Pamindo 6:1-25
6 ”Ieu paréntah, aturan, jeung putusan hukum nu dibikeun ku Yéhuwa Allah maranéh pikeun diajarkeun ka maranéh. Ieu kudu dijalankeun di tanah nu bakal direbut ku maranéh sanggeus meuntasan Walungan Yordan.
2 Saumur hirup, maranéh kudu hormat* ka Yéhuwa Allah maranéh sarta ngajalankeun aturan jeung paréntah nu ditepikeun ku kuring ka maranéh jeung anak incu, supaya maranéh panjang umur.
3 Hé Israél, déngékeun, jalankeun sing bener-bener, supaya maranéh makmur jeung beuki ngalobaan di tanah nu loba susu jeung maduna, sakumaha jangji Yéhuwa Allah karuhun maranéh ka maranéh.
4 ”Hé Israél, déngékeun. Yéhuwa téh Allah urang sadaya, Yéhuwa téh ésa.
5 Maranéh kudu nyaah ka Yéhuwa Allah maranéh ku sapinuhna haté, sagemblengna nyawa,* jeung sakuat tanaga.
6 Kekecapan nu ditepikeun ku kuring poé ieu téh kudu terus disimpen dina haté.
7 Ulah bosen-bosen ngajarkeun éta ka barudak maranéh. Caritakeun ka barudak waktu keur diuk di imah, waktu keur leumpang di jalan, waktu rék saré, jeung waktu hudang.
8 Talikeun dina leungeun maranéh pikeun jadi pépéling sarta pasangkeun dina tarang maranéh.
9 Tuliskeun dina kusén panto imah maranéh jeung di gerbang kota.
10 ”Yéhuwa Allah maranéh geus jangji ka karuhun maranéh, nyaéta ka Ibrahim, Ishak, jeung Yakub, pikeun méré éta nagri sarta mawa maranéh asup ka dinya, ka nagri nu kota-kotana galedé jeung nu aréndah lain beunang ngadegkeun maranéh.
11 Imah-imah di ditu pinuh ku barang-barang nu aralus lain hasil gawé maranéh. Di ditu gé aya sumur-sumur nu lain digali ku maranéh sarta kebon-kebon anggur jeung tangkal-tangkal zaitun nu lain beunang melak maranéh. Maranéh bakal dahar nepi ka seubeuh.
12 Engké, ulah paroho ka Yéhuwa, nu ngabudalkeun maranéh ti Mesir, tempat maranéh diperbudak.
13 Sing hormat* ka Yéhuwa Allah maranéh. Ngan ka Anjeunna maranéh kudu ngabdi. Lamun sumpah, maranéh kudu sumpah demi nami-Na.
14 Ulah nyembah ka allah-allah séjén, nyaéta allah nu disembah ku bangsa-bangsa sakurilingeun maranéh.
15 Sabab Yéhuwa Allah maranéh nu aya di tengah-tengah maranéh téh ménta supaya maranéh ngabdi ngan ka Anjeunna hungkul. Lamun henteu, Yéhuwa Allah maranéh bakal ambek pisan sarta bakal ngabasmi maranéh ti bumi.
16 ”Ulah nguji Yéhuwa Allah maranéh kawas baréto di Masah.
17 Sing enya-enya ngajalankeun paréntah Yéhuwa Allah maranéh, kitu deui pépéling jeung aturan nu geus diparéntahkeun ku Anjeunna pikeun dijalankeun.
18 Lampahkeun naon anu bener jeung hadé dina pandangan Yéhuwa. Ku kituna, maranéh bakal makmur sarta asup jeung ngarebut tanah nu alus, nu dijangjikeun ku Yéhuwa ka karuhun maranéh.
19 Maranéh bakal ngusir sakabéh musuh ti hareupeun maranéh, sakumaha jangji Yéhuwa.
20 ”Engké lamun anak-anak maranéh nanya, ’Ku naon Yéhuwa Allah urang méré pépéling, aturan, jeung putusan hukum ieu?’
21 Jawab kieu, ’Baheula urang diperbudak ku Firaun di Mesir, tapi ku kawasa Yéhuwa nu gedé urang dibudalkeun ti Mesir.
22 Di hareupeun panon urang pisan, Yéhuwa terus némbongkeun tanda-tanda sarta mujijat nu hébat jaba pikasieuneun ka Mesir, Firaun, jeung rumah tanggana.
23 Geus kitu, urang dibudalkeun ku Anjeunna ti dinya, tuluy dibawa ka dieu, sarta dibéré tanah nu dijangjikeun ku Anjeunna ka karuhun urang.
24 Tuluy, Yéhuwa maréntahkeun urang pikeun ngajalankeun sakabéh aturan ieu sarta hormat* ka Yéhuwa Allah urang. Éta téh keur kahadéan urang sapapanjangna, supaya urang bisa tetep hirup sakumaha ayeuna.
25 Lamun enya-enya ngajalankeun sakabéh paréntah ieu sarta taat ka Yéhuwa Allah urang sakumaha paréntah Anjeunna, urang bakal dianggap jalma bener.’
Catetan Tambihan
^ As. ”sieun”.
^ Atawa ”jiwa”. Tingali Daptar Istilah.
^ As. ”sieun”.
^ As. ”sieun”.
