Kitabu Kinachotegemeka​—Sehemu ya 7

Serikali Kuu ya Saba ya Ulimwengu

Hii ni habari ya mwisho katika mfululizo wenye habari saba katika matoleo ya “Amkeni!” yenye kufuatana yanayozungumzia serikali saba kuu za ulimwengu zinazotajwa katika historia ya Biblia. Kusudi lake ni kuonyesha kwamba Biblia inategemeka na imeongozwa na roho ya Mungu na ujumbe wake unatoa tumaini kwamba mateso yanayosababishwa na utawala mkatili wa wanadamu yatakwisha.

TUNAISHI katika wakati wa pekee sana na wenye matukio muhimu—wakati wa kutokea kwa serikali kuu ya saba inayotajwa katika historia ya Biblia. Isitoshe, serikali hiyo peke yake ndiyo inayosalia ikiwa unabii katika Biblia, kwa kuwa serikali zile nyingine sita sasa ni sehemu ya historia ya Biblia. Kuhusu serikali hizo saba, au “wafalme,” Biblia ilitabiri hivi: “Kuna wafalme saba: watano wameanguka, mmoja yuko, yule mwingine bado hajafika, lakini atakapofika lazima adumu kwa muda mfupi.” *—Ufunuo 17:10.

Zaidi ya miaka 1,900 hivi iliyopita, wakati maneno hayo yalipoandikwa, watano kati ya “wafalme,” au milki saba za kisiasa, ‘zilikuwa zimeanguka.’ Zilikuwa Misri, Ashuru, Babiloni, Muungano wa Umedi na Uajemi, na Ugiriki. Maneno “mmoja yuko” yalirejelea Roma. Lakini Roma haingetawala milele. Kungekuwa na milki nyingine moja, lakini unabii huo ulisema: “Bado ha[i]jafika.” Kama Biblia ilivyotabiri, ‘mfalme’ wa saba aliibuka! Milki hiyo ilikuja kuwa gani? Je, itatawala mpaka wakati usiojulikana? Ikiwa sivyo, itafikia kikomo chake kwa njia gani? Biblia inatupa majibu.

Unabii Unaotegemeka

Serikali ya saba ilianza kujitokeza wakati ambapo Uingereza, ambayo ilikuwa sehemu ya kaskazini-magharibi ya Milki ya Roma, ilipoanza kupata nguvu. Kufikia miaka ya 1760, kisiwa hicho kilikuwa kimeibuka na kuwa Milki ya Uingereza yenye nguvu. Utajiri na nguvu za Uingereza ziliendelea kuongezeka, hivi kwamba katika karne ya 19, ikawa ndiyo nchi tajiri na yenye nguvu zaidi duniani. “Milki ya Uingereza,” kinasema kitabu kimoja, “ilikuwa ndiyo milki kubwa zaidi kuwahi kuonekana ulimwenguni. Ilikuwa na watu milioni 372 na ilienea katika eneo lenye ukubwa wa maili zaidi ya milioni 11 za mraba [kilomita milioni 28 za mraba].”

Hata hivyo, vita vya kwanza vya ulimwengu (1914-1918) vilifanya Uingereza iwe na uhusiano wa pekee na Marekani ambayo hapo awali ilikuwa koloni yake. Matokeo yakawa nini? Mahali pa Milki ya Uingereza pakachukuliwa na muungano wa Uingereza na Marekani, na muungano huo wa nchi mbili zinazotumia Kiingereza na zinazofanana katika njia nyingi ukawa serikali  kuu ya ulimwengu ambayo ipo hadi sasa.—Ona sanduku  “Muungano wa Pekee.”

Unabii wa Ufunuo 17:10 unafanana na unabii mwingine unaopatikana katika kitabu cha Danieli. Danieli aliandika kuhusu ‘sanamu kubwa’ ambayo Mfalme Nebukadneza wa Babiloni aliona katika maono aliyopewa na Mungu. (Danieli 2:28, 31-43) Danieli alimfunulia mtawala huyo kwamba sehemu za mwili za sanamu hiyo ziliwakilisha mfuatano wa milki za kisiasa zilizoanza na Babiloni ambayo ndiyo iliyokuwa serikali kuu ya ulimwengu wakati huo. (Misri na Ashuru tayari zilikuwa zimetawala na kutoweka.) Historia sasa inathibitisha mambo yafuatayo:

Kichwa cha dhahabu kiliwakilisha Milki ya Babiloni.

Kifua na mikono ya fedha ilifananisha Muungano wa Umedi na Uajemi.

Tumbo na mapaja ya shaba yaliwakilisha Ugiriki ya kale.

Miguu ya chuma ilifananisha Milki ya Roma.

Nyayo zenye mchanganyiko wa chuma na udongo zilifananisha hali ya kisiasa na kijamii isiyo na umoja ambayo ingekuwapo wakati wa utawala wa serikali ya ulimwengu ya Uingereza na Marekani.

