HAEBA u kile ua nyahamisoa ke bolumeli bo hlophisitsoeng kapa u kile ua nka hore hase ba bohlokoa ho uena, hase uena feela ea kileng a ikutloa joalo. Ha e le hantle, palo ea batho ba khethang ho se ikamahanye le bolumeli bo hlophisitsoeng e ntse e hōla ka potlako.

Batho ba bang ba tlohetse malumeli a hlophisitsoeng hobane ba lumela hore mekhatlo e joalo e tletse boikaketsi le khethollo. Athe ba bang ba boetse ba thatafalloa hore ba latele mokhoa oa borapeli bo hlophisitsoeng. Ha ba bang bona ba nka hore ha ba hloke bolumeli bo hlophisitsoeng hore ba rapele Molimo. Ha e le hantle, ke eng seo Bibele e se rutang ka bolumeli bo hlophisitsoeng?

Bibele e hlalosa ka ho hlaka tsela eo bapatriareka ba boholo-holo, ba kang Abrahama, Isaka le Jakobo ba neng ba rapela ka eona. Ka mohlala, ka lekhetlo le leng Molimo o ile a re: “Etsoe ke mo tsebile [Abrahama] e le hore a ka laela bara ba hae le ba ntlo ea hae ba tlang ka mor’a hae hore ba boloke tsela ea Jehova ba etse ho loka le kahlolo.” (Genese 18:19) Abrahama e ne e le motsoalle oa Molimo, kahoo o ne a e-na le kamano e khethehileng le ’Mōpi. Empa o ne a boetse a rapela hammoho le ba lelapa la hae. Ka ho tšoanang, bapatriareka ba bang bao e neng e le metsoalle ea Molimo ba ne ba rapela e le sehlopha, hangata ba e-na le ba malapa a bona, beng ka bona le bahlanka ba bona.

Ha nako e ntse e ea, Molimo o ile a laela Baiseraele ba boholo-holo, ’me hamorao a laela le Bakreste ba lekholong la pele la lilemo, hore ba bokane bakeng sa borapeli. (Levitike 23:2, 4; Baheberu 10:24, 25) Liketsahalo tseo tsa borapeli bo hlophisitsoeng li ne li akarelletsa ho bina, ho bala Mangolo le ho rapela phatlalatsa. (Nehemia 8:1-8; Bakolose 3:16) Mangolo a ne a boetse a laela hore sehlopha sa banna ba tšoanelehang se etelle phutheho pele borapeling.—1 Timothea 3:1-10.

Ha re ipapisa le mehlala ena ea Mangolo, hoa utloahala ho etsa qeto ea hore le kajeno, Molimo o lebeletse hore metsoalle ea hae e mo rapele ka tsela e hlophisitsoeng. Re fumana melemo ha re rapela Molimo re le karolo ea phutheho.

Ka mohlala, Mangolo a tšoantša morapeli oa ’nete le motho ea tsamaeang tseleng e moqotetsane; maemong a mang e mo tšoantša le semathi peisong. (Matheu 7:14; 1 Bakorinthe 9:24-27) Ha semathi se matha lebelo la mokoka, tseleng e boima, se ka khathala habonolo ’me qetellong sa tela. Leha ho le joalo, hangata semathi se ka ikitlaetsa le ho feta haeba se khothatsoa ke ba bang. Ka ho tšoanang, motho ea batlang ho rapela Molimo ka mokhoa o nepahetseng a ka atleha ho ba le kamano le Molimo ho sa tsotellehe litšitiso, haeba a khothatsoa ke barapeli ba bang.

Sena se hlakisa mantsoe a Baheberu 10:24, 25, moo Bibele e reng: “A re nahanelaneng hore re susumeletsane leratong le mesebetsing  e metle, re sa tlohele ho bokana ha rōna.” Ha e le hantle, Mangolo a bontša hore barapeli ba ’nete ba ne ba tla rapela ’moho joaloka bana ba motho, ba kopane e le ’mele oa tšoantšetso.

Bibele e hlalosa hore ’mele oo, kapa phutheho, o kopantsoe ka tlamo ea lerato le khotso. Ka mohlala, Baefese 4:2, 3 e eletsa barapeli ba ’nete hore ba bonahatse “ho ikokobetsa ho feletseng kelellong le bonolo, ka tiisetso, le mamellane ka lerato, le leke ka tieo ho boloka bonngoe ba moea ka tlamo e kopanyang ea khotso.” U ne u ka mamela keletso ee joang haeba u ne u sa ikamahanye le barapeli ba bang?

Thato ea Molimo ke hore barapeli ba ’nete ba momahane hammoho tumelong, ho e-na le hore e be mokhatlo oa batho bao ka bomong ba inahanelang lintho tsa moea. Bibele e eletsa barapeli hore ba bue ka tumellano, ba qobe likarohano le “hore [ba] kopane ka ho loketseng kelellong e tšoanang le mokhoeng o tšoanang oa ho nahana.” (1 Bakorinthe 1:10) Mantsoe ana a ka be a sa utloahale haeba Molimo a ne a batla hore batho ba mo rapele e le batho ka bomong.

Ho hlakile hore bopaki ba Bibele bo bontša hore borapeli bo hlophisitsoeng ke bona boo Molimo a bo amohelang. Ho feta moo, bolumeli bo hlophisitsoeng boo Mangolo a bo hlalosang, boo Molimo a bo ratang, bo ka u fa tšehetso eo u e hlokang hore u khotsofatse litlhoko tsa hao tsa moea.—Matheu 5:3.

Ke ’nete hore kajeno malumeli a mangata a hlophisitsoeng a molato oa boikaketsi le liketso tse ngata tse sehlōhō. Leha ho le joalo, sena ha se bolele hore u lokela ho hana malumeli ’ohle a hlophisitsoeng. E tlameha ebe ho na le bolumeli lefatšeng bo hlophiselitsoeng ho rata batho bohle—bolumeli bo hlophiselitsoeng ho ruta batho melao-motheo ea Molimo ea boitšoaro. Bolumeli bo joalo bo hlophisitsoeng bo ka u thusa hore u be le tumelo ea ’nete. Bibele e fana ka matšoao a loketseng a ka u thusang hore u khetholle borapeli bo hlophisitsoeng boo Molimo a bo amohelang.