Budalan 15:1-27
15 Harita, Musa jeung urang Israél ngawih keur Yéhuwa,
”Abdi badé ngawih kanggo Yéhuwa lantaran Anjeunna tos unggul.
Kuda jeung nu tumpakna ku Anjeunna digebruskeun ka laut.
2 Yah* téh nu nguatkeun jeung negerkeun abdi. Anjeunna nu nyalametkeun abdi.
Anjeunna téh Allah abdi, abdi bakal muji Anjeunna. Anjeunna téh Allahna karuhun abdi, abdi bakal ngagungkeun Anjeunna.
3 Yéhuwa téh prajurit nu kuat. Yéhuwa nami-Na.
4 Karéta-karéta perang jeung pasukan Firaun ku Anjeunna digebruskeun ka laut.Prajurit-prajurit nu panghébatna dilelepkeun ka Laut Beureum.
5 Cai nu motah ngalingkup maranéhna. Maranéhna titeuleum ka jero laut kawas batu.
6 Nun Yéhuwa, panangan katuhu Gusti téh kuat pisan.Nun Yéhuwa, panangan katuhu Gusti ngancurkeun musuh.
7 Ku kakuatan Gusti nu hébat, Gusti ngabalangkeun saha waé nu ngalawan Gusti.Amarah Gusti nu ngagedur ngaduruk maranéhna kawas jarami.
8 Cai ditiup ku napas Gusti, seug ngadingding.Caina ngadingding ajeg kawas témbok.Cai nu motah jadi padet di tengah-tengah laut.
9 Ceuk musuh, ’Aing rék ngudag jeung néwak maranéhna!
Barang-barangna rék dijarah sakahayang aing tuluy dibagi-bagikeun!
Aing rék nyabut pedang tuluy nalukkeun maranéhna!’
10 Cai ngarungkup maranéhna lantaran ditiup ku napas Gusti.Maranéhna kawas logam nu beurat nu tilelep ka laut nu motah.
11 Saha allah nu sapertos Gusti, nun Yéhuwa?
Gusti téh Mahasuci, teu aya allah nu sapertos Gusti.
Gusti ngadamel kaajaiban, Gusti layak dihormat jeung dipuji.
12 Gusti ngangkat panangan katuhu, seug maranéhna dilegleg bumi.
13 Gusti némbongkeun asih satia Gusti ku cara nungtun umat Gusti nu geus dibébaskeun.Gusti némbongkeun kakuatan Gusti waktu ngabingbing maranéhna ka tempat suci Gusti.
14 Bangsa-bangsa pasti ngadéngé béjana, seug galumeter.Penduduk Filistia bakal nalangsa.
15 Harita, para kapala kaom* Édom bakal sarieuneun,Para pangawasa Moab nu perkasa bakal ngadégdég,
Sarta sakabéh penduduk Kanaan bakal pegat harepan.
16 Maranéhna bakal sieun jeung ngadégdég.
Ku lantaran panangan Gusti nu kuat, maranéhna cicing waé kawas batu,Nepi ka umat Gusti ngaliwat, nun Yéhuwa,Nepi ka umat pilihan Gusti ngaliwat.
17 Gusti bakal nyandak umat Gusti ka gunung milik Gusti sarta nempatkeun maranéhna di dinya,Di tempat nu geus disiapkeun pikeun jadi panglinggihan Gusti, nun Yéhuwa,Tempat suci nu diadegkeun ku panangan Gusti, nun Yéhuwa.
18 Yéhuwa bakal maréntah jadi raja salalanggengna.
19 Waktu kuda, karéta perang, jeung pasukan kudana Firaun ngudag ka laut,Cai laut ku Yéhuwa disina ngarungkup maranéhna,Ari urang Israél mah leumpang di taneuh nu garing di tengah-tengah laut.”
20 Tuluy Nabiah Miryam lanceukna Harun nyokot rabana. Sakabéh awéwé gé milu narabeuh rabana bari ngarigel.
21 Miryam némbalan para lalaki nu ngawih. Manéhna ngawih kieu,
”Hayu ngawih kanggo Yéhuwa lantaran Anjeunna tos unggul.
Kuda jeung nu tumpakna ku Anjeunna digebruskeun ka laut.”
22 Tuluy Musa mingpin urang Israél ti Laut Beureum ka Tanah Gurun Syur. Maranéhna leumpang di tanah gurun salila tilu poé, tapi teu manggih cai.
23 Tuluy maranéhna nepi di Marah,* tapi cai di dinya teu bisa diinum lantaran pait. Éta sababna tempat éta dingaranan Marah.
24 Jadi maranéhna kukulutus ka Musa, ”Urang rék nginum naon?”
25 Seug Musa ménta tulung ka Yéhuwa, tuluy Yéhuwa nuduhkeun hiji tangkal leutik. Barang tangkalna dialungkeun kana cai, seug caina jadi amis.
Di dinya, Allah méré paréntah pikeun dituturkeun ku maranéhna. Allah hayang ningali maranéhna téh bakal taat atawa henteu.
26 Ceuk Anjeunna, ”Kuring téh Yéhuwa Allah maranéh. Jadi maranéh kudu bener-bener nurut kana ucapan Kuring sarta ngajalankeun naon nu bener dina pandangan Kuring. Maranéh gé kudu ngajalankeun paréntah jeung sakabéh aturan Kuring. Lamun éta kabéh dijalankeun, maranéh moal bakal katerap ku panyakit nu ku Kuring dikeunakeun ka urang Mesir. Kuring, Yéhuwa, nu ngajaga maranéh tetep séhat.”
27 Geus kitu, maranéhna nepi di Élim. Di dinya aya 12 sumber cai jeung 70 tangkal palem. Jadi maranéhna marasang kémah di deukeut sumber cai éta.
