Ni nini kilichokufanya upendezwe na sayansi?

Nilipokuwa mtoto, nilivutiwa sana na vitu vya asili. Nililelewa huko Richterswil, kijiji maridadi kwenye ufuo wa Ziwa Zurich. Wazazi wangu pamoja na ndugu na dada yangu wenye umri mkubwa kuliko mimi, walinieleza kuhusu wanyama na mimea tuliyoona tulipokuwa tukitembea.

Kwa nini uliamua kusomea upasuaji wa magonjwa ya mifupa?

Kwa muda fulani, baba yangu alikuwa mhudumu katika chumba cha upasuaji katika hospitali ya eneo letu. Mambo aliyoona huko yalimfanya azungumze kwa msisimuko kuhusu upasuaji. Msisimuko wake ulinifanya nichague kufanya kazi ya upasuaji. Niliamua kusomea taaluma ya upasuaji wa magonjwa ya mifupa kwa sababu nilipendezwa na ufundi unaohusika. Wataalamu wa magonjwa ya mifupa wanalazimika kufikiri kama injinia ili warekebishe mifupa, misuli, na kano zinazotuwezesha kusonga.

Zaidi ya yote, mimi hufurahia kuwaona wagonjwa wangu wakipata nafuu. Mimi hufurahia sana kuwahudumia watu.

Kwa nini ulitilia shaka kuwapo kwa Mungu?

Shaka yangu ilianza nilipokuwa kijana, na mambo mawili hususa yaliniathiri. Kwanza, nilitambua kwamba viongozi fulani katika kanisa letu hawakuwa na maadili mazuri, na jambo hilo lilinisumbua sana. Pili, shuleni, walimu fulani wa biolojia waliamini mageuzi—fundisho ambalo nilikuja kukubali, hasa nilipoingia chuo kikuu.

Kwa nini uliamini nadharia ya mageuzi?

Niliwaamini maprofesa wangu. Zaidi ya hilo, nilifikiri kwamba ufanani uliopo kati ya maumbile ya wanyama wa aina tofauti ulionyesha kwamba wana ukoo  uleule na uliunga mkono wazo la kwamba mabadiliko ya chembe za urithi yalitokeza aina mpya za wanyama.

Hata hivyo, baada ya muda ulibadili maoni yako. Kwa nini?

Rafiki yangu alinikaribisha kwenye mkutano wa Mashahidi wa Yehova. Nilivutiwa na urafiki nilioonyeshwa na hotuba zenye kuelimisha. Baadaye, mwanamke fulani mchangamfu wa kutaniko hilo alinitembelea, nami nikamwuliza, “Ninawezaje kuwa na hakika kwamba mambo yanayosemwa katika Biblia ni ya kweli?”

Alinionyesha unabii wa Biblia kuhusu matukio mengi yanayoonekana katika siku zetu. Mfano mmoja ni unabii wa Yesu kwamba siku za mwisho za ulimwengu huu zingetambuliwa kwa vita vya kimataifa, “matetemeko makubwa ya nchi,” na kuenea kwa “tauni na upungufu wa chakula.” * Pia alinionyesha unabii uliotabiri kuhusu kuharibika kwa jamii na kuongezeka kwa pupa na ubaya mwingine ulioenea sana leo. * Punde si punde, nilianza kujifunza Biblia kwa bidii na nikatambua kwamba sikuzote matabiri yake hutimia. Pia nilianza kuchunguza upya maoni yangu kuhusu chanzo cha uhai.

Je, utafiti wako kuhusu mambo ya kitiba ulikusaidia ulipokuwa ukifanya uchunguzi kuhusu chanzo cha uhai?

Ndiyo. Nilipoanza kujifunza Biblia, nilikuwa nikifanya utafiti kuhusu upasuaji wa goti. Kuanzia miaka ya mwishomwisho ya 1960, wanasayansi walianza kuelewa vizuri zaidi kuhusu utendaji tata wa goti. Waligundua kwamba goti halijikunji tu kwenye mhimili mmoja kama bawaba. Badala yake linazunguka na kuteleza—mambo yanayofanya liweze kusonga katika njia mbalimbali, likituwezesha kutembea, kucheza dansi, kuteleza kwenye barafu, na kufanya mambo mengine mengi.

Kwa miaka 40 hivi, watafiti wamejaribu kutengeneza goti bandia. Lakini ni vigumu sana kuiga ubuni wa goti la mwanadamu kwa kuwa ni tata sana. Isitoshe, magoti bandia hayadumu kwa muda mrefu yakilinganishwa na goti la mwanadamu. Hata ingawa wataalamu hao wana vifaa vilivyoboreshwa, ni vigumu kutokeza bidhaa zitakazodumu kwa miaka 20. Bila shaka, goti letu limetengenezwa kwa chembe hai zinazofanyizwa upya kila wakati. Kwa maoni yangu, goti linadhihirisha kwamba halikutokea kupitia mageuzi bali lilitokezwa kwa hekima ya Mungu.

Namna gani kuhusu mabadiliko ya chembe za urithi na ufanani uliopo kati ya miili ya wanyama fulani?

Ufanani huo unaonyesha walitokezwa na Mbuni yuleyule. Isitoshe, mabadiliko ya chembe za urithi hayaboreshi maumbile ya wanyama na kuwafanya wawe bora kuliko wengine. Badala yake, mabadiliko ya chembe za urithi huharibu chembe hizo. Bila shaka, kuna wakati ambapo aksidenti inaweza kuleta faida—kwa mfano, treni inapogonga daraja na kulibomoa, na hivyo kulinda jiji lisishambuliwe na jeshi linalovamia. Lakini aksidenti hiyo haikuboresha jiji hilo. Vivyo hivyo, mabadiliko ya chembe za urithi hayaboreshi viumbe. Na hayawezi kutokeza kitu kilichobuniwa kwa ustadi wa hali ya juu kama goti la mwanadamu.

Kwa nini uliamua kuwa Shahidi wa Yehova?

Nilipoanza kufuata kanuni za Biblia, maisha yangu yalianza kuwa mazuri sana. Zaidi ya hilo, katika mwaka wa 2003, nilihudhuria kusanyiko la kimataifa la Mashahidi wa Yehova na nikaona umoja wa pekee sana kama wa watu wa familia moja, hata kati ya wajumbe ambao hawakuwa wamewahi kukutana tena. Walionyesha kwamba wanapendana kikweli, nami nilitaka kuwa sehemu ya familia hiyo.