Ka la 1 February, 1943, tlelase ea pele ea sekolo se khethehileng haholo e ile ea qala ka leboea ho New York. Sekolo seo hona joale se tsejoang e le Sekolo sa Bibele sa Gileade sa Watchtower, se ’nile sa fana ka thupelo e khethehileng ho banna le basali ba fetang 8 000 ba tsoang likarolong tsohle tsa lefatše.

Jonathan, e leng seithuti sehlopheng se sa tsoa abeloa mangolo sekolong sa Gileade, o re: “Thuto eo re e fumaneng e thehiloeng Lentsoeng la Molimo, e tla re thusa hore re atlehe tšimong ea sebakeng sefe kapa sefe le ho batho ba litso tse sa tšoaneng.” Mosali oa hae ea bitsoang Marnie, o phaella ka ho re: “Ho feta leha e le neng pele, ke labalabela ho thusa batho ho hlokomela hore ’Mōpi oa rōna o rerile ho re tlisetsa bophelo bo molemo ka ho fetisisa. Ke kholisehile hore ho thusa batho ba bang hore ba tsebe Jehova ho tla ntlafatsa bophelo ba bona.”

Sekolo sa Gileade se fana ka thupelo e nkang likhoeli tse hlano, ntle ho tefo. Ntho e ka sehloohong e rutoang sekolong sena ke Bibele le bohlokoa ba ho etsa mosebetsi oa boboleli. Morero oa thupelo ena ke ho thusa liithuti hore li bonahatse litšobotsi tsa moea tse tla li thusa ha li thulana le mathata le hore li khothatse le ho matlafatsa bahlanka ba Molimo. Nakong ea thupelo, liithuti li qeta nako e ngata ka tlelaseng li tšohla melao-motheo ea Mangolo e li thusang hore li matlafatse kamano eo li nang le eona le Molimo oa tsona, Jehova.

Banyalani ba eang sekolong sa Gileade ba se ba ntse ba le tšebeletsong ea nako e tletseng. Ka mor’a hore ba abeloe mangolo, ba ka ’na ba khutlela kabelong ea bona kapa ba abeloa hore ba il’o sebeletsa naheng e ’ngoe. Ba bang ba abeloa ho il’o sebeletsa ho e ’ngoe ea liofisi tse 90 tsa makala tsa Lipaki Tsa Jehova. Ba bangata ba abeloa ho sebeletsa libakeng tse nang le baahi ba bangata moo mosebetsi oa bona oa boboleli o tla khona ho beha litholoana.

Qalong, Sekolo sa Gileade se ne se le Kingdom Farm e South Lansing, New York. Ka 1961, se ile sa isoa ntlo-khōlō ea Lipaki Tsa Jehova Brooklyn, New York. Ho tloha ka 1988 ho fihlela ka 1995, se ne se tšoareloa Watchtower Farms, e Wallkill, New York. Eaba ka 1995, se isoa moo se ntseng se le teng hona joale, e leng Setsing sa Thupelo sa Watchtower se Patterson, New York. Ka March 2013, liithuti tsa sehlopha sa bo134 li ile tsa abeloa mangolo.

Ka lilemo tse 70, liithuti tse tsoang Sekolong sa Bibele sa Gileade sa Watchtower li ’nile tsa beha mohlala o motle oa ho paka ka Jehova ka botšepehi.