1. 1. SATANE DIABOLOSE. Satane, eleng lengeloi la lerabele ke eena ea etsang hore ho be le lehloeo. Molimo o tla felisa Satane le bohle bao a ba susumetsang hore ba be le lehloeo.​—Pesaleme ea 37:​38; Baroma 16:20.

2. 2. LEFATŠE LE BUSOANG KE SATANE LE TLETSENG LEHLOEO. Molimo o tl’o felisa ntho e ’ngoe le e ’ngoe e bakang lehloeo, ho akarelletsa le bo-ralipolotiki le baeta-pele ba bolumeli ba hlohlelletsang lehloeo. Molimo o tla boela a felise bo-rakhoebo ba meharo, ba tletseng bobolu le ba tlatlapang batho.​—2 Petrose 3:​13.[1]

3. 3. BOETSALIBE. Bibele e ruta hore batho ba tsoetsoe e le baetsalibe, e leng se etsang hore ba nahane le ho etsa lintho tse fosahetseng. (Baroma 5:​12) Lehloeo le lona le bakoa ke hobane batho ba tsoetsoe e le baetsalibe. Molimo o tla thusa batho hore ba hlole menahano ena e fosahetseng e le hore a ka felisa lehloeo ’me le se ke la hlola le e-ba teng.​—Esaia 54:​13.

1. 1. HO HLOKA TOKA HO TL’O FELA. ’Muso oa Molimo o tl’o busa lefatše ka toka. O tla busa lefatše o le leholimong ka ho sa feleng. (Daniele 2:​44) Khethollo le lehloeo li tla fela. Molimo o tla felisa ho hloka toka ho teng hona joale.​—Luka 18:7.

2. 2. BATHO BOHLE BA TLA PHELA KA KHOTSO. Ha ho motho ea tla utloa bohloko ka lebaka la lintoa. (Pesaleme ea 46:9) Batho ba tla beng ba phela lefatšeng e tla ba ba ratang khotso, kahoo lefatše e tla ba sebaka se bolokehileng.​—Pesaleme ea 72:7.

3. 3. BATHO BOHLE BA TLA PHELA MAEMONG A MATLE. Batho bohle ba tla ratana. (Matheu 22:​39) Ha ho na motho ea tla utloa bohloko ka lebaka la lintho tse fetileng, kapa ho nahana ka tsona. (Esaia 65:​17) Nakong eo lehloeo le seng le le sieo, batho ba tla “fumana thabo e phethehileng khotsong e ngata.”​—Pesaleme ea 37:11.

Na u ka thabela ho phela lefatšeng leo? Le hona joale, batho ba bangata ba khona ho hlola lehloeo ka ho sebelisa keletso ea Bibele. (Pesaleme ea 37:8) Lefatšeng lohle Lipaki Tsa Jehova li etsa seo. Le hoja e le batho ba litso tse fapaneng ’me ba holisitsoe ka tsela e sa ​—tšoaneng, baa utloana ebile baa ratana.​—Esaia 2:​2-4.[2]

Lipaki Tsa Jehova li ka thabela ho arolelana le uena seo li ithutileng sona ka hore na li mamella ho hloka toka le khethollo joang. Seo u ithutang sona se ka u thusa hore u khaotse ho ba le lehloeo ’me u be le lerato. U ka boela oa ithuta kamoo u ka ratang batho ba se nang kananelo le ba nang le lehloeo. Ha u etsa joalo u tla thaba ’me u tla thabela ho ba motsoalle oa batho ba bang. U tla boela u ithute hore na u lokela ho etsa’ng e le hore u phele lefatšeng le busoang ke ’Muso oa Molimo, nakong eo lehloeo le tla beng le le sieo.​—Pesaleme ea 37:29.