Budalan 11:1-10
11 Yéhuwa ngomong ka Musa, ”Kuring bakal ngadatangkeun hiji hukuman deui keur Firaun jeung Mesir. Sanggeus kitu mah manéhna bakal ngidinan maranéh indit, malah maranéh bakal diusir ti ieu nagri.
2 Ayeuna pék béjaan urang Israél, boh lalaki boh awéwé, sina ménta barang-barang tina emas jeung pérak ka urang Mesir, tatanggana.”
3 Ku Yéhuwa urang Mesir disina bageur ka urang Israél. Musa gé dihormat pisan di Mesir, boh ku para bawahan Firaun boh ku rahayat Mesir.
4 Tuluy Musa ngomong ka Firaun, ”Ieu nu diucapkeun ku Yéhuwa, ’Engké kira-kira tengah peuting, Kuring bakal ngider ka sakuliah Mesir.
5 Tuluy sakabéh anak cikal di Mesir bakal paéh, ti anak cikal Firaun nu diuk dina tahta nepi ka anak cikal palayan awéwé nu pangrendahna.* Sakabéh anak cikal ingon-ingon gé bakal paéh.
6 Di sakuliah Mesir jalma-jalma bakal careurik gogoakan. Can pernah aya nu kawas kitu, ka hareupna gé moal aya deui.
7 Tapi urang Israél jeung ingon-ingonna mah moal ngalaman nanaon. Anjing gé moal wanieun ngagogogan maranéhna. Ku kituna, manéh bakal nyaho yén Kuring, Yéhuwa, ngabédakeun urang Israél ti urang Mesir.’”
8 Tuluy Musa ngomong deui, ”Sakabéh bawahan Raja pasti bakal datang ka abdi tuluy sujud méménta kieu, ’Sok atuh manéh jeung bangsa manéh geura indit ti dieu.’ Sanggeus kitu, abdi bakal indit ti Mesir.” Musa kacida ambekna tuluy indit ninggalkeun Firaun.
9 Tuluy Yéhuwa ngomong ka Musa, ”Firaun moal ngadéngékeun manéh. Nya, éta téh supaya Kuring bisa nyieun leuwih loba mujijat di Mesir.”
10 Musa jeung Harun geus némbongkeun sakabéh mujijat di hareupeun Firaun. Tapi Firaun ku Yéhuwa diantep sina bedegong sarta henteu ngidinan urang Israél indit ti Mesir.
Catetan Tambihan
^ Atawa ”nu keur digawé maké gilingan leungeun”.
