Sheba moshanyana eo ea setšoantšong. O bonahala a se na metsoalle ebile a tšohile, na ha ho joalo? Na ho na le mohla u kileng ua ikutloa joalo?— Ka linako tse ling batho bohle ba ikutloa ka tsela eo. Bibele e bua ka batho ba neng ba sebeletsa Jehova bao le bona ba ileng ba ikutloa ba se na metsoalle ebile ba tšohile. E mong oa bona e ne e le Elia. A re ke re ithute ka eena.

Elia o ne a lula Iseraele, nako e telele pele Jesu a hlaha. Morena oa Iseraele, Akabe o ne a sa rapele Molimo oa ’nete, Jehova. Akabe le mosali oa hae, Jezebele ba ne ba rapela molimo oa bohata, Baale. Batho ba bangata ba Iseraele ba ile ba qala ho rapela Baale. Mofumahali Jezebele o ne a tšoara batho hampe haholo ’me o ne a batla ho bolaea batho ba neng ba rapela Jehova, hammoho le Elia! Na ua tseba hore na Elia o ile a etsa eng?—

 Elia o ile a baleha! O ile a balehela lefeeleng ’me a ipata ka lehaheng. U nahana ke hobane’ng ha a ile a etsa joalo?— E, o ne a tšohile. Empa Elia o ne a sa tlameha ho tšoha letho. Hobane’ng? Hobane o ne a tseba hore Jehova o tla mo thusa. Jehova o kile a bontša Elia hore o na le matla a maholo. Ka letsatsi le leng, Jehova o ile a arabela thapelo ea Elia ka hore a romele mollo o tsoang leholimong. Ho ne ho hlakile hore Jehova o ne a tla thusa Elia.

Ha Elia a ntse a le ka lehaheng, Jehova o ile a bua le eena ’me a mo botsa: ‘U etsa eng mona?’ Elia o ile a araba: ‘Ke ’na feela ea ntseng a u sebeletsa. Ke setse ke le mong feela, ebile ke tšaba hore ba tla mpolaea.’ Elia o ne a nahana hore barapeli ba bang ba Jehova ba bolailoe kaofela. Empa Jehova o ile a re ho Elia: Che, seo hase ’nete. Ho na le batho ba bang ba 7 000 ba ntseng ba ntšebeletsa. U se ke ua tšoha. Ho na le mosebetsi o mongata oo ke batlang hore u o etse!’ Na u nahana hore Elia o ile a thaba ha a utloa seo?—

U ka ithuta eng ho se etsahetseng ka Elia?— Ha ho hlokahale hore u tšohe le hore u ikutloe eka ha u na metsoalle. U na le metsoalle e ratang Jehova le e u ratang. Hape, Jehova o na le matla ’me o tla u thusa ka linako tsohle! Na ua thaba ha u utloa hore ha ho hlokahale hore u ikutloe eka ha u na metsoalle?—