PASAL 35

Kumaha carana jadi sobat Gusti?

Sanggeus ngalaman hiji tragédi, Jeremy jadi ngahargaan pentingna nyobat jeung Gusti. Ceuk manéhna, ”Basa abdi umur 12, bapa abdi indit ninggalkeun kulawarga. Hiji peuting abdi ngadoa, ménta ka Yéhuwa supaya si bapa balik deui ka imah.”

Sanajan keur sedih pisan, Jeremy tetep maca Alkitab. Basa manggihan Jabur 10:14, haténa kageuing pisan. Ayat éta nyebutkeun kieu ngeunaan Yéhuwa, ”Nya ka Gusti sumerahna nu keur susah jeung nalangsa téh. Gusti salamina nulungan ka budak yatim.” Ceuk Jeremy, ”Abdi ngarasa, Yéhuwa téh siga keur ngomong jeung ngayakinkeun abdi mun Mantenna nulungan abdi, Yéhuwa téh Bapa abdi. Na aya bapa nu leuwih nyaahan tibatan Yéhuwa?”

TEU SUAL anjeun nyanghareupan kaayaan siga Jeremy atawa henteu, Alkitab méré nyaho yén Yéhuwa hayang nyobat jeung anjeun. Malah Alkitab nyebutkeun, ”Allah raketan, Mantenna ge tangtu ngaraketan deui.” (Yakobus 4:8) Pék pikirkeun harti ayat éta. Sanajan anjeun teu bisa ningali Gusti, jeung Gusti téh lain babaturan sapantaran anjeun, Gusti Yéhuwa hayang anjeun jadi sobat-Na!

Sosobatan jeung Yéhuwa téh kudu diupayakeun ku urang. Ibaratna anjeun boga pepelakan di imah. Tangtu éta moal tumuwuh sorangan. Ambéh subur, éta pepelakan kudu disébor unggal poé jeung diteundeun di tempat nu cocog. Sosobatan urang jeung Yéhuwa ogé kudu diupayakeun siga kitu. Kumaha supaya sosobatan urang jeung Yéhuwa beuki raket?

Pentingna Diajar Alkitab

Mun hayang ngajalin sosobatan jeung Gusti, aya dua hal nu kudu diupayakeun, nyaéta silih ngadéngékeun jeung silih nyarita. Urang bisa ngadéngékeun Gusti ku cara maca jeung diajar Alkitab.​—Jabur 1:​2, 3.

Bisa jadi anjeun teu resep diajar. Loba budak ngora leuwih resep lalajo TV, maén game, atawa ulin jeung babaturan. Lamun hayang nyobat jeung Gusti, anjeun kudu ngadéngékeun Mantenna. Carana téh anjeun kudu diajar Alkitab.

Anjeun ulah hariwang. Diajar Alkitab téh lain hal nu ngabeungbeurat. Lalaunan, anjeun bisa resep diajar Alkitab. Mimitina, anjeun kudu nyadiakeun waktu jang diajar Alkitab. Lais nyarita, ”Abdi boga jadwal maca Alkitab. Isuk-isuk unggal hudang saré, abdi langsung maca sapasal tina Alkitab.” Maria nu umurna 15 taun, boga kabiasaan séjén, ”Peuting-peuting saacan saré, abdi biasana sok maca Alkitab.”

Pikeun ngamimitian diajar Alkitab, mangga tingali  kotak dina kaca 292. Tuluy tuliskeun di handap, iraha anjeun bisa nyadiakeun waktu keur diajar Alkitab salila kira-kira 30 menit.

․․․․․

Anjeun bisa nyieun jadwal heula. Waktu mimiti diajar, bisa waé anjeun ngarasa hésé paham kana eusi Alkitab. Bisa jadi, anjeun satuju jeung Jezreel nu umurna 11 taun. Ceuk manéhna, ”Dina Alkitab téh aya sababaraha bagian nu hésé dipikaharti jeung teu pati seru.” Mun anjeun ngarasa siga kitu, tong nyerah. Anggap anjeun téh keur nyadiakeun waktu pikeun ngadéngékeun Gusti Yéhuwa, sobat anjeun. Ku kituna, anjeun bakal resep diajar Alkitab jeung ngarasakeun mangpaatna!

