Jabur 104:1-35
104 Abdi badé muji Yéhuwa.
Nun Yéhuwa Allah abdi, Gusti sakitu agungna.
Kahormatan jeung kamulyaan téh jadi anggoan Gusti.
2 Gusti dibulen ku cahaya kawas ku anggoan.
Gusti ngabéngbréngkeun langit kawas ngabéngbréngkeun kaén kémah.
3 Anjeunna masang tihang-tihang panglinggihana-Na di luhureun cai di langit,Awan dijadikeun karéta-Na,Jangjang angin ditumpakan ku Anjeunna.
4 Para malaikat-Na dijadikeun mahluk roh nu perkasa,Hamba-hamba-Na dijadikeun kawas seuneu nu ngamusnakeun.
5 Anjeunna ngadegkeun bumi dina pondasina,Bumi kukuh, moal bakal oyag keur salalanggengna.
6 Gusti nutupan bumi ku cai nu jero kawas ku jubah.
Caina ngaluhuran gunung-gunung.
7 Barang disentak ku Gusti, caina kalabur.
Barang ngadéngé sora guludug ti Gusti, caina paburisat.
8 Gunung-gunung naraék, lebak-lebak tarurun,Ka tempat nu ditangtukeun ku Gusti.
9 Gusti netepkeun wawatesan nu teu meunang diliwatan ku cai,Supaya bumi teu katutup deui ku cai.
10 Gusti ngadamel cinyusu di lebak-lebak,Nu caina ngalir di antara gunung-gunung.
11 Caina diinum ku sato-sato liar di tegalan,Nyirnakeun hausna kaldé-kaldé liar.
12 Di deukeut cinyusu, manuk-manuk areunteup,Kabéhanana nyaranyi di antara dangdaunan nu leubeut.
13 Ti panglinggihan Gusti, Gusti ngahujanan gunung-gunung.
Bumi pinuh ku hasil padamelan Gusti.
14 Anjeunna numuwuhkeun jujukutan jang ingon-ingonSarta pepelakan jang kaperluan manusa,Supaya tanah ngahasilkeun dahareun,
15 Ngahasilkeun cianggur nu nyukakeun haté manusa,Minyak nu ngalantarankeun raray jadi marahmay,Sarta roti nu jadi tanaga keur* manusa.
16 Tatangkalan Yéhuwa meunang loba cai,Tangkal aras Lébanon nu dipelak ku Anjeunna,
17 Tempat manuk-manuk nyarayang.
Sayangna manuk bango aya dina tangkal juniper.
18 Gunung-gunung nu luhur jadi panyicingan embé-embé gunung,Gawir-gawir cadas jadi panyumputan hiraks.*
19 Anjeunna nyiptakeun bulan keur nangtukeun waktu,Panonpoé ngartieun iraha waktuna surup.
20 Gusti ngadatangkeun poék, reup peuting.
Di leuweung, sasatoan pada laliar.
21 Singa-singa ngora guar-gaur néangan mangsa,Néangan hakaneun nu disadiakeun ku Allah.
22 Waktu panonpoé medal,Singa-singa éta ngarampih tuluy darepa di sayangna.
23 Manusa kaluar pikeun digawé,Manéhna digawé nepi ka peuting.
24 Sakitu seueurna padamelan Gusti, nun Yéhuwa!
Ku kabijaksanaan Gusti, éta sadaya diciptakeun.
Bumi pinuh ku karya ciptaan Gusti.
25 Laut nu sakitu gedé jeung legaPinuh ku mahluk hirup nu teu kaitung lobana, boh nu leutik boh nu gedé.
26 Di dinya kapal-kapal balayar.
Léwiatan* nu diciptakeun ku Gusti gé arulin di dinya.
27 Sadaya ciptaan ngantosan GustiPikeun dibéré dahareun dina waktuna.
28 Dahareun ti Gusti téh dikumpulkeun ku maranéhna.
Waktu Gusti muka panangan, sadayana wareg ku nu haradé.
29 Waktu Gusti miceun beungeut, maranéhna guligah.
Lamun napas* maranéhna dicabut ku Gusti, maranéhna maot, marulang jadi kekebul.
30 Tapi lamun Gusti ngirim kawasa suci, maranéhna jadi araya,Sarta aya kahirupan nu anyar di bumi.
31 Kamulyaan Yéhuwa bakal langgeng.
Yéhuwa bakal gumbira ku dadamelana-Na.
32 Anjeunna ningali bumi, bumi ngadégdég.
Anjeunna nyabak gunung-gunung, peledug bijil haseup.
33 Abdi bakal ngawih kanggo Yéhuwa saumur hirup,Abdi bakal ngawihkeun pupujian* kanggo Allah abdi sapanjang hirup.
34 Mugia pipikiran abdi nyukakeun Anjeunna.*
Abdi bakal gumbira ku karana Yéhuwa.
35 Nu baroga dosa bakal musna ti bumi,Nu jarahat gé moal aya deui.
Abdi badé muji Yéhuwa. Puji Yah!*
Catetan Tambihan
^ As. ”nu nguatkeun haté”.
^ Sato nu siga marmot gedé, euweuh buntutan, jeung cicingna di daérah nu loba batuna.
^ Tingali Daptar Istilah.
^ Atawa ”roh”. Tingali Daptar Istilah.
^ Atawa ”maén musik”.
^ Atawa bisa jadi ”Mugia naon nu dilenyepan ku abdi ngeunaan Anjeunna téh matak nyenangkeun”.
^ Atawa ”Haléluyah!” ”Yah” téh ngaran pondokna Yéhuwa.
