E se e le nako e ka holimo ho selemo le halofo joale Johanne Mokolobetsi a tsebahalitse Jesu e le Konyana ea Molimo. Ha Jesu a qala mosebetsi oa hae, ho na le banna ba tšepahalang bao e ileng ea e-ba balateli ba hae. Banna bao ke Andrease, Simone Petrose, Johanne, mohlomong le Jakobo (ngoana’bo Johanne), Filipi le Nathanaele (lebitso le leng la hae ke Bartholome). Hamorao batho ba bang ba bangata ba ile ba latela Jesu.​—Johanne 1:​45-47.

Jesu o se a le malala-a-laotsoe hore a khethe baapostola. E tla ba metsoalle ea hae ’me o tla ba koetlisa. Pele Jesu a khetha baapostola ba hae, o nyolohela thabeng. E ka ’na eaba thaba ena ke e haufi le Kapernauma le Leoatle la Galilea. O qeta bosiu bohle a rapela, mohlomong a kopa bohlale le tataiso ea Jehova pele a etsa qeto. Letsatsing le hlahlamang o bitsa balateli ba hae ’me o khetha baapostola ba 12 har’a bona.

Jesu o khetha ba tšeletseng ba boletsoeng qalong hammoho le Matheu eo Jesu a mo bitsitseng a le ofising ea lekhetho. Ba bang ba bahlano ba khethoang, ke Judase (lebitso la hae le leng ke Thadiase hape ke “mora oa Jakobo”), Simone Mokanana, Thomase, Jakobo mora oa Alfiase le Judase Iskariota.​—Matheu 10:​2-4; Luka 6:16.

Baapostola bana ba 12 ba kile ba tsamaea le Jesu, kahoo o ba tseba hantle. Ba bang ba bona ke beng ka eena. Jakobo le Johanne bao e leng bana ba motho, ke bo-motsoal’a Jesu. Batho ba bang ba lumela hore Alfiase e ne le ngoana oa bo Josefa e leng ntate oa Jesu, kahoo ho ka etsahala hore mor’a Alfiase e leng Jakobo ke motsoala oa Jesu.

Ho bonolo hore Jesu a hopole mabitso a baapostola ba hae. Na uena u ka a hopola? Ntho e tla u thusa ho a hopola ke hore ho na le bo-Simone ba babeli, bo-Jakobo ba babeli le bo-Judase ba babeli. Mora oa bo Simone (Petrose) ke Andrease, ha mora oa bo Jakobo (mor’a Zebedea) e le Johanne. Sena se tla u thusa ho hopola mabitso a baapostola ba robeli. Ba bang ba bane ke monna oa molekhetho (Matheu). E mong ke monna eo hamorao a tla ba le lipelaelo (Thomase). E mong ke ea bitsitsoeng a le tlas’a sefate (Nathanaele), ha e mong e le motsoalle oa Nathanaele (Filipi).

Baapostola ba 11 ke ba Galilea habo Jesu. Nathanaele eena habo ke Kana. Filipi, Petrose le Andrease ba hlaha Bethsaida. Hamorao Petrose le Andrease ba fallela Kapernauma moo e ka ’nang eaba Matheu o ne a lula teng. Jakobo le Johanne ba lula Kapernauma kapa haufi le teng, ebile ba na le khoebo ea ho tšoasa litlhapi haufi le moo ba lulang. Ho bonahala Judase Iskariota eo hamorao a ekang Jesu e le eena feela ea tsoang Judea.