Pentingna Ngadoa

Hiji cara urang bisa nyarita ka Gusti téh ku ngadoa. Pikirkeun, sakumaha istiméwana kurnia ngadoa téh! Gusti Yéhuwa siap ngadéngékeun doa anjeun. Jadi, anjeun bisa ngadoa iraha waé. Malah, Gusti hayang ngadéngékeun anjeun. Éta sababna Alkitab ngajurung anjeun, ”Tong salempang naon-naon. Naon bae pangabutuh, unjukkeun ka Allah saban neneda, suhunkeun bari hate tumarima.”​—Pilipi 4:6.

Sakumaha disebutkeun di ayat éta, anjeun bisa nyaritakeun naon waé ka Yéhuwa. Éta kaasup masalah, kahariwangan, ogé sagala hal nu bisa disukurkeun ku anjeun. Mun aya babaturan nu bageur ka anjeun, na anjeun moal nganuhunkeun ka manéhna? Tangtu urang ogé bakal nganuhunkeun ka Yéhuwa nu geus méré leuwih loba ti batan sobat mana waé.​—Jabur 106:1.

Tulis sababaraha hal nu rék disukurkeun ku anjeun ka Yéhuwa.

․․․․․

Sakapeung bisa waé anjeun ngarasa sieun jeung hariwang. Tapi, Jabur 55:23 nyebutkeun, ”Pasrahkeun kasusah maneh ka Allah, Mantenna tangtu ngaraksa; Mantenna moal ngantep jelema bener eleh.”

Di handap ieu, tuliskeun sababaraha kahariwangan nu rék anjeun caritakeun dina doa.

․․․․․

Pangalaman Pribadi

Aya hiji hal deui nu kudu diperhatikeun dina ngawangun sosobatan jeung Gusti. Nabi Daud nulis, ”Pek rarasakeun, kumaha saena PANGERAN. Bagja jalma nu nyalindung ka Mantenna.” (Jabur 34:9) Basa nulis Jabur 34, Daud téh kakara kabur ti Raja Saul nu ngudag-ngudag jeung rék maéhan manéhna. Kajadian éta tangtu nyieun Daud ngarasa sieun pisan. Manéhna kudu ngalindungan diri ku cara kabur ka musuh-musuhna, urang Pélisti. Tungtungna Daud ampir dipaéhan ogé ku maranéhna. Jadi, ahirna Daud api-api gélo supaya bisa kabur.​—1 Samuel 21:10-​15.

Sanajan kitu, Daud teu nganggap yén manéhna bisa salamet téh ku lantaran kapinteranana sorangan. Sabalikna, Daud ngamulyakeun Yéhuwa. Di jabur saacanna ogé Daud nulis, ”Kaula sasambat ka PANGERAN, ku Mantenna diwaler, dibebaskeun tina sagala kasieun.” (Jabur 34:5) Lantaran geus ngalaman sorangan, Daud bisa ngajurung batur pikeun ’ngarasakeun, kumaha saena PANGERAN’. *

Na anjeun pernah ngalaman kajadian nu ngabuktikeun yén Yéhuwa téh nyaah ka anjeun? Lamun aya, pék tuliskeun. Saran: Pangalamanana teu kudu nu luar biasa. Pikirkeun berkah-berkah leutik nu ditarima unggal poé, nu bisa jadi geus dianggap biasa ku anjeun.

․․․․․

Meureun, kolot geus pernah ngajarkeun anjeun ngeunaan Alkitab. Tah, éta téh berkah. Tapi, anjeun sorangan gé kudu mekarkeun sosobatan jeung Gusti. Mun acan, anjeun bisa ngagunakeun bahan dina artikel ieu supaya bisa nyobat jeung Gusti. Yéhuwa pasti ngaberkahan upaya anjeun. Kitab Suci nyebutkeun, ”Kudu menta, tangtu bakal nampa, kudu neangan, tangtu bakal manggih.”​—Mateus 7:7.

TINGALI LEUWIH LOBA DINA JILID 1, PASAL 38 JEUNG 39

DI PASAL SATERUSNA

Na nyaritakeun ngeunaan Gusti ka batur téh hésé? Pék diajar carana nyaritakeun kapercayaan anjeun.

[Catetan Handap]

AYAT KONCI

”Bagja jelema-jelema anu salawasna ngaharep kana pitulung sarta pituduh Allah.”​—Mateus 5:3, Sunda Formal.

