Limpho tse ling ke tsa bohlokoa ho rona hobane li tsoa ho batho ba itseng ba tsebahalang kapa bao re ba ratang haholo. Le hoja e le tsa boleng bo tlaase, limpho tse ling ke tsa bohlokoa hobane feela li tsoa ho setho sa lelapa kapa ho metsoalle ea rona. Ho joalo le ka mpho eo ntate-moholo Russell a ileng a e fa Jordan, eo re buileng ka eena sehloohong se fetileng. Taba ee e amana joang le mpho ea thekollo?

Bibele e re: “Molimo o ile a romela Mora oa hae ea tsoetsoeng a ’notši lefatšeng e le hore re ka fumana bophelo ka eena.” (1 Johanne 4:9) Sena se etsa hore thekollo e be mpho ea bohlokoa haholo. Molimo o matla ’ohle. Ha mopesaleme a bua ka Molimo, o ile a re: “Uena, eo lebitso la hao e leng Jehova, uena u le mong u ea Phahameng ka ho Fetisisa holim’a lefatše lohle.” (Pesaleme ea 83:​18). Ruri ha ho motho e mong ea ka re fang mpho ea bohlokoa hakaalo.

Bibele e boetse e re Molimo ke ‘Ntate oa rona.’ (Esaia 63:​16) Ka tsela efe? O re file bophelo. Ho ekelletsa moo, Jehova ke ntate oa rona, ’me o re rata joalokaha ntate a rata bana ba hae. Ha a bua le batho ba hae ba mehleng ea Bibele, ba neng ba boetse ba bitsoa Efraime, o ile a re: “Na Efraime ke mora oa bohlokoa ho ’na, kapa ngoana ea tšoaroang ka lerato? . . . Ruri ke tla mo hauhela.” (Jeremia 31:​20) Molimo o ikutloa joalo le ka barapeli ba hae ba mehleng ena. Hase feela hore ke ’Mopi oa rona ea matla ’ohle, empa hape ke Motsoalle le Ntate oa rona ea tšepahalang. Ka sebele sena se etsa hore limpho tsohle tseo a re fang tsona e be tsa bohlokoa.

Limpho tse ling li bohlokoa hobane li fanoe ka lerato, eseng ka ho qobelloa. Mofani ea se nang boithati ha a lebelle hore a buseletsoe ka lebaka la ho bontša ba bang mosa.

Molimo o re file Mora oa hae hobane a re rata. Bibele e re: “Lerato la Molimo le ile la bonahatsoa ho rōna ka sena, hobane Molimo o ile a romela Mora oa hae ea tsoetsoeng a ’notši lefatšeng.” Hobane’ng? “E le hore re ka fumana bophelo ka eena.” (1 Johanne 4:9) Na Molimo o ne a tlamehile ho etsa joalo? Ho hang! “Thekollo e lefiloeng ke Kreste Jesu” ke ponahatso ea lerato la Molimo le “mosa oa hae o sa tšoanelang” kapa mohau oa hae.​—Baroma 3:24.

Mpho ee ea Molimo e bontša mohau oa hae ka tsela efe? Bibele e re: “Molimo o buella lerato la hae ho rōna ka hore, ha re sa ntse re le baetsalibe, Kreste o ile a re shoela.” (Baroma 5:8) Molimo o ile a susumetsoa ke lerato hore a thuse batho ba fokolang, ba baetsalibe le ba se nang mang oe! Ka hona, mpho ena ha rea e sebeletsa ebile re ke ke ra khona ho patala Molimo bakeng sa eona. Ha ho mohla ho tla ke ho be le lerato le fetang leo Molimo a re bontšitseng lona.

Limpho tse ling ke tsa bohlokoa hobane mofani oa tsona a ile a tela lintho tse ngata e le hore a fane ka tsona. Haeba motho a tela ntho eo a e ratang haholo ’me a re fa eona, re ananela mpho eo le ho feta.

Molimo o ile “a fana ka Mora oa hae ea tsoetsoeng a ’notši.” (Johanne 3:16) Ruri Jesu e ne e le motho oa bohlokoa haholo ho eena. Lilemong tse ngata-ngata tseo Molimo a neng a ntse a bopa bokahohle ka tsona, Jesu o ne a sebetsa le eena ’me ea e-ba ‘eo Molimo a neng a mo rata ka ho khethehileng.’ (Liproverbia 8:30) Jesu ke ‘Mora oa Molimo ea ratoang’ hape ke “setšoantšo sa Molimo ea sa bonahaleng.” (Bakolose 1:13-15) Ha ho kamano e matla ho feta e teng pakeng tsa Molimo le Jesu.

Leha ho le joalo, Molimo ha aa ka “a qenehela esita le Mora oa hae.” (Baroma 8:32) Jehova o re file se molemohali seo a nang le sona. Ka ho fana ka mpho ena, Molimo o tetse ntho e kholo ka ho fetisisa ho eena.

Ka linako tse ling mpho e ka ba ea bohlokoa hobane e tlile ka nako e loketseng, ka nako eo u e hlokang e le kannete. Mohlala, na u ne u ke ke oa thaba haeba motho e mong a ne a ka u patalla hore u fumane kalafo sepetlele ho pholosa bophelo ba hao? Ruri u ne u ke ke oa khaotsa ho mo leboha!

Bibele e re: “Feela joalokaha ka Adama bohle ba shoa, kahoo hape bohle ba tla phelisoa ka Kreste.” (1 Bakorinthe 15:​22) Joaloka bana ba Adama, kaofela ha rona rea “shoa” kahoo re sitoa ho itokolla sebeng le lefung kapa hona ho boelana le Molimo. Re boetse re ke ke ra khona ho ‘phelisa’ batho ba bang. Bibele e beha taba ena tjena: “Ha ho le ea mong oa bona eo ka mokhoa leha e le ofe a ka lopollang esita le mor’abo, kapa a fa Molimo thekollo bakeng sa hae.” (Pesaleme ea 49:​7, 8) Re hloka thekollo e le kannete hobane re ne re ke ke ra khona ho itokolla sebeng. Haeba e ne e se ka eona ho ne ho se mohla re tla boelana le Molimo.

Ka lebaka la lerato la hae le leholo, Jehova o ile a ithaopela ho lefella “kalafo” eo re neng re e hloka, e le hore ‘bohle ba ka phelisoa’ ka Kreste Jesu. Thekollo e khona ho finyella see joang? “Mali a Mora oa hae Jesu a re hloekisa sebeng sohle.” Kahoo, haeba re bontša  tumelo sehlabelong sa thekollo se entsoeng ka mali a Jesu, re ka fumana tšoarelo bakeng sa libe tsa rona ’me ra ba le monyetla oa ho fumana bophelo bo sa feleng. (1 Johanne 1:7; 5:13) Thekollo e tla thusa beng ka rona ba hlokahetseng joang? Bibele e re: “Kaha lefu le teng ka motho, tsoho ea bafu le eona e teng ka motho [e leng Jesu].”​—1 Bakorinthe 15:21. *

Ha ho na mpho e ka lekanang le eo Molimo a ileng a re fa eona ka Jesu. Ha ho motho ea kileng a tela ho hongata molemong oa rona ho feta Jehova Molimo, ebile ha ho mpho eo re e hlokang ho feta sehlabelo se re lokollang sebeng le lefung. Ruri thekollo ke mpho ea bohlokoa ka ho fetisisa!