Éster 4:1-17
4 Barang Mordekai ngadéngé éta kabéh, manéhna nyoéhkeun bajuna, maké kaén goni, sarta ngawurkeun lebu kana awakna. Tuluy manéhna indit ka tengah kota sarta ceurik satarik-tarikna bakating ku nalangsa.
2 Manéhna leumpang ngan nepi ka gerbang istana, lantaran teu meunang aya nu asup liwat gerbang istana maké kaén goni.
3 Urang Yahudi nu aya di kabéh propinsi nu geus ngadéngé kekecapan jeung putusan Raja tingjarerit. Maranéhna gé paruasa bari careurik auk-aukan. Loba nu ngagolér luhureun kaén goni jeung lebu.
4 Waktu Ratu Éster dibéjaan ku para palayanna nu lalaki jeung nu awéwé, Ratu sedih pisan. Tuluy Ratu ngirim baju supaya Mordekai teu maké kaén goni, tapi manéhna embungeun.
5 Éster ngageroan Hatakh, salah sahiji palayan Raja nu ditugaskeun pikeun ngalalayanan manéhna. Hatakh dititah nanyakeun ka Mordekai naon nu sabenerna kajadian jeung ku naon bisa kitu.
6 Jadi Hatakh manggihan Mordekai di alun-alun kota hareupeun gerbang istana.
7 Mordekai nyaritakeun sakabéh kajadianana sarta méré nyaho jumlah duit nu dijangjikeun ku Haman bakal disetorkeun kana kas karajaan pikeun ngamusnakeun urang Yahudi.
8 Mordekai gé méré surat nu eusina putusan nu diumumkeun di Syusyan* ngeunaan bangsa Yahudi nu kudu dimusnakeun. Hatakh dititah némbongkeun éta surat ka Éster sarta ngajelaskeun kajadianana. Hatakh gé dititah ngabéjaan Éster sina ngadep ka Raja sarta ménta supaya bangsana Éster dipikawelas.
9 Geus kitu, Hatakh balik deui jeung méré nyaho ucapan Mordekai ka Éster.
10 Éster nitah Hatakh ngomong kieu ka Mordekai,
11 ”Sadaya palayan Raja jeung rahayat di propinsi karajaan tarerangeun aya hiji hukum nu ditetepkeun, nyaéta upami aya nu sumping ka buruan istana palih lebet, boh pameget boh istri, padahal teu disauran ku Raja, manéhna kudu dipaéhan. Tapi upami Raja nyodorkeun tongkat emasna, éta jalma moal dipaéhan. Tah abdi téh tos 30 dinten teu disauran ku Raja.”
12 Barang ngadéngé omongan Éster,
13 Mordekai ngajawab, ”Nyai, ulah nyangka Nyai téh bakal salamet, moal dipaéhan kawas urang Yahudi séjénna pédah aya di istana Raja.
14 Lamun Nyai ayeuna cicing waé, urang Yahudi mah pasti aya nu nulungan jeung nyalametkeun. Tapi Nyai jeung kulawarga bapa Nyai bakal musna. Boa-boa Nyai dijadikeun Ratu téh jang kaayaan jiga kieu.”
15 Tuluy Éster ngajawab Mordekai,
16 ”Kumpulkeun sadaya urang Yahudi nu aya di Syusyan, sok paruasa demi abdi. Ulah tuang atanapi ngaleueut salami tilu dinten, siang wengi. Abdi sareng para palayan awéwé abdi gé badé puasa. Tos kitu, abdi badé ngadep ka Raja sanajan éta téh ngalanggar hukum. Saupami abdi kedah maot, keun wéh abdi maot.”
17 Bral Mordekai indit jeung ngalaksanakeun paménta Éster.
Catetan Tambihan
^ Atawa ”Susa”.
