DIHLOOHO tse fetileng di bontshitse maemo a thata, a ileng a hlahela batho ao ho neng ho le thata hore ba a mamelle. Ha o ntse o mamelletse mathata ao o nang le ona o ka nna wa ipotsa hore na ho na le lebaka la hore o phele kapa na ho na le motho ya o kgathallang. Kgodiseha hore Modimo o bona mathata a o hlahelang le hore o motho wa bohlokwa ho yena.

Mongodi wa Pesaleme ya 86 o ile a bontsha hore o tshepa Jehova ha a ne a re: “Letsatsing la mahlomola a ka ke tla ipiletsa ho wena, etswe o tla nkaraba.” (Pesaleme ya 86:7) O ka nna wa ipotsa hore na Modimo o tla o araba jwang ‘letsatsing la mahlomola a hao.’

Le hoja Modimo a ke ke a fedisa mathata a rona ka yona nako eo, Lentswe la hae e leng Bibele le re tiisetsa hore o tla re fa kgotso e le hore re mamelle, le re: “Le se ke la tshwenyeha ka letho, empa nthong e nngwe le e nngwe ka thapelo le thapedi hammoho le diteboho dikopo tsa lona tse matla di ke di tsebiswe Modimo; mme kgotso ya Modimo e fetang monahano wohle e tla lebela dipelo tsa lona le matla a lona a kelello [le menahano ya lona.]” (Bafilipi 4:6, 7) Re kopa o hlokomele ka moo ditemana tsa Bibele tse latelang di re kgodisang ka teng ho re Modimo o a re kgathalla.

“Ha ho [serobele] le se seng sa tsona se lebalwang ka pela Modimo. . . .le ba bohlokwa ho feta dirobele tse ngata.” —Luka 12:6, 7.

NAHANA KA SENA: Dinonyana tse nyane tse bitswang dirobele di ka bonahala e se tsa bohlokwa hakaalo ho batho ba bangata empa ho Modimo ke tsa bohlokwa. Modimo o hlokomela serobele se seng le se seng hobane ke sa bohlokwa ho yena. Le ha ho le jwalo, ho yena batho ke ba bohlokwa ho feta dirobele. Modimo o nka batho e le ba bohlokwa haholo hobane o ba entse ka “setshwantsho” sa hae ebile ba ka kgona ho ba le makgabane a tshwanang le a hae haesita le ho a bontsha.—Genese 1:26, 27.

“Jehova, o ntlhahlobisisitse ka hohle, mme wa ntseba. . . . O etse hloko monahano wa ka . . . Ntlhahlobe, mme o tsebe menahano ya ka e ntlhokisang botsitso.”—Pesaleme ya 139:1, 2, 23.

 NAHANA KA SENA: Modimo o o tseba hantle. O tseba dintho tse o tshwenyang le hore na o ikutlwa jwang. Le hoja batho ba bang ba ka nna ba se ke ba utlwisisa mathata a hao, Modimo yena o a o kgathalla ebile o batla ho o thusa. Na leo ha se lona lebaka la ho phela?

“Jehova, o utlwe thapelo ya ka; e se eka mohoo wa ka o kopang thuso o ka tla ho wena. . . . Ntshekehele tsebe; letsatsing leo ka lona ke howang, o potlake, o nkarabe. . . . Ka sebele o tla retelehela thapelong ya ba nketsweng ntho e nngwe le e nngwe.”—Pesaleme ya 102:1, 2, 17.

NAHANA KA SENA: Jehova haesale a ntse a bona dintho tse re llisang ho tloha ha batho ba ne ba qala ho hlahelwa ke mathata. (Pesaleme ya 56:8) Modimo o hopola mathata ohle le dintho tse ileng tsa o llisa hobane o motho wa bohlokwa ho yena.

“O se ke wa tadima kwana le kwana, etswe ke nna Modimo wa hao. Ke tla o matlafatsa. Ka sebele ke tla o thusa . . . nna, Jehova Modimo wa hao, ke . . . nna Ya reng ho wena, ‘O se ke wa tshoha. Ke tla o thusa.’”—Esaia 41:10, 13.

NAHANA KA SENA: Modimo o ikemiseditse ho o thusa. Ha o nyahame, o tla o kgothatsa.

“Modimo o ratile lefatshe haholo hoo a ileng a fana ka Mora wa hae ya tswetsweng a nnotshi, e le hore e mong le e mong ya bontshang tumelo ho yena a se ke a timetswa empa a be le bophelo bo sa feleng.”—Johanne 3:16.

NAHANA KA SENA: O motho wa bohlokwa ho Modimo hoo ka lerato a ileng a fana ka mora wa hae Jesu, e le sehlabelo molemong wa hao. Sehlabelo sena se o fa monyetla wa hore o tlo phela ka ho sa feleng lefatsheng ebile o thabile. a