tla qetella a entse sebe. Ka hoo, re lokela ho qoba ho nahana ka dintho tse fosahetseng.

Haeba menahano e fosahetseng e o tlela, nka kgato kapele. Jesu o ile a re: “Jwale, haeba letsoho la hao kapa leoto la hao le etsa hore o kgoptjwe, o le kgaole mme o le lahlele hole le wena . . . Hape, haeba leihlo la hao le etsa hore o kgoptjwe, o le honye mme o le lahlele hole le wena.” (Mat. 18:8, 9) Jesu o ne a sa re re itematse empa o ne a etsa mohlala wa seo re lokelang ho se etsa ho tlosa menahano e fosahetseng ka potlako. Jwale, re ka sebedisa keletso eo jwang ha ho tluwa tabeng ya ho shebella pornography?

Ha o ka bona pornography ka tshohanyetso, o se ke wa ithetsa wa nahana hore e ke ke ya o ntsha kotsi. Hanghang, sheba kwana. Tima TV, khompiyutha kapa founu ka yona nako eo. Nahana ka dintho tse hlwekileng. Ho etsa jwalo ho ka o thusa ho laola tsela eo o nahanang ka yona, ho ena le hore o laolwe ke ditakatso tse fosahetseng.

Keng seo o lokelang ho se etsa haeba o se o tlohetse ho shebella pornography empa nako le nako o ntse o hopola seo o se shebelletseng?  Ditshwantsho tsa pornography di ka dula nako e telele ka kelellong ya motho. Di ka hlaha feela motho a sa nahana le ho nahana. Haeba seo se etsahala, o ka nna wa utlwa e ka o ka etsa ntho e sa hlwekang jwalo ka ho pholla ditho botona le botshehadi. Ka hoo, hopola hore menahano e jwalo e ka o fihlela o sa nahana mme o lokela ho dula o ikemiseditse ho e lwantsha.

Ikemisetse le ho feta ho nahana le ho etsa dintho tse dumellanang le thato ya Modimo. Etsisa moapostola Pauluse, ya ileng a ikemisetsa ho “teteka mmele wa [hae] mme [a] o tshwara jwalo ka lekgoba.” (1 Bakor. 9:27) O se ke wa dumella ditakatso tse fosahetseng hore di o laole. Bibele e re: “Le fetohe ka ho fetola dikelello tsa lona, e le hore le ka ipakela e le lona thato ya Modimo e molemo le e amohelehang le e phethahetseng.” (Bar. 12:⁠2) Hopola hore ho nahana le ho etsa dintho tse dumellanang le thato ya Modimo, ho tlisa thabo ho feta ho inehella ditakatsong tse fosahetseng.

Leka ho tshwara ditemana tse itseng tsa Bibele ka hlooho. Jwale e tla re ha menahano e fosahetseng e o fihlela, o be o nahana ka ditemana tseo. Mangolo a latelang, a tla o thusa hore o tadime pornography ka tsela eo Jehova a e tadimang ka yona mme o etse dintho ka tsela eo a e lebelletseng: Pesaleme ya 119:37; Esaia 52:11; Matheu 5:28; Baefese 5:3; Bakolose 3:5 le 1 Bathesalonika 4:4-8.

Ebe o lokela ho etsang haeba o fumana ho le thata ho qoba ho nahana ka boitshwaro bo bobe kapa ho bo shebella? O lokela ho latela mehato ya Jesu haufiufi. (1 Pet. 2:21) Ka mora hore Jesu a kolobetswe, Satane o ile a nna a mo leka. Empa Jesu o ile a etsang? O ile a nna a hana mme a sebedisa Mangolo a sa tshwaneng ho hanela diteko tseo. O ile a re: “Tloha, Satane!” mme Satane a mo tlohela. Feela jwalo ka ha Jesu a sa ka a tela ho lwantsha Diabolose le wena ha o a lokela ho tela. (Mat. 4:1-11) Satane le lefatshe la hae ba tla dula ba leka ho etsa hore re nahane dintho tse fosahetseng empa ha re a lokela ho ba dumella. Le ha ho le jwalo, ka thuso ya Jehova, re ka hlola leraba la ho shebella pornography.

Tswelapele ho kopa Jehova hore a o thuse. Pauluse o ile a re: “Dikopo tsa lona tse matla di ke di tsebiswe Modimo mme kgotso ya Modimo e fetang monahano wohle e tla lebela dipelo tsa lona le matla a lona a kelello ka Kreste Jesu.” (Bafil. 4:6, 7) Modimo o tla o fa kgotso ya kelello, e tla o thusa hore o se ke wa etsa se fosahetseng. Ka hona, ha o atamela ho Jehova le yena “o tla atamela ho [wena.]”​—Jak. 4:8.

Ntho e ka re sireletsang kgahlanong le maraba a Satane, ke ho ba le kamano e ntle le Mmusi wa bokahohle. Jesu o itse: “Mmusi wa lefatshe [Satane] wa tla mme ha ho moo a ntshwarang teng.” (Joh. 14:30) Ke hobaneng ha Jesu a ne a kgodisehile hakaalo? O ile hlalosa a re: “Ya nthomileng o na le nna; ha a a ka a ntlohela ke nnotshi, hobane ka mehla ke etsa dintho tse mo kgahlisang.” (Joh. 8:29) Jwale le wena haeba o leka o thabisa Jehova ka dintho tsohle tseo o di etsang, o ka kgodiseha hore a ke ke a o lahla. Qoba leraba la ho shebella pornography mme Satane a ke ke a o tshwasa.