Nani wa Kulaumiwa?
Ikiwa si Mungu anayesababisha hali ngumu duniani, basi kwa nini kuna njaa kali, umaskini usioisha, vita, magonjwa, na misiba ya asili? Neno la Mungu, Biblia, linataja mambo matatu makuu yanayosababisha wanadamu wateseke:
Ubinafsi, Pupa, na Chuki. “Mwanadamu amemtawala mwanadamu mwenzake kwa kumuumiza.” (Mhubiri 8:9) Mara nyingi, wanadamu huteseka kwa sababu ya matendo ya wanadamu wenzao wasio wakamilifu ambao ni wabinafsi na wakatili.
Wakati na Matukio Yasiyotarajiwa. Mara nyingi wanadamu huteseka “kwa sababu wakati na matukio yasiyotarajiwa huwapata wote.” (Mhubiri 9:11) Mtu anaweza kuwa mahali pasipofaa wakati usiofaa, ama aksidenti ikatokea, au labda watu wakakosa kuwa waangalifu au wakafanya makosa.
Mtawala Mwovu wa Ulimwengu. Biblia inataja wazi chanzo kikuu cha matatizo ambayo wanadamu wanakabili. Inasema: “Ulimwengu mzima unakaa katika nguvu za yule mwovu.” (1 Yohana 5:19) “Mwovu” huyo ni Shetani Ibilisi, kiumbe wa roho mwenye nguvu ambaye mwanzoni alikuwa malaika wa Mungu lakini “hakusimama imara katika kweli.” (Yohana 8:44) Viumbe wengine wa roho walijiunga na Shetani na kumwasi Mungu ili watimize tamaa zao za kibinafsi na hivyo wakawa mashetani. (Mwanzo 6:1-5) Tangu walipoasi, Shetani na mashetani wake wamekuwa wakiongoza mambo duniani kwa njia ya kikatili. Hilo ni wazi hasa katika nyakati zetu. Sasa, Ibilisi ana hasira kali na “[anaipotosha] dunia nzima inayokaliwa,” na hilo limeleta ‘ole kwa dunia.’ (Ufunuo 12:9, 12) Kwa kweli, Shetani ni mtawala katili sana. Anapenda kuwaona wanadamu wakiteseka. Shetani ndiye anayewafanya wanadamu wateseke, na wala si Mungu.
FIKIRIA HILI: Bila shaka, mtu anayesababisha mateso kwa wanadamu wasio na hatia lazima awe mwovu, katili, na asiye na huruma. Kinyume na hilo, Biblia inasema: “Mungu ni upendo.” (1 Yohana 4:8) Kwa kuwa msingi wa utu wake ni upendo, “Mungu wa kweli hawezi kamwe kuwazia kutenda uovu, na Mweza-Yote hawezi kamwe kutenda kosa!”—Ayubu 34:10.
Hata hivyo, huenda ukajiuliza, ‘Mungu Mweza-Yote atamruhusu Shetani aendelee kutawala kikatili hivyo hadi lini?’ Kama ambavyo tumeona, Mungu anachukia uovu, na anapoona tukiteseka yeye huumia sana. Kwa kuongezea, Neno lake linatusihi hivi: “[Tupeni] mahangaiko yenu yote juu yake, kwa sababu yeye anawajali ninyi.” (1 Petro 5:7) Mungu anatupenda na ana nguvu za kuondoa mateso yote na ukosefu wa haki tunaouona, kama makala inayofuata itakavyoonyesha. *
^ fu. 7 Ili kupata habari zaidi kuhusu sababu zinazofanya wanadamu wateseke sana, soma somo la 26 kwenye kitabu Furahia Maisha Milele! kilichochapishwa na Mashahidi wa Yehova, na unachoweza kukipakua bila malipo yoyote kwenye tovuti ya www.pr2711.com/sw.
Huenda Ukapenda Pia
MNARA WA MLINZI
Hivi Karibuni Mungu Atakomesha Mateso Yote
Tunawezaje kuwa na uhakika kwamba hivi karibuni Mungu ataondoa mateso yote na ukosefu wa haki?
MAJIBU YA MASWALI YA BIBLIA
Je, Ibilisi Ni Kiumbe Halisi?
Je, Ibilisi ni hali tu ya uovu waliyo nayo wanadamu au ni kiumbe halisi?
MAJIBU YA MASWALI YA BIBLIA
Je, Ibilisi Ndiye Anayesababisha Kuteseka Kote?
Biblia inafunua chanzo cha kuteseka kwa wanadamu.
