Kutoka 15:1-27
15 Wakati huo Musa na Waisraeli wakamwimbia Yehova wimbo huu:+
“Acheni nimwimbie Yehova, kwa maana amekwezwa sana.+
Farasi na mpandaji wake amewavurumisha baharini.+
2 Nguvu zangu na uwezo wangu ni Yah,* kwa maana amekuwa wokovu wangu.+
Huyu ni Mungu wangu, nitamsifu;+ Mungu wa baba yangu,+ nitamkweza.+
3 Yehova ni shujaa mwenye nguvu.+ Yehova ndilo jina lake.+
4 Ametupa baharini magari ya vita ya Farao na jeshi lake,+Na mashujaa wake bora kabisa wamezama katika Bahari Nyekundu.+
5 Mawimbi makubwa yaliwafunika; wakazama vilindini kama jiwe.+
6 Mkono wako wa kuume, Ee Yehova, una nguvu nyingi;+Mkono wako wa kuume, Ee Yehova, unaweza kumvunjavunja adui.
7 Katika fahari yako kuu unaweza kuwaangusha chini wale wanaoinuka juu dhidi yako;+Unaituma hasira yako inayowaka, nayo inawala kama majani makavu.
8 Kwa pumzi moja kutoka katika mianzi ya pua yako maji yalikusanyika pamoja;Yalisimama tuli, yakazuia mafuriko;Mawimbi makubwa yaligandamana katikati ya bahari.
9 Adui alisema, ‘Nitawafuatia! Nitawafikia!
Nitagawanya nyara mpaka nitakapotosheka!
Nitauchomoa upanga wangu! Mkono wangu utawatiisha!’+
10 Ulipuliza bahari kwa pumzi yako, ikawafunika;+Walizama kama madini ya risasi katika maji makuu.
11 Ni nani kati ya miungu aliye kama wewe, Ee Yehova?+
Ni nani aliye kama wewe, unayejidhihirisha mwenyewe kuwa mkuu katika utakatifu?+
Wewe unayestahili kuogopwa kwa nyimbo za sifa, Wewe unayetenda mambo yanayostaajabisha.+
12 Uliunyoosha mkono wako wa kuume, dunia ikawameza kabisa.+
13 Kwa upendo wako mshikamanifu umewaongoza watu uliowakomboa;+Kwa nguvu zako utawaongoza kwenye makao yako matakatifu.
14 Ni lazima mataifa yasikie;+ yatatetemeka;Wakaaji wa Ufilisti watashikwa na maumivu makali.*
15 Wakati huo mashehe* wa Edomu wataogopa sana,Na watawala wenye nguvu* wa Moabu watatetemeka.+
Wakaaji wote wa Kanaani watavunjika moyo.+
16 Watashikwa na woga na hofu.+
Kwa sababu ya ukuu wa mkono wako watatulia kama jiweMpaka watu wako watakapopita, Ee Yehova,Mpaka watu uliowatokeza+ watakapopita.+
17 Utawaleta na kuwapanda kwenye mlima wa urithi wako,+Mahali pa kudumu ulipotayarisha pawe makao yako, Ee Yehova,Mahali patakatifu, Ee Yehova, ambapo umepajenga imara kwa mikono yako.
18 Yehova atatawala akiwa mfalme milele na milele.+
19 Farasi wa Farao na magari yake ya vita na askari wake wapanda farasi walipoingia baharini,+Ndipo Yehova alipoyarudisha maji ya bahari yakawafunika,+Lakini Waisraeli walitembea kwenye nchi kavu katikati ya bahari.”+
20 Kisha nabii Miriamu, dada ya Haruni, akachukua tari, na wanawake wote wakamfuata wakiwa na matari yao wakicheza dansi.
21 Miriamu akaimba hivi akiwaitikia wanaume:
“Mwimbieni Yehova, kwa maana amekwezwa sana.+
Farasi na mpandaji wake amewavurumisha baharini.”+
22 Baadaye Musa akawaongoza Waisraeli kutoka katika Bahari Nyekundu, wakaenda katika nyika ya Shuri na kusafiri kwa siku tatu nyikani, lakini hawakupata maji.
23 Wakafika Mara,*+ lakini hawakuweza kunywa maji ya Mara kwa sababu yalikuwa machungu. Ndiyo sababu alipaita mahali hapo Mara.
24 Basi watu wakaanza kumnung’unikia Musa,+ wakisema: “Tutakunywa nini?”
25 Musa akamlilia Yehova,+ naye Yehova akamwelekeza kwenye mti fulani. Alipoutupa ndani ya maji hayo, yakawa matamu.
Huko Mungu akawawekea sharti na msingi wa hukumu, na huko Mungu akawajaribu.+
26 Alisema: “Ikiwa mtaisikiliza kwa makini sauti yangu mimi, Yehova Mungu wenu na kufanya yaliyo sawa machoni pangu na kusikiliza kwa makini amri zangu na kushika masharti yangu yote,+ sitawaletea ugonjwa wowote ambao niliwaletea Wamisri,+ kwa sababu mimi, Yehova, ninawaponya.”+
27 Baada ya hapo wakafika Elimu, mahali palipokuwa na chemchemi 12 za maji na mitende 70. Kwa hiyo wakapiga kambi hapo kando ya maji.
Maelezo ya Chini
^ “Yah” ni ufupisho wa jina Yehova.
^ Tnn., “uchungu wa kuzaa.”
^ Shehe alikuwa mkuu wa kabila.
^ Au “watawala wa mabavu.”
^ Maana yake “Uchungu.”