Kulingana na Ufunuo 17:10, serikali kuu ya saba ya ulimwengu ‘lazima idumu kwa muda mfupi.’ Huo ni muda mfupi kadiri gani? Itatokomea namna gani kutoka kwenye tamasha ya ulimwengu? Na nini kitatokea baada yake? Danieli anatupa majibu ya maswali hayo.

Tumaini Linalotegemeka

Baada ya kufafanua sanamu ambayo imetajwa, Danieli aliandika hivi: “Jiwe likakatwa [kutoka kwenye mlima] bila kutumia mikono, nalo likaipiga sanamu hiyo juu ya nyayo zake za chuma na za udongo uliofinyangwa, likaziponda.” (Danieli 2:34) Tukio hilo lenye kustaajabisha lilimaanisha nini?

Danieli aliendelea kusema: “Katika siku za wafalme hao [wa mwisho], Mungu wa mbinguni atausimamisha ufalme ambao hautaharibiwa kamwe. Na ufalme huo hautapewa watu wengine wowote. Utazivunja na kuzikomesha falme hizi zote [za kidunia], nao utasimama mpaka wakati usio na kipimo.” * (Danieli 2:44, 45) Zingatia mambo haya muhimu:

1. Ufalme huo wenye ushindi, unaofananishwa na jiwe kubwa, ‘unasimamishwa’ na Mungu mwenyewe, si kwa “mikono” ya wanadamu. Kwa sababu hiyo, kwa kufaa unaitwa Ufalme wa Mungu.

2. Ufalme wa Mungu “utazivunja” falme zote za wanadamu, kutia ndani serikali kuu ya saba ya ulimwengu. Kwa sababu gani? Serikali hizo zote zitakataa kuachilia mamlaka na zitampinga Mungu wakati wa vile vita vikuu vya mwisho katika mahali pa mfano panapoitwa Har–Magedoni. Biblia inaeleza waziwazi kwamba vita hivyo  vitawahusisha “wafalme wa dunia nzima inayokaliwa.”—Ufunuo 16:13, 14, 16.

3. Tofauti na serikali za kibinadamu ambazo hazidumu, kutia ndani serikali saba kuu za ulimwengu, Ufalme wa Mungu “hautaharibiwa kamwe.” Pia utaitawala dunia nzima.—Danieli 2:35, 44.

Uharibifu wa mwisho wa wapinzani wa Mungu utatimiza kwa njia yenye kustaajabisha unabii ulio kwenye Mwanzo 3:15, ambao ulitajwa katika habari ya kwanza ya mfululizo huu. Uzao wa mwanamke, Yesu Kristo, ungemponda nyoka wa mfano, yaani, Shetani, na uzao wake. (Wagalatia 3:16) Uzao wa Shetani unatia ndani wanadamu wote ambao wanaiga njia zake mbovu na wanaounga mkono wazo la kwamba wanadamu wajitawale wenyewe badala ya kutawaliwa na Mungu na Kristo.—Zaburi 2:7-12.

Hilo linatufanya tuulize swali muhimu sana: Uharibifu huo wa mwisho utakuja wakati gani? Naam, “jiwe” hilo, yaani, Ufalme wa Mungu, utaondoa kabisa utawala wa wanadamu wakati gani? Biblia inajibu maswali hayo kupitia “ishara” ambayo ingetambulisha siku za mwisho.—Mathayo 24:3.

Tambua Ile “Ishara”!

Ishara ya ule mwisho inatia ndani vita ulimwenguni pote, “matetemeko makubwa ya nchi,” “tauni,” na ‘upungufu mkubwa wa chakula.’ (Luka 21:10, 11; Mathayo 24:7, 8; Marko 13:8) Pia katika “siku za mwisho,” kungekuwa na ukosefu mkubwa wa maadili na watu hawangemtii Mungu. (2 Timotheo 3:1-5) Je, “mambo yote hayo” yametukia? (Mathayo 24:8) Ndiyo—hivi kwamba watu wengi wanaogopa wakati ujao. Gazeti The Globe and Mail lilisema hivi: “Baadhi ya watu wenye elimu wanaoheshimika zaidi katika uwanja wa sayansi na katika jamii wanatoa matabiri yenye kuogopesha kuhusu kuangamizwa kwa jamii ya wanadamu.”

Lakini watu hao wamekosea kuhusu jambo moja muhimu—jamii ya wanadamu haitafutiliwa mbali. Kwa kweli, Ufalme wa Mungu utaingilia kati na kuhakikisha kwamba hilo halitatendeka! Alipokuwa akitoa ishara ya ule mwisho, Yesu Kristo alisema hivi: “Hii habari njema ya ufalme itahubiriwa katika dunia yote inayokaliwa ili kuwa ushahidi kwa mataifa yote; na ndipo ule mwisho utakapokuja.” (Mathayo 24:14) Unabii huo umetimizwa kwa njia gani?

