Ke Mang ya re Bakelang Mathata?
Haeba ha se Modimo ya re bakelang mathata, jwale ke mang ya bakang dintwa, malwetse a holofatsang, tlala ya bojadikata, dikoduwa tsa tlhaho le bofutsana? Lentswe la Modimo Bibele, le re hlalosetsa mabaka a mararo a etsang hore batho ba be le mathata:
Boithati, Meharo le Lehloyo. ‘Motho o busitse motho ho mo ntsha kotsi.’ (Moeklesia 8:9) Hangata baithati le batho ba senang lerato, ke bona ba bakelang batho ba bang mathata.
Nako le Ketsahalo e sa Lebellwang. Hangata batho ba ba le mathata “hobane bohle ba hlahelwa ke nako le ketsahalo e sa lebellwang.” (Moeklesia 9:11) Sena se bolela hore ha o le sebakeng se fosahetseng ka nako e fosahetseng, o ka hlahelwa ke kotsi ka lebaka la diphoso tse etswang ke batho ba bang kapa ho se tsotelle ha bona.
Mmusi ya Kgopo wa Lefatshe. Bibele e re bolella ka ho hlaka hore na ke mang ya re bakelang mathata. E re: “Lefatshe lohle le rapaletse matleng a ya kgopo.” (1 Johanne 5:19) Mmusi eo “ya kgopo” ke Satane Diabolose, e leng sebopuwa se matla se sa bonahaleng, qalong e ne e le lengeloi la Modimo empa “ha a a ka a ema a tiile nneteng.” (Johanne 8:44) Mangeloi a mang a ile a latela Satane mme a fetohela Modimo hobane a ne a batla ho itaola, ka ho etsa jwalo, ya eba bademona. (Genese 6:1-5) Ha e sa le ho tloha ka nako eo, Satane le bademona ba hae ba sebedisa matla le bokgopo ho ferekanya lefatshe lena. Re bona sena hantle matsatsing ana. Hona jwale Satane o halefile haholo mme o ‘kgelosa lefatshe lohle leo ho ahilweng ho lona,’ e leng se tlisetsang lefatshe bomadimabe. (Tšenolo 12:9, 12) Kannete Satane ke mmusi ya kgopo ebile ke yena ya re bakelang mathata. O a thaba ha a bona re na le mathata.
NAHANA KA SENA: Ke motho ya kgopo le ya sehloho feela ya ka bakelang batho ba senang molato mathata. Ka lehlakoreng le leng, Bibele e re: “Modimo ke lerato.” (1 Johanne 4:8) Ka lebaka la lerato la hae, “ho ke ho be hole le Modimo wa nnete hore a sebetse bokgopo, le hore Ya Matla Ohle a sebetse ka mokgwa o hlokang toka!”—Jobo 34:10.
Le ha ho le jwalo, o ka nna wa ipotsa, ‘Modimo ya Matla Ohle o tla tlohella hore Satane a nne a etse bokgopo boo ho fihlella neng?’ Jwalo ka ha re se re bone, Modimo o hloile bokgopo ebile o utlwa bohloko haholo ha re hlahelwa ke mathata. Ho feta moo, Lentswe la hae le re: ‘Lahlelang matshwenyeho ohle a lona ho yena, hobane o a le tsotella.’ (1 Petrose 5:7) Modimo o a re rata ebile o na le matla a ho fedisa mathata le kgethollo, jwalo ka ha sehlooho se latelang se tla bontsha. *
^ par. 7 E le hore o fumane dintlha tse ding mabapi le hore na ke hobaneng ha Modimo a dumelletse mathata, sheba kgaolo ya 11 bukeng ya Bibele e re Rutang? e hatisisweng ke Dipaki Tsa Jehova, o ka boela wa e downloada mahala websaeteng ya www.pr2711.com/st-za.
O ka Nna wa Rata le Tsena
TORA YA HO LEBELA
Haufinyane Modimo o Tla Fedisa Mathata Ohle
Re ka tseba jwang hore haufinyana Modimo o tla fedisa mathata le dintho tse bohloko?
DIPOTSO TSA BIBELE DI A ARAJWA
Na Diabolose ke Motho wa Sebele?
Na Satane empa e le bobe kapa bokgopo bo ka hare ho batho kapa ke motho wa sebele?
