TLHEKEFETSO: Tlaleho e ’ngoe ea Machaba a Kopaneng e re: “Mosali a le mong ho ba bararo o kile a hlekefetsoa ka ho otloa kapa ka motabo ke motho ea mo tsebang. Ho hakanngoa hore lefatšeng lohle, mosali a le mong ho ba bahlano o kotsing ea ho betoa kapa ea teko ea peto.”

BONOKOANE: Litlaleho li bontša hore likenke tse fetang 30 000 li ameha litlolong tsa molao tse etsahalang United States. Latin America teng, motho a le mong ho ba bararo o kile a fetoha lehlatsipa la bonokoane bo etsoang ka mabifi.

LIPOLAO: Ho hakanngoa hore batho ba ka bang 500 000 ba ile ba bolaoa nakong ea selemo feela ’me palo ena e feta ea batho ba ’nileng ba bolaoa lintoeng. Linaheng tse ka boroa ho Afrika le tsa Amerika Bohareng ho ile ha e-ba le lipalo-palo tse phahameng ka ho fetisisa tsa lipolao. Lipalo-palo tsena li phahame ka makhetlo a mane ho feta tsa lefatše ka kakaretso. Selemong se le seng feela, ho ile ha bolaoa batho ba fetang 100 000 linaheng tsa Latin America ’me Brazil ha bolaoa ba ka bang 50 000. Na ho na le ho ka etsoang ho felisa bokhopo ka ho feletseng?

Ke hobane’ng ha bokhopo bo atile hakaale? Ho na le mabaka a mangata a bakileng sena ’me a mang a ’ona ke ana: khohlano e bakoang ke ho se leka-lekane ho teng pakeng tsa barui le mafutsana, ha bana ba bona batho ba loanang, tšebeliso e mpe ea joala le lithethefatsi, ho se hlomphe bophelo ba batho ba bang, le hobane linokoane li tseba hore li ke ke tsa fuoa kotlo.

Ke ’nete hore linaheng tse ling bonokoane bo fokotsehile. Motse-moholo oa Brazil e leng São Paulo, lipalo-palo tsa lipolao li ile tsa theoha ka liphesente tse ka bang 80 lilemong tse leshome tse fetileng. Leha ho le joalo, ho ntse ho e-na le lipolao tse ngata haholo kaha ho baahi ba 10 000 ho bolaoa motho a le mong. Empa ke’ng e tla ke e felise bokhopo ka ho feletseng?

E ’ngoe ea lintho tse ka felisang bokhopo lefatšeng ke haeba batho ba ka fetola tsela eo ba nahanang ka eona le eo ba itšoereng ka eona. Ba lokela ho tlohela boikhohomoso, meharo le boithati empa ba ratane, ba hlomphane le ho tsotellana.

Ke eng e ka thusang motho hore a etse liphetoho tse khōlō hakaale? Nahana ka seo Bibele e se rutang:

• “Se boleloang ke lerato la Molimo ke sena, hore re boloke litaelo tsa hae.”—1 Johanne 5:3.

• “Ho tšaba Jehova ho bolela ho hloea bobe.” *​—Liproverbia 8:13.

Ho rata Molimo le ho tšaba ho mo utloisa bohloko  ke hona ho ka khonang ho susumetsa esita le batho ba khopo hore ba fetole bophelo ba bona. Sena ha se etsahale ka mohlolo empa se etsahala hobane batho ba fetola tsela eo ba phelang ka eona ka ho feletseng. Empa na see se ka fela sa etsahala?

Nahana ka Alex, * ea qetileng lilemo tse 19 a le teronkong Brazil a qosetsoa tlheka-tlheko. O ile a ithuta Bibele ’me ea e-ba Paki ea Jehova ka selemo sa 2000. Na o fetohile e le kannete? E, ebile o ikoahlaela lintho tse mpe tseo a ileng a li etsa. Alex o re: “Ke rata Molimo haholo hobane o entse hore ke ikutloe ke tšoaretsoe e le kannete. Kananelo le lerato la ka ho Jehova li nthusitse hore ke fetole boitšoaro.”

César, eo le eena a lulang Brazil, o ne a thuha matlong a bile a utsoa a hlometse. O phetse ka tsela ena ka lilemo tse ka bang 15. O ile a fetoloa ke eng? Ha a ne a le teronkong o ile a kopana le Lipaki Tsa Jehova eaba o ithuta Bibele le tsona. César o re: “Ke ile ka qala ho phela ka tsela e molemo. Ka qala ho rata Molimo le ho mo tšaba, e leng ho tšaba ho etsa lintho tse mpe le ho mo utloisa bohloko. Ke ne ke sa batle hore ho bonahale eka ha ke ananele mohau oa Molimo. Ho rata Molimo le ho mo tšaba ke hona ho ileng ha ntšusumelletsa ho etsa lintho tse lokileng.”

Re ithuta’ng mehlaleng ea batho baa? Re ithuta hore Bibele e na le matla a ho fetola tsela eo batho ba phelang ka eona, ka ho etsa hore ba fetole tsela eo ba nahanang ka eona. (Baefese 4:23) Alex, eo re buileng ka eena pejana o re: “Lintho tseo ke ithutileng tsona Bibeleng li tšoana le metsi a hloekileng a hlatsoang menahano e mebe kelellong ea ka. Ke ne ke sa nahane hore ke tla ke ke khone ho tlosa menahano e joalo.” Haeba re lula re nahana ka lintho tse hloekileng tse tsoang ka Bibeleng, li ka ntša kapa tsa hlatsoa menahano e litšila. Lentsoe la Molimo le na le matla a ho hloekisa. (Baefese 5:26) ’Nete ke hore batho ba khopo le baithati ba ka khona ho fetoha ’me ea e-ba batho ba mosa le ba nang le khotso. (Baroma 12:18) Ba ka ba le khotso bophelong hobane ba sebelisa melao e tsoang Bibeleng.​—Esaia 48:18.

Lipaki Tsa Jehova tse fetang limilione tse robeli tse lulang linaheng tse 240 li tseba ntho e ka felisang bokhopo. Batho ba merabe eohle le ba tsoang likarolong tse fapaneng tsa bophelo ba ithutile ho rata Molimo le ho mo tšaba. Ba boetse ba ithutile ho rata batho ba bang le ho phela ka khotso e le lelapa la lefatšeng lohle. (1 Petrose 4:8) Tsela eo ba phelang ka eona ke bopaki bo tiileng ba hore batho ba ka khona ho phelisana ka khotso.

Bibele e re haufinyane Molimo o tla felisa bokhopo lefatšeng. Lefatše lena le tletseng lintoa le letetsoe ke ‘letsatsi la kahlolo le la timetso ea batho ba se nang bomolimo.’ (2 Petrose 3:5-7) Batho ba khopo ha ba sa tla hlola ba utloisa ba bang bohloko. Ke eng e re kholisang hore Molimo o batla ho nka khato ’me a felise bokhopo lefatšeng?

Bibele e re Molimo “o hloile mang kapa mang ea ratang pefo.” (Pesaleme ea 11:5) ’Mōpi oa rōna o rata khotso le toka. (Pesaleme ea 33:5; 37:28) Ke kahoo a ke keng a lumella hore batho ba khopo ba lule ba le teng.

Lefatše le lecha la khotso le haufi! (Pesaleme ea 37:11; 72:14) Re u khothalletsa hore u ithute ho eketsehileng hore na u ka etsa joang e le hore u phele lefatšeng le se nang lintoa.