Katika nchi zaidi ya 230, Mashahidi wa Yehova wanatangaza Ufalme wa Mungu. Kwa kweli, kichwa cha jarida lao kuu ni Mnara wa Mlinzi Unaotangaza Ufalme wa Yehova—Yehova ndilo jina la kibinafsi la Mungu. (Zaburi 83:18) Programu ya Mashahidi ya kuwafundisha watu Biblia inawasaidia watu mmoja-mmoja na familia nyingi kuacha mazoea yao mabaya na kuwa watu wenye maadili mazuri na mwenendo wenye amani ambao unapatana na viwango vya Mungu. (1 Wakorintho 6:9-11) Kwa sababu hiyo, mamilioni ya watu ulimwenguni pote wana uhakika kwamba watalindwa na Mungu Ufalme wake utakapoingilia shughuli za wanadamu.

Naam, watajionea wenyewe utimizo wa ile sala ya kielelezo ya Kristo ambayo nyakati nyingine inaitwa Sala ya Bwana, ambayo kwa  sehemu inasema hivi: “Ufalme wako uje, mapenzi yako yatimizwe, hapa duniani kama huko mbinguni.” (Mathayo 6:9, 10, Union Version) Je, umewahi kuwazia jinsi ambavyo maisha yatakuwa duniani wakati wanadamu wote watampenda na kumtii Mungu? Maandiko ya Biblia yafuatayo yatakusaidia uelewe kwa nini maneno “habari njema” yanafaa.

Mapenzi ya Mungu Yatakapotendeka Duniani . . .

● Kutakuwa na amani ya kweli, si ukosefu tu wa vita. “Yehova . . . anakomesha vita mpaka kwenye mwisho wa dunia. Upinde anauvunja na kuukata mkuki vipande-vipande; magari ya kukokotwa anayateketeza motoni.” (Zaburi 46:8, 9) “Wapole wataimiliki dunia, nao watapata furaha yao tele katika wingi wa amani.”—Zaburi 37:11.

● Watu wote watakuwa na chakula cha kutosha. “Kutakuwa na wingi wa nafaka duniani; juu ya milima kutakuwa na mafuriko.”—Zaburi 72:16.

● Kila mtu atakuwa na afya kamilifu. “Hakuna mkaaji atakayesema: ‘Mimi ni mgonjwa.’”—Isaya 33:24.

● Kila mtu atakuwa na nyumba nzuri. “Hakika wao watajenga nyumba na kukaa ndani yake; na hakika wao watapanda mashamba ya mizabibu na kula matunda yake. Hawatajenga na mtu mwingine akae ndani yake; hawatapanda na mtu mwingine ale.”—Isaya 65:21, 22.

● Kuteseka kote kutakwisha. “Hema la Mungu liko pamoja na wanadamu, . . . naye atafuta kila chozi kutoka katika macho yao, na kifo hakitakuwapo tena, wala maombolezo wala kilio wala maumivu hayatakuwapo tena. Mambo ya zamani yamepitilia mbali.”—Ufunuo 21:3, 4.

Je, unavutiwa na ahadi hizo? Ikiwa ndivyo, Mashahidi wa Yehova wanakutia moyo uichunguze Biblia zaidi. Kwa kweli, ukifanya hivyo, utaona uthibitisho zaidi kwamba utawala wa mwanadamu wenye ukatili juu ya mwanadamu mwenzake utakwisha. Pia utaona kwamba Biblia inategemeka kabisa, na kwa kweli iliandikwa kwa uongozi wa roho ya Mungu.—2 Timotheo 3:16. *

[Maelezo ya Chini]

[Sanduku/​Picha katika ukurasa wa 17]

 MUUNGANO WA PEKEE

Katika mkutano ambao Rais Barack Obama wa Marekani na Waziri Mkuu wa Uingereza David Cameron walifanya pamoja na waandishi wa habari mnamo Julai (Mwezi wa 7) 2010, rais huyo wa Marekani alitangaza hivi: “Lazima tukazie jambo hili. Marekani na Uingereza wana uhusiano wa pekee sana. Tunafurahia urithi uleule. Tuna viwango vilevile. . . . Zaidi ya yote, muungano wetu unafanikiwa kwa sababu tuna malengo yaleyale. . . . Marekani na Uingereza zinapoungana pamoja, watu wetu—na watu wote ulimwenguni—wanakuwa na usalama na ufanisi zaidi. Kwa ufupi, Marekani haina rafiki mwingine wa karibu na mwenye nguvu zaidi kuliko Uingereza.”

[Mchoro katika ukurasa wa 16]

(Ona mpangilio kamili katika nakala iliyochapishwa)

Babiloni

Muungano wa Umedi na Uajemi

Ugiriki

Roma

Uingereza na Marekani

[Picha katika ukurasa wa 18]

Biblia inaahidi kwamba kutakuwa na amani ya kweli Ufalme wa Mungu utakapotawala

[Hisani ya Picha katika ukurasa wa 15]

Time line: Egyptian wall relief and bust of Nero: Photograph taken by courtesy of the British Museum; Persian wall relief: Musée du Louvre, Paris