Ibrani 3:1-19
3 Ku kituna, dulur-dulur nu suci, nu dipilih* pikeun indit ka sorga, perhatikeun Isa, nu diaku rasul jeung imam agung ku urang.
2 Manéhna satia ka Allah nu ngalantik manéhna, siga Musa nu satia waktu ngalalayanan di sakuliah imah Allah.*
3 Isa dianggap layak narima leuwih loba kamulyaan tibatan Musa, lantaran nu ngabangun imah leuwih dihormat tibatan imahna.
4 Unggal imah tangtu aya anu ngabangunna, ari sagala hal mah dibangunna ku Allah.
5 Musa téh palayan nu satia di sakuliah imah Allah. Éta ngagambarkeun* hal-hal nu engké bakal disingkabkeun.
6 Ari Al-Masih mah putra nu satia nu jadi kapalana imah Allah. Nu disebut imah Allah téh urang, asal urang tetep wani* nyarita jeung nyekel pageuh harepan nu diagulkeun ku urang nepi ka ahir.
7 Jadi, sakumaha nu ditepikeun liwat kawasa suci, ”Poé ieu, lamun maranéh ngadéngé sora Kuring,
8 ulah neuaskeun haté siga karuhun maranéh nu ngalantarankeun Kuring ambek pisan, kawas waktu maranéhna nguji Kuring di gurun keusik.
9 Di dinya, karuhun maranéh nguji jeung ngadoja Kuring, padahal maranéhna geus nyaksian sakabéh tindakan Kuring salila 40 taun.
10 Éta sababna Kuring jadi geuleuh ka génerasi éta jeung ngomong, ’Haté maranéhna téh sok nyimpang waé, maranéhna gé teu ngarti-ngarti kana jalan-jalan Kuring.’
11 Bakating ku ambek, Kuring sumpah, ’Maranéhna moal asup ka poé reureuhna Kuring.’”
12 Dulur-dulur, sing ati-ati. Di antara aranjeun ulah aya nu boga haté jahat jeung teu boga iman lantaran ngajauh ti Allah nu hirup.
13 Sabalikna, terus silih kuatkeun unggal poé meungpeung bisa kénéh disebut ”Poé ieu”, supaya di antara aranjeun euweuh nu teuas haté ku lantaran dosa nu bisa nipu.
14 Urang bisa narima naon nu ditarima ku Al-Masih, asal urang nyekel pageuh nepi ka ahir kayakinan nu dipiboga ku urang ti mimiti.
15 Sakumaha nu disebutkeun, ”Poé ieu, lamun maranéh ngadéngé sora Kuring, ulah neuaskeun haté siga karuhun maranéh nu ngalantarankeun Kuring ambek pisan.”
16 Saha nu ngadéngé sora Allah tapi ogé ngalantarankeun Anjeunna ambek pisan? Lainna kabéh jalma nu dipingpin ku Musa kaluar ti Mesir?
17 Salian ti éta, saha nu dipikageuleuh ku Allah salila 40 taun? Lainna jalma-jalma nu nyieun dosa, nu mayitna tinggolépak di gurun keusik?
18 Jeung, ka saha Anjeunna sumpah yén maranéhna moal asup ka poé reureuh-Na? Lainna ka jalma-jalma nu teu taat téa?
19 Jadi jelas, maranéhna teu bisa asup téh lantaran teu boga iman.
Catetan Tambihan
^ Atawa ”diondang”.
^ Maksudna, di antara bangsa Israél.
^ Atawa ”méré kasaksian ngeunaan”.
^ Atawa ”teu asa-asa”.