SARAN

Mun maca opat kaca unggal poé, anjeun bakal bérés maca Alkitab ngan dina sataun.

ANJEUN APAL TEU . . . ?

Waktu anjeun maca buku ieu jeung ngajalankeun naséhatna nu dumasar kana Alkitab, éta bukti yén Yéhuwa bener-bener merhatikeun anjeun.​—Yohanes 6:​44.

RENCANA ABDI!

Supaya meunang leuwih loba mangpaat tina palajaran pribadi, abdi rék ․․․․․

Supaya leuwih rutin ngadoa, abdi rék ․․․․․

Abdi rék nanya ka kolot ngeunaan topik ․․․․․

CEUK ANJEUN KUMAHA?

● Kumaha supaya anjeun bisa leuwih resep kana palajaran pribadi?

● Ku naon Yéhuwa hayang ngadéngékeun doa jalma-jalma nu teu sampurna?

● Kumaha supaya doa anjeun jadi leuwih hadé?

[Cutatan]

“Basa keur ngora mah, omongan abdi waktu ngadoa téh asana éta-éta waé. Tapi ayeuna mah, abdi ngadoakeun hal-hal alus jeung goréng nu kaalaaman unggal poéna. Ku kituna, abdi teu ngucapkeun hal nu sarua unggal ngadoa, lantaran nu kaalaman unggal poé téh béda-béda.’’—Eve

[Kotak/​Gambar]

 Ngulik Alkitab

1. Pilih hiji carita dina Alkitab nu rék di baca. Pék ngadoa ménta hikmat, supaya ngarti kana caritana.

2. Baca caritana sing taliti. Ulah gurunggusuh. Bayangkeun caritana waktu maca. Gunakeun pancaindra anjeun, misalna: Bayangkeun lalampahan tokohna, déngékeun sorana, ambeuan bauna, rasakeun kadaharanana, jeung nu séjénna. Mun éta dilakukeun, caritana bakal nyata dina pikiran anjeun!

3. Pék lenyepan nu karék anjeun baca. Tanyakeun ka diri sorangan:

● Ku naon Yéhuwa nyaritakeun kisah ieu dina Firman-Na?

● Tokoh mana nu jadi conto alus, jeung tokoh mana nu jadi conto goréng?

● Urang meunang palajaran naon tina carita ieu?

● Tina carita ieu, urang diajar naon ngeunaan Yéhuwa jeung tindakanana?

4. Ngadoa ka Yéhuwa. Dina doa, caritakeun anjeun geus diajar naon waé. Caritakeun ogé kumaha rencana anjeun ngalarapkeun palajaran tina éta carita dina kahirupan. Anjeun gé kudu nganuhunkeun ka Yéhuwa lantaran geus dibéré hadiah mangrupa Firman-Na, Alkitab.

[Gambar]

”Pangandika Gusti teh lampu pikeun abdi, sinar caang nu nyaangan jalan abdi.”​—Jabur 119:105.

[Kotak/​Gambar]

Nu Pangpentingna

Euweuh waktu keur ngadoa? Euweuh waktu keur diajar Alkitab? Biasana, éta gumantung kana naon nu diutamakeun ku anjeun.

Pék cobaan: Cokot wadah, terus asupkeun sababaraha batu nu galedé. Tuluy eusian wadahna ku keusik nepi ka pinuh. Ayeuna, wadahna pinuh ku keusik jeung batu.

Ayeuna kaluarkeun batu jeung keusikna. Tuluy asupkeun keusikna ti heula, kakara batuna. Teu mahi, pan? Ku naon? Sabab nu diasupkeun téh keusikna heula, lain batu.

Naon palajaranana? Ceuk Alkitab, urang kudu ”terang ka anu panghadena”. (Pilipi 1:​10) Lamun anjeun miheulakeun hal-hal nu leutik siga rékréasi, anjeun moal boga cukup waktu keur hal-hal nu leuwih hadé siga kagiatan rohani. Tapi lamun anjeun nuturkeun naséhat Alkitab, anjeun bakal boga waktu keur kagiatan rohani jeung cukup rékréasi. Éta gumantung kana naon nu diutamakeun ku anjeun!

[Gambar]

Pepelakan téh kudu terus disebor jeung dibéré pupuk supaya subur, kitu ogé sosobatan anjeun jeung Gusti