Titus 1:1-16
1 Ti kuring, Paulus, nyaéta palayanna Allah jeung rasulna Isa Al-Masih. Iman sarta tugas kuring salaku rasul téh sajalan jeung iman jalma-jalma pilihan Allah sarta sajalan jeung pangaweruh nu bener ngeunaan bebeneran nu méré nyaho carana ngabdi ka Allah.
2 Dasarna hal-hal ieu téh harepan hirup langgeng, nu ti baheula kénéh geus dijangjikeun ku Allah nu teu bisa bohong.
3 Dina waktu nu geus ditangtukeun, Anjeunna méré nyaho firman-Na liwat pangwawaran nu dipercayakeun ka kuring. Éta téh sajalan jeung paréntah Allah, Jurusalamet urang.
4 Surat ieu keur Titus, dulur saiman nu kawas anak sorangan.
Mugia manéh narima welas asih nu taya bandingna* jeung katengtreman ti Allah, Bapa urang, jeung ti Isa Al-Masih,* Jurusalamet urang.
5 Kuring ninggalkeun manéh di Pulo Kréta téh supaya manéh ngurus hal-hal nu kudu dilempengkeun* jeung ngalantik kokolot-kokolot di unggal kota, sakumaha pituduh kuring ieu:
6 Kokolot téh kudu* bébas tina tuduhan, ngan boga hiji pamajikan, sarta barudakna saiman jeung teu dikenal baragajul* atawa sok ngalawan.
7 Salaku pangurus nu dilantik ku Allah, saurang pangawas kudu bébas tina tuduhan, teu mawa karep sorangan, teu gancang ambek, lain tukang mabok, teu kasar, teu néang kauntungan maké cara nu teu jujur,
8 sabalikna kudu béréhan,* resep kana kahadéan, boga pikiran nu séhat,* lampahna bener, satia, bisa nahan diri,
9 nyekel pageuh firman nu bisa dipercaya waktu keur ngajar,* supaya manéhna bisa nguatkeun* batur ku pangajaran nu bener* jeung negor jalma-jalma nu nentang pangajaran éta.
10 Aya loba jalma nu sok ngalawan, nu omonganana euweuh gunana, jeung nu sok nipu. Kalolobaan ti maranéhna téh keukeuh ngajalankeun sunat.
11 Nu kararitu téh kudu dibekem sungutna, sabab maranéhna ngaruksak iman kulawarga-kulawarga ku pangajaran nu salah, demi néang kauntungan maké cara nu teu jujur.
12 Salah saurang ti maranéhna, nabina sorangan, ngomong kieu, ”Urang Kréta mah tukang bohong, siga sato galak nu bahaya. Keur mah gembul, kedul deuih.”
13 Omongan éta téh bener. Éta sababna, sing tegas negor maranéhna ngarah iman maranéhna kuat,
14 jeung béré nyaho maranéhna supaya ulah ngadéngékeun dongéng-dongéng Yahudi atawa paréntah ti jalma-jalma nu nyimpang tina bebeneran.
15 Keur jalma nu bersih mah sagala hal téh bersih, tapi ari keur jalma nu kotor jeung nu teu boga iman mah euweuh nu bersih, da pikiran jeung haté sanubarina kotor.
16 Ari di hareupeun umum, maranéhna ngaku kenal ka Allah, tapi kalakuanana nunjukkeun maranéhna téh nolak Allah, lantaran maranéhna pikageuleuheun, teu taat, jeung teu layak ngalakukeun naon waé nu hadé.
Catetan Tambihan
^ Tingali Daptar Istilah.
^ As. ”Al-Masih Isa”.
^ Atawa ”hal-hal nu kurang”.
^ As. ”Lamun aya priya nu”.
^ Atawa ”hésé diatur”.
^ Atawa ”akuan ka batur”.
^ Atawa ”bisa nimbang-nimbang”.
^ Atawa ”maké seni ngajar”.
^ Atawa ”méré naséhat ka”.
^ Atawa ”nu nguatkeun; nu mawa mangpaat”.
