VIJANA HUULIZA
Uumbaji au Mageuzi?—Sehemu ya 2: Kwa Nini Uchunguze Nadharia ya Mageuzi?
Alex amechanganyikiwa. Sikuzote amekuwa akiamini kwamba kuna Mungu na pia anaamini katika uumbaji. Lakini leo mwalimu wake wa biolojia amesisitiza kwa uthabiti kwamba nadharia ya mageuzi ni jambo hakika linalotegemea utafiti unaoaminika wa kisayansi. Alex hataki aonekane mpumbavu. Anajiambia: ‘Kwa kweli, ikiwa wanasayansi wamethibitisha kwamba nadharia ya mageuzi ni ya kweli, mimi ni nani nipingane nao?’
Je, umewahi kujipata katika hali kama hiyo? Labda maishani mwako umekuwa ukiamini kile ambacho Biblia inasema kwamba: “Mungu aliumba mbingu na dunia.” (Mwanzo 1:1) Hata hivyo, hivi karibuni watu wamekuwa wakijaribu kukushawishi usadiki kwamba uumbaji ni hekaya au hadithi tu na kwamba mageuzi ni jambo la hakika. Je, unapaswa kuwaamini? Kwa nini uchunguze nadharia ya mageuzi?
Sababu mbili kwa nini uchunguze mageuzi
Wanasayansi hawakubaliani kuhusu nadharia ya mageuzi. Licha ya kufanya utafiti kwa miaka mingi, wanasayansi bado hawajapata ufafanuzi mwafaka kuhusu nadharia ya mageuzi ambao wanakubaliana nao.
Jambo la kufikiria: Ikiwa wanasayansi hawakubaliani kuhusu nadharia ya mageuzi, na wao ndio wanaopaswa kuwa wataalamu, je, itakuwa kosa kwako kutoamini nadharia hiyo?—Zaburi 10:4.
Ni jambo zito kuamini jambo fulani. Mvulana anayeitwa Zachary anasema hivi: “Ikiwa uhai wetu ulijitokeza wenyewe, basi maisha yetu na vitu vyote vilivyomo duniani havingekuwa na maana yoyote.” Na hilo ni kweli. Kwa kweli, ikiwa nadharia ya mageuzi ni ya kweli, hatungekuwa na kusudi lolote maishani. (1 Wakorintho 15:32) Kwa upande mwingine, ikiwa habari kuhusu uumbaji ni ya kweli, tunaweza kupata majibu yenye kuridhisha kuhusu kusudi la uhai na tumaini la wakati ujao.—Yeremia 29:11.
Jambo la kufikiria: Kujua ukweli kuhusu mageuzi na uumbaji kunaweza kuboreshaje maisha yako?—Waebrania 11:1.
Maswali ya kufikiria
DAI: ‘Kila kitu ulimwenguni kilitokea kwa sababu ya mlipuko mkubwa uliotokea ghafla bila kutarajia.’
Ni nani au ni nini kilichosababisha mlipuko huo?
Ni jambo gani linalopatana na akili zaidi, kwamba kila kitu kilijitokeza chenyewe au kwamba kila kitu kilitokana na kitu fulani au mtu fulani?
DAI: ‘Wanadamu walitokana na wanyama.’
Ikiwa wanadamu walitokana na wanyama au sokwe, kwa nini kuna tofauti kubwa sana kati ya uwezo wa kiakili wa wanadamu na ule wa wanyama? a
Kwa nini hata namna za “msingi” kabisa za uhai ni tata sana? b
DAI: ‘Nadharia ya mageuzi ni jambo lililothibitishwa.’
Je, yule anayedai hivyo, amechukua hatua ya kuchunguza uthibitisho huo yeye mwenyewe?
Ni watu wangapi wanaoamini mageuzi kwa sababu tu wameambiwa kwamba watu wote wenye akili wanaamini hivyo pia?
a Huenda watu wengine wakadai kwamba wanadamu wana uwezo mkubwa zaidi wa kiakili kwa sababu ubongo wao ni mkubwa kuliko wa sokwe. Hata hivyo, ili uone kwamba sababu hizo si sahihi, tazama broshua Maswali Matano Muhimu Kuhusu Chanzo cha Uhai, ukurasa wa 28.
b Tazama broshua Maswali Matano Muhimu Kuhusu Chanzo cha Uhai, ukurasa wa 8 hadi wa 12.
Huenda Ukapenda Pia
DAFTARI KWA AJILI YA MATINEJA
Kwa Nini Ninamwamini Mungu?
Uwe tayari sikuzote kufafanua kwa heshima na bila woga mambo unayoamini.
VIJANA HUULIZA
Uumbaji au Mageuzi?—Sehemu ya 1: Kwa Nini Nimwamini Mungu?
Je, ungependa kuwa na uhakika zaidi unapoeleza kwa nini unamwamini Mungu? Pata madokezo yanayoonyesha jinsi ya kumjibu mtu anayetilia shaka mambo unayoamini.
VIJANA HUULIZA
Uumbaji au Mageuzi?—Sehemu ya 3: Kwa Nini Uamini Uumbaji?
Je, ni lazima upinge sayansi ili uamini uumbaji?
VIJANA HUULIZA
Uumbaji au Mageuzi?—Sehemu ya 4: Ninawezaje Kueleza Imani Yangu Kuhusu Uumbaji?
Huhitaji kujua habari nyingi sana za sayansi ili ueleze kwa nini unaamini kwamba ulimwengu uliumbwa. Tumia ukweli rahisi ulio katika Biblia.
