Kaha Jesu o ne a phethahetse, o ne a sa hlaheloe ke mathata kapa lintho tse ling tse neng li hlahela batho. Leha ho le joalo, o ne a utloela batho bohloko. O ne a ikemiselitse ho etsa eng kapa eng e le ho thusa batho ba bang esita le ha ho ne ho bonahala eka ha ho hlokahale. O ne a susumetsoa ke kutloelo-bohloko hore a thuse batho. Bona mehlala ea sena Likhaolong Tsa 32, 37, 57 le 99.

Batho ba lilemo tse fapaneng, ho sa tsotellehe hore na ke batho ba baholo kapa ba bacha, ba ne ba nka Jesu a atameleha. O ne a sa etse hore ba utloe a ba phahametse kapa hona hore a bonahale a le maphatha-phathe. Kaha batho ba ne ba bona hore Jesu oa ba tsotella, ba ne ba phutholoha ha ba e-na le eena. Bona sena Likhaolong Tsa 25, 27 le 95.

Jesu o ne a lula a rapela Ntate oa hae ka tieo ha a le boinotšing esita le ha a ne a e-na le barapeli ba ’nete. O ne a rapela maemong a mangata, eseng feela ha a ne a rapella lijo. O ne a rapela ha a leboha Ntate oa hae, ha a mo rorisa le ha a ne a mo kopa tataiso pele a etsa liqeto tsa bohlokoa. Bona mehlala ea sena Likhaolong Tsa 24, 34, 91, 122 le 123.

Ka linako tse ling, Jesu o ne a ikutloa a khathetse a bile a hloka ho phomola. Le maemong ana o ne a beha lithahasello tsa batho ba bang pele ho tsa hae. O ne a sa nke hore lithahasello tsa hae li tla pele ho tsa batho ba bang. Le tabeng ena, o re behetse mohlala oo re lokelang ho o latela. Bona mohlala ona Likhaolong Tsa 19, 41 le 52.

Jesu ha aa ka a ruta feela ka ho tšoarela empa o ile a bontša hore ke motho ea tšoarelang ha a ne a sebelisana le barutuoa ba hae le batho ba bang. Nahanisisa ka mehlala ena e hlahang Likhaolong Tsa 26, 40, 64, 85 le 131.

Ho ile ha profetoa hore boholo ba Bajuda bo ne bo ke ke ba amohela Mesia le hore lira tsa hae li ne li tla mo bolaea. Kahoo, ho ne ho ka ba bonolo hore Jesu a se ke a ithukhubetsa ha a sebeletsa batho. Ho e-na le hoo, o ile a tsoela pele a ruta ’nete ka cheseho. O behetse balateli ba hae mohlala oa hore ba lule ba cheseha le ha ba hanyetsoa kapa ho se motho ea ba natsang. Sheba sena Likhaolong Tsa 16, 72 le 103.

Jesu o ne a phahametse batho ba sa phethahalang ka litsela tse ngata tse se nang palo. Mohlala oa sena o ne o ka bonoa tsebong le bohlaleng ba hae. Kaha o ne a phethahetse ’meleng le kelellong, o ne a e-na le boiphihlelo bo fetang ba motho e mong le e mong. Leha ho le joalo, o ile a sebeletsa ba bang ka boikokobetso. U tla ithuta ho hongata ka sena Likhaolong Tsa 10, 62, 66, 94 le 116.

Jesu o bontšitse mamello ka makhetlo-khetlo ha baapostola ba hae le batho ba bang ba sa mo etsise kapa ba sitoa ho sebelisa lintho tseo a ba rutileng tsona. Ka mamello o ile a pheta-pheta lithuto tseo ba neng ba li hloka e le hore e ka ba metsoalle ea Jehova. Ithute mehlaleng ea Jesu ea mamello Likhaolong Tsa 74, 98, 118 le 